Read KIMERU BIBLE PROTESTANT EDITION Gût 14 Bible Online

Gût 14 - KIMERU BIBLE PROTESTANT EDITION bible

Gût 14

¹Kîûthûrano kionthe kîa antû ba Israeli gîkûmenyithua nteto iu cia nthîgûrû ya Kanaani, nî kîarîrîre ûtukû bûu bunthe.

²Kîûthûrano kionthe kîa antû ba Israeli nî kîaanûng'unîîre Musa na Aaroni, kîrabeera atîrî, “Nî kaaba tûrîngîkuîra nthîgûrû ya Misri kana tûgakuîra gûkû rwanda!

³Nîka MWATHANI atuikîîtie nthîgûrûûne îîu nîkenda tûûragîrwa ndweene nabo aka beetû na aana beetû batawe? Tî kaaba tûcoke nthîgûrû ya Misri?”

⁴Nabo antû bareerana atîrî, “Twîthuurîreni muntû wa gûtûtongeeria tûcoke Misri.”

⁵Nîrîo Musa na Aaroni beenamîîrîîrie nthîgûrû mbere ya kîûthûrano kionthe kîa antû ba Israeli.

⁶Joshua mûtaana wa Nuni na Kalebu mûtaana wa Jefune, barîa baarî kîrî barîa baacûnkûûnîte nthî baratambûranga nguû ciaao kwonania kwithikîîra.

⁷Nabo baraarîria kîûthûrano kionthe kîa antû ba Israeli barakîîra atîrî, “Nthîgûrû îrîa tûreetîre gûcûnkûûna nî nthîgûrû înjega mono mono.

⁸Këethîra MWATHANI nî agwîrîîtue nî tuî, agaatwikia nthîgûrûûne îîu na atûnenkere yo, îrîa nthongi na îrî mûthetu jûmûnoru na ûtonga bûbwingî.

⁹ Bunka akî bûkárega kwathîkîra MWATHANI kana bûkîra. Ningî bûgákîra antû ba nthîgûrû îîu, nîkwîthîrwa tûkaboomba ndweene buru nîkwîthîrwa mîrungu yaao îrîa îbakaragia nî îberûkîrîte, îndî MWATHANI arî amwe naatuî. Bûkáabakîreni.”

¹⁰Îndî kîûthûrano kionthe kîa antû ba Israeli kîreetîkanîîria kîboorage na maiga. Rîu nîrîo ûkumio bwa MWATHANI bwoonerwe nî antû ba Israeli bonthe bûrî îemeene rîa gûtirimanîra.

¹¹MWATHANI nî oorîrie Musa atîrî, “Nî mwanka rî antû baba bagakara bameneete? Nî mwanka rî bagakara batîkûmbîtîkia kinya këethîra nî mbathithîrîtie biama bibingî?

¹²Nkaabakanûkia na mbathirie na mîrimo, îndî gwe ngaakwethia îthe wa mûgongo jwa antû baanene na barî na inya nkûrûki yaao.”

¹³ Îndî Musa areera MWATHANI atîrî, “Antû ba Misri baigua nteto irîa ûthithîrîtie antû ba Israeli barîa waaritîre nthîgûrûûne yaao na inya yaaku,

¹⁴bakeera antû ba Kanaani nteto iu. Nandî bo nî baigîîtue atî gwe MWATHANI ûrî amwe na antû baaku, na atî gwe MWATHANI nî tûkwonaga ûthiû kwa ûthiû, na atî îtu rîaaku rîîthagîrwa rîrî îgûrû rîeetû, na tûgatongeerua nî gîtugî kîa îtu mûthenya na tûgatongeerua nî gîtugî kîa mwanki ûtukû.

¹⁵Nandî wooraga antû baba bonthe o rîmwe, antû ba mîgongo îngî barîa baigîîtue nkuma yaaku bakauga atîrî,

¹⁶‘MWATHANI arabooragîîre rwanda nîûntû nî araremerwe nî kûbaikia nthîgûrûûne îrîa aabaciîtîîrie atî akabaa.’

¹⁷Nandî itû MWATHANI ndakwerenca woonanie inya yaaku kûringana na ûrîa waatûciîtîîrie ûrauga atîrî,

¹⁸ ‘MWATHANI atîthûûrangaga na mpwîî nî wa kîaao gîkiingî. Nî ûrekanagîra meeyia na maatia. Îndî gwe ûtîtiga gûkanûkia mwîyia, ûkamûkanûkia we, na aana baawe na aana ba aana baawe mwanka nthukîîne ya inya.’

¹⁹Itû ndakwerenca ûrekere antû baba meeyia jaao nîûntû bwa kîaao gîaaku na nîûntû ûtûûraga ûkîbarekagîra kuuma rîrîa baaumîre Misri mwanka nandî.”

²⁰MWATHANI areera Musa atîrî, “Nkûbarekera o ta ûrîa ûmberencere.

²¹ Îndî nî nkuuga na mma atî o ta ûrîa ntûûraga mwoyo na o ta ûrîa ûkumio bwaakwa bûûjûraga nthîgûrûûne,

²²antû baba nî booneete ûkumio bwaakwa na biama biaakwa birîa ndaaringîre Misri na kûu rwanda, ningî amwe na jau nîka baangeretie jamaingî, na barega kûmbathîkîra.

