Read KIMERU BIBLE PROTESTANT EDITION Gût 16 Bible Online

Gût 16 - KIMERU BIBLE PROTESTANT EDITION bible

Gût 16

¹ Kora mûtaana wa Izihari, aarî Mûlawi wa mwîrîga jwa Kohathi, amwe na Dathani, na Abiramu, tabo ataana ba Eliabu; na Oni mûtaana wa Pelethi, ûrîa wa mwîrîga jwa Rubeni,

²nî baagwatanîîre antû ba Israeli magana jaîrî ja mîrongo îtaano barîa baarî atongeeria barî îgweta ba kîûthûrano kîa antû ba Israeli, bararega kwathîkîra Musa.

³Baroothûrana baranung'unîra Musa na Aaroni barabeera atîrî, “Nîka bûkûthûgaania nî buî akî bwijî MWATHANI! Kîûthûrano kionthe kîa antû ba Israeli nî gîkîtheru na MWATHANI arî amwe nabo. Nîmbi îndî ûntû bûgûciona burî ba gîtûmi nkûrûki ya antû bangî ba MWATHANI?”

⁴Rîrîa Musa aaigîrue nteto iu araturia maru areenamîîria mwanka nthî.

⁵Rîu araarîria Kora na gîkundi kîaawe arabeera atîrî, “Rûûjû rûkîîrî MWATHANI akoonania nî ûrîkû ûrî waawe na nî ûrîkû ûrî ûmûtheru. Ningî agatûma muntû ûu athuurîte aumîre eeta akuî na MWATHANI.

⁶Ûûgwe Kora na gîkundi gîaaku jûkieni tûraî twa gûkamata mwanki.

⁷Rûûjû rûkîîrî bwîkîre mwanki tûraîîne tûu, na bwîkîre ubaani ku, bûbiîke kîritîroone kîa igongwana. Nawe muntû ûrîa MWATHANI akaathuura nîwe ûkeethîrwa arî ûmûtheru. Buî nchiarwa cia Lawi bûgûtabarîkia.”

⁸Ningî Musa areera Kora atîrî, “Alawi! Nandî thikîîreeni.

⁹Nîka bûkwona bûrî ûntû bûbûûthû kwîthîrwa bûthuuri nî Mûrungu wa Israeli, bwîthagîrwa bûrî akuî nawe bûtua gûtumîkagîra antû baawe îemeene rîa gûtirimanîra?

¹⁰Mûrungu nî abûrekeeretie buî Alawi bwinthe nîkenda bûkaraga akuî nawe. Nandî nîka bûkwenda kinya ûthînjîri Mûrungu kinya bu?

¹¹Gwe amwe na gîkundi kîrîa kîrî amwe naagwe, menyeni atî nî MWATHANI bûreganîte nawe. Nîka Aaroni arî ûû tontû bûkûmûnung'unîra?”

¹²Ningî Musa nî aatûmanîîre ataana ba Eliabu tabo Dathani na Abiramu. Îndî baracokia barauga, “Tûtîîja.

¹³Nîka ûkwona bûrî ûntû bûbûûthû gûtûrita nthîgûrû îrîa nthongi na îrî mûthetu jûmûnoru na ûtonga bûbwingî wîîja gûtûûragîra rwanda, na nandî ûcoke ûcieethie mûnene weetû?

¹⁴Mwanka nandî ûtîratwikia nthîgûrû îrîa nthongi na îrî mûthetu jûmûnoru na ûtonga bûbwingî, kana ûtwaa ithaka, kana miuunda ya mîzabibû. Nîka ûkûthûgaania atî woomba kwaîria antû baba? Tuî tûtîîja.”

¹⁵Musa nawe nî aathûûrîre mono na areera MWATHANI atîrî, “Ûgéetîkîîria igongwana bia antû baba. Gûtî ûthûûku ndaabathithîria; njûkia ntigiri kuuma kîrî bo.”

¹⁶Musa areera Kora atîrî, “Ûûgwe, na gîkundi kîrîa kîrî amwe naagwe, na Aaroni njûûni rûûjû mbere ya MWATHANI îemeene rîa gûtirimanîra.

¹⁷O muntû nî ajûkie karaî karîa gatumagîrwa gûkamata mwanki, eeje eekîrîte ubaani ku. Tûraî tûu tunthe tûkeethîrwa tûrî magana jaîrî ja mîrongo îtaano. Natu tûreetwe îmeene rîa gûtirimanîra. Naagwe amwe na Aaroni, kinya buî bûreete tweenu.”

¹⁸Nabo o muntû arajûkia karaî areekîra mwanki ku na ubaani. Rîu bararûngