Read KIMERU BIBLE PROTESTANT EDITION Gût 15 Bible Online

Gût 15 - KIMERU BIBLE PROTESTANT EDITION bible

Gût 15

¹MWATHANI nî aarîîrie Musa aramwîra

²aarîîrie antû ba Israeli abeere mantû jarîa bakaathithagia baakinya nthîgûrû îrîa akabaa nîkenda batûûraga ku:

³Rîrîa bakaritagîra MWATHANI igongwana biathoone biaao bîëthîrwa bîrî igongwana bia gwakîîria, kana baritage igongwana bia kûûjûria mîciîtio yaao, kana igongwana bia gûciendera kuuma ndîîthieene ciaao. Nabio igongwana biu bikethagîrwa birî na yeera rîrîega kîrî MWATHANI.

⁴Muntû wonthe ûrîa ûkaritagîra MWATHANI kîgongwana nî amûritagîre kinya mûtu jûmwinyu kilo îmwe juungeenue na maguta ja lita îmwe, birî kîgongwana kîa irio.

⁵Ningî nî amûritagîre lita îmwe ya ndibei îrî kîgongwana gîa gwîtûûrîria. O lita îmwe ya ndibei îritanagîrue amwe na gatûrûme kamwe ga kîgongwana gîa gwakîîria.

⁶Bwarita ntûrûme ya kîgongwana gîa gwakîîria, bûritanagîrie na kilo ijîîrî cia mûtu jûmwinyu juungeenue na nusu lita ya maguta ja nzeituuni, birî kîgongwana kîa irio.

⁷Bwarita kîgongwana gîa gwîtûûrîria bûritage nusu lita ya ndibei îrîa yeeraga bûbwega kîrî MWATHANI.

⁸Ningî rîrîa bûkaritaga ndeegwa îrî kîgongwana gîa gwakîîria, kana îrî kîgongwana gîa kûûjûria mûciîtio, kana îrî kîgongwana kîa gûcwaa thîîrî,

⁹bûkîritanagîrie amwe na ndeegwa na kilo ithatû cia mûtu jûmwinyu juungeenue na lita ijîîrî cia maguta ja nzeituni birî kîgongwana kîa irio.

¹⁰Ningî bûritage lita ijîîrî cia ndibei îrîa yeeraga bûbwega kîrî MWATHANI.

¹¹Biu nîbio bikaritanagîrua na kîgongwana kîa ndeegwa, kana kîa ntûrûme, kana kîa gatûrûme, kana gîa kathenge.

¹²O ûrîa bûkaaritaga igongwana bia nyomoo iu bing'ana nîu bûkaaritaga igongwana bia irio bing'ana.

¹³Ûu nîu Aisraeli bonthe babuîrîte kûritaga igongwana birîa bieeraga bûbwega kîrî MWATHANI.

¹⁴Ningî gûkëethîrwa kûrî na ageni batwîre amwe naabuî, kinya bo nî babuîrîte kûthingataga Waatho rîrîa bakûrita igongwana birîa bieeraga bûbwega kîrî MWATHANI.

¹⁵Buî amwe na ageni barîa batwîre amwe naabuî bûkathingata Waatho bûbwe nthukîîne cionthe. Buî amwe na ageni bau bûkari o ûmwe mbere ya MWATHANI.

¹⁶ Baabuî na ageni barîa batwîre amwe naabuî bûkaathingataga Waatho bûmwe bwa kûrita igongwana.

¹⁷Ningî MWATHANI nî aarîîrie Musa aramwîra,

¹⁸arîrie antû ba Israeli abeere atî rîrîa bagatonya nthîgûrûûne îrîa akabaikia,

¹⁹nî bathithagie ûjû, “Rîrîa bûkaarîjaga irio bia gûntû kûu, nî baritagîre MWATHANI bimwe biaabio birî kîgongwana.

²⁰Bamûritagîre kîgongwana kîa mîgaate îkaandi kuumania na mûnyaki jûrîa jûûragwa îtîîriine jûrî jwa mbere.

²¹Ritagîreeni MWATHANI kîgongwana kîa mîgaate îkaandi kuumania na mûnyaki jûrîa jûûragwa îtîîriine jûrî jwa mbere nthukîîne cieenu cionthe.

²²Antû boomba kûrega kûthingata mawaatho jau jonthe MWATHANI eerîre Musa.