²³Gûtî waao ûkoona nthîgûrû îrîa ndaaciîtîrie atî nkaa biûjûjû biaao. Gûtî noo ûmwe wa baba baamenete ûgatonya ku.

²⁴ Îndî nî nthûûmba yaakwa Kalebu akî na nchiarwa ciaawe ngaikia nthîgûrûûne îîu aacûnkûnîre, nabo bakamîgwata yee yaao. Tontû nîwe wenka ûrî na roho mwanya na bangî na nî ambathîkîrîte buru.

²⁵Nandî rî, tontû Amaleki na Akanaani baatûûraga mîgwanthîîne, garûkeni, rûûjû bwîîtîîre rwanda na njîra ya bwa Îria Îtuune.”

²⁶MWATHANI nî aarîîrie Musa na Aaroni arabooria atîrî,

²⁷“Nî mwanka rî nkoomîîria kîûthûrano gîkî kîthûûku gîkûnung'unîra? Nî mbigîîtue mînung'uno ya antû ba Israeli îrîa banung'unîrîte.

²⁸Beere MWATHANI auga ûjû: ‘O ta ûrîa ntwîîre mwoyo, mantû jarîa bûmbîîrîte, naani nkaigua nîjo nkabûthithagîria.

²⁹ Bûgaakuîra rwanda rûrû na bimba bieenu binyage kunthe. Antû beenu bonthe barîa baatarîrwe ba mîaka mîrongo îîrî na nkûrûki, barîa banung’unîrîte,

³⁰gûtî nkaanja batîkinya nthîgûrûûne îrîa ndaaciîtîrie atî ngatûma bûtûûre ku. Nî Kalebu mûtaana wa Jefune na Joshua mûtaana wa Nuni akî bagaakinya ku.

³¹Îndî aana beenu barîa bwaugaga bakaathirua, bau nîbo ngaikia nthîgûrûûne îîu bamîmenye yoo ûrîa buî bûmeneeretie.

³²Îndî buî bûgakuîra gûkû rwanda.

³³ Aana beenu bagataratara kûu rwanda ta arîîthi mîaka mîrongo îna. Nabo bakathangîka mono nîûntû bwa kûrega gwîtîkia kweenu, mwanka buî bûkuîre kûu rwanda bwinthe.

³⁴Naabuî bûgaakanûkua meeyia jeenu mîaka mîrongo îna kûringana na ntukû irîa mîrongo îna irîa bwacûnkûûnîre nthîgûrû ya Kanaani. O ntukû îmwe ya iu nkamîeethagia mwaka jûmwe, nîkenda bûkaamenya ûthûûku bûrîa bûnthithîrîtie.

³⁵Ni MWATHANI nî ni ndauga mantû jau, atî nî mma nkaathithîria Kîûthûrano gîkî kîthûûku kîrîa kîothûranîre amwe nîkenda gînkararia. Gîgaakuîra kûu rwanda mwanka kîthire buru.”

³⁶Rîrîa antû barîa Musa aatûmîte gûcûnkûûna nthîgûrû, baacokere nî baacokerie nteto inthûûku ciegiî nthîgûrû îîu, na baatûma kîrîndî kîonthe kînung'unîra Musa,

³⁷antû bau baareetere nteto iu inthûûku, booragîîrwe nî mîrimo au mbere ya MWATHANI.

³⁸Îndî Joshua mûtaana wa Nuni na Kalebu mûtaana wa Jefune barîa baarî amwe na antû bau baarî bagûcûnkûûna nthî bataakuîre.

³⁹Musa akûmenyithia antû bonthe ba Israeli mantû jarîa MWATHANI aaugîîte, antû nî baithikîrîîre mono.

⁴⁰Rûkîîrî kainda antû barookîîra bareeta nthîgûrû ya irîma bakiugaga atîrî, “Tuî nî tûkûmenya nî twîîtie îndî tûgeeta nthîgûrû îrîa MWATHANI aaciîtîrie agatwaa.”

⁴¹Îndî Musa arabeera atîrî, “Nîkî bûkaregana na ûrîa MWATHANI augîîte? Tontû bûû, buî bûtîûmbana ndweene!

⁴²Menyeni bwîta nîûntû MWATHANI atî amwe naabuî, bûtîkeeje kûthirua nî anthû beenu.

⁴³Nîkwîthîrwa Amaleki na Akanaani barî mbere yeenu nabo bakabûthiria na rûchiû nîûntû nî bûremeete MWATHANI atîîthîrwa arî amwe naabuî.”

⁴⁴Amwe na bûu antû nî beetîre nthîgûrû ya irîma kinya këethîra Îthandûkû rîa kîrîkanîro rîa MWATHANI nî rîaatigîrwe kambîîne nawe Musa ateetanîrie nabo.

⁴⁵Nîrîo Amaleki na Akanaani barîa baatûûraga nthîgûrû îîu ya irîma baithûkîîre Aisraeli baraboomba. Bareengana nabo barabakinyia ntûûreene ya Horima.