Read KIMERU BIBLE PROTESTANT EDITION Gût 13 Bible Online

Gût 13 - KIMERU BIBLE PROTESTANT EDITION bible

Gût 13

¹MWATHANI nî aarîîrie Musa aramwîra atîrî,

²“Tûma antû bagacûnkûûne nthîgûrû ya Kanaani; îrîa nkwaa antû ba Israeli. Naagwe ûtûme ûmwe ûmwe kuuma kîrî o mwîrîga. Muntû ûu eethîrwe arî mûtongeeria wa antû ba mwîrîga jûu.”

³Tontû bûû, Musa arabatûma kuuma rwanda rwa Parani o ta ûrîa MWATHANI aamwîrîte. Antû bau bonthe baarî atongeeria ba antû ba Israeli.

⁴Nabo achûnkûûni bau baarî: Shamua mûtaana wa Zakuri kuuma mwîrîgeene jwa Rubeni;

⁵na Shafati mûtaana wa Hori kuuma mwîrîgeene jwa Simioni;

⁶na Kalebu mûtaana wa Jefune kuuma mwîrîgeene jwa Juda;

⁷na Igali mûtaana wa Josefu kuuma mwîrîgeene jwa Isakari;

⁸na Hoshea mûtaana wa Nuni kuuma mwîrîgeene jwa Efuraimu;

⁹na Paliti mûtaana wa Rafu kuuma mwîrîgeene jwa Benjamini;

¹⁰na Gadieli mûtaana wa Sodi kuuma mwîrîgeene jwa Zebuloni;

¹¹na Gadi mûtaana wa Susi kuuma mwîrîgeene jwa Josefu, naju nîju mwîrîga jwa Manase;

¹²na Amieli mûtaana wa Gemali kuuma mwîrîgeene jwa Dani;

¹³na Sethuri mûtaana wa Mikaeli kuuma mwîrîgeene jwa Asheri;

¹⁴na Nahibi mûtaana wa Vofusi kuuma mwîrîgeene jwa Nafutali;

¹⁵na Geueli mûtaana wa Maki kuuma mwîrîgeene jwa Gadi.

¹⁶Jau nîjo mariîtwa ja antû barîa Musa aatûmîre bareeta gûcûnkûûna nthîgûrû. Musa nî eetîre Hoshea mûtaana wa Nuni riîtwa rîngî, aramwîta Joshua[2]

¹⁷Musa nî aabatûmîre gûcûnkûûna nthîgûrû ya Kanaani arabeera atîrî, “Îteeni bwa ûrîo kuuma aja, bwîte bwa ûmotho bwa nthîgûrû ya Kanaani na rîu bwitie nthîgûrû ya irîma.

¹⁸Naabuî bûraithîîrie bwega bwoone ûrîa nthîgûrû îkari, na ûrîa antû barîa batwîre ku bakari; bwoone këethîra nî antû barî na inya kana nî bionje bitwîre ku, na bwoone këethîra antû bau nî babakai kana nî babaingî.

¹⁹Ningî bwoone këethîra nthîgûrû îrîa batûûraga nî înthongi kana nî îmbîî, na bwoone këethîra ntûûra ciaao nî cia maema kana nî imbake na ikairigîrwa na nthingo.

²⁰Ningî bwoone këethîra nthîgûrû îrî na mûthetu jûmûnoru kana jûmwondu, na këethîra îrî na mîtî kana îtî na mîtî. Ningî bûgerie ûrîa bûkoomba bûreete matuunda ja nthîgûrû îîu.” Narîo îgiita rîu rîaarî rîrîa nzabibû ciambagîîria kûguunda.

²¹Tontû bûû, antû bau nî beetîre baracûnkûûna nthîgûrû kuuma rwanda rwa Zini mwanka Rehobu îrîa îrî akuî na mûcîcîbîro jwa Hamathi jûrîa jûrî bwa ûrîo.

²²Nabo nî beetîre bwa ûmotho barakinya Heburoni kûrîa nchiarwa cia Anaki ciatûûraga. Nacio ciaarî nchiarwa cia mîîrîga ya antû ba Ahimani, na Sheshai, na Talimai. (Ntûûra ya Heburoni yaaki mîaka mûgwanja mbere ya ntûûra ya Zoani îrîa îrî Misri.)

²³Rîrîa baakinyîre kîguuruune gîa Eshikoli, nî baagiitîre rwang'i rwa mûzabibû rûrî na kîmaanja kîa nzabibû. Barakamatanîra kîmaanja kîu na ituro bagîtonyithîtie mûtîîne. Ningî nî baakamatîre kinya nkukumanga na nkûû bareeta nacio.

²⁴Nakû antû au nî gweetîrwe kîguuru kîa Eshikoli nîûntû nîo antû ba Israeli baatemere ndwang'i irî na imaanja bia nzabibû.

²⁵Nyuma ya ntukû mîrongo îna, achûnkûûni baarîîkia gûcûnkûûna nthîgûrû ya Kanaani, nî baacokere.

²⁶Bagûcoka kîrî Musa, na Aaroni na kîrî kîûthûrano kionthe kîa antû ba Israeli au Kadeshi, rwanda rwa Parani, na barabeera ûrîa booneete na baraboonia matuunda ja nthîgûrû ya Kanaani.

²⁷Nabo bareera Musa atîrî, “Nî tûreetîre nthîgûrû îrîa ûratûtûmîte, naatuî twona nî mma nî nthîgûrû îrîa nthongi na îrî mûthetu jûmûnoru na ûtonga bûbwingî. Najo jaja nîjo matuunda ja nthîgûrû îîu.

²⁸Îndî antû barîa batwîre ku nî antû barî na inya mono, na ntûûra ciaao nî îmbirigîre na nthingo na nî înene mono. Amwe na jau, nî tûroonere nchiarwa cia Anaki[3] ku.

²⁹Nabo Amaleki nîbo batwîre rûteere rwa ûmotho bwa nthîgûrû îîu. Ahiti, na Ajebusi, na Aamori bagatûûra nthîgûrû ya irîma. Akanaani nîbo batwîre rûteere rwa îria rîa Mediterania na rûteere rwa mûuro jwa Jorodani”

³⁰Kalebu nawe araboreria antû arabeera atîrî, “Twîteeni o nandî tûkagwate nthîgûrû îîu, nîûntû tûkoomba kûmîtaa.”

³¹Îndî antû barîa beetanîtie na Kalebu gûcûnkûûna nthîgûrû barauga atîrî, “Tûgëeta kûrwaa na antû bau, tûtîboomba nîûntû barî na inya nkûrûki yeetû.”

³²Tontû bûû, bareera antû ba Israeli nteto cia ûrongo ciegiî nthîgûrû îîu baarî bagûcûnkûûna barabeera atîrî, “Nthîgûrû îîu îtî irio bia kûng'ana antû baayo. Antû bonthe barîa tûroonere ku nî antû babaraaja na barî na inya.

³³ Ningî nî tûroonere imuntû bibinene ku, nchiarwa cia Anaki. Naatuî baratwonaga tûkari ta mpandi na kinya tuî nou tûraacionaga tûkari.”