²³Ningî boomba kûremwa kûjaathîkîra jonthe o ta ûrîa MWATHANI eerîte Musa. Mawaatho jau jabuîrîte kwathîkîrwa nthukîîne cionthe, kuuma rîrîa MWATHANI eerîre Musa jo.

²⁴Mantû jau jakëeja kûthithua jatîkûmenyeka, kîûthûrano kîa antû ba Israeli gîkarita kareegwa karî kîgongwana gîa gwakîîria, karitanîrue amwe na kîgongwana kîa irio na gîa gwîtûûrîria na bacoke barite nthenge îrî kîgongwana gîa kûthiria meeyia. Kigongwana kîu gîkeethîrwa kîrî na yeera rîrîega kîrî MWATHANI.

²⁵Mûthînjîri-Mûrungu akaarita kîgongwana gîa kûthirîria kîûthûrano kionthe kîa antû ba Israeli meeyia. Nabo bakaarekerwa nîûntû batîthîrwa bathithîtie meeyia bakîmenyaga. Ningî barekerwe nîûntû bwa kûritîra MWATHANI igongwana bia gwakîîria bia kûthiria meeyia.

²⁶Kîûthûrano kionthe kîa antû ba Israeli amwe na ageni barîa batûûranagîra amwe nabo bakaarekerwa meeyia jaao nîûntû beeîîtie batîkûmenya.

²⁷ Muntû akëeja kwîyia atîkûmenya akaaritaga mparîka ya mwaka jûmwe îrî ya kîgongwana gîa kûthiria meeyia.

²⁸Mûthînjîri-Mûrungu akaaritagîra MWATHANI kîgongwana gîa kûthiria meeyia ja muntû ûu wîîtie atîkûmenya. Nawe muntû ûu wîîtie akarekerwa.

²⁹Nabu waatho bwa muntû wîîtie atîkwenda nî bûmwe; kîrî muntû Mûisraeli kana mûgeni ûrîa ûtûûraga nthîgûrû ya Israeli.

³⁰Îndî muntû kinya ûrîkû arî Mûisraeli kana mûgeni, akëeja kwîyia meeyia ja ntabarako, muntû ûu nî akûmenithia MWATHANI na abuîrîte kwîngwa buru akauma kîrî antû ba MWATHANI.

³¹Nîkwîthîrwa muntû ûu nî ameneeretie ûrîa MWATHANI augîîte na nî aregeete kwathîkîra maathana ja MWATHANI. Muntû ûu abuîrîte gûkanûkîrua meeyia jau bwaawe, akeengwa buru kuuma kîrî antû ba MWATHANI.”

³²Nabo antû ba Israeli barî o kûu rwanda nî boonere muntû akiunaga nkû ntukû ya sabatû.

³³Antû barîa baamwonere akiunaga nkû nî baamûreetere kîrî Musa na Aaroni na kîûthûrano kionthe.

³⁴Nî aakarîrue aingîri nîûntû gûteerani ûrîa muntû ta ûu abuîrîte kûthithîrua.

³⁵MWATHANI areera Musa atîrî, “No mwanka muntû ûu ooragwe. Akaumagarua oome ya kambî nakîo kîûthûrano kionthe kîmûûrage na maiga.”

³⁶Nakîo kîûthûrano kionthe kîramuumagaria oome ya kambî na kîramûûraga na maiga o ta ûrîa MWATHANI eerîte Musa.

³⁷MWATHANI nî aarîîrie Musa aramwîra atîrî,

³⁸ “Arîria antû ba Israeli ûbeere baogage ikuundwa mîthieene ya nguû ciaao na mîrigi ya rangi ya wiirû bwa îgûrû. Bathithagie ûntû bûu nthukîîne ciaao cionthe.

³⁹Naabuî rîrîa bûkaaraithagîîria ikuundwa biu bûkaririkanaga maathana jaakwa jonthe bûtîkeeje kûthingata mairîrîîria jeenu jamathûûku jakabûgarûra kuuma kîrî ni.

⁴⁰Nabio ikuundwa biu bikaabûririkanagia kwathîkîra maathana jaakwa jonthe nîkenda bwîthagîrwa bûrî babatheru kîrî ni Mûrungu weenu.

⁴¹Ni nî ni MWATHANI Mûrungu weenu ûrîa waabûritîre nthîgûrû ya Misri nîkenda mpaa Mûrungu weenu. Ni nî ni MWATHANI Mûrungu weenu.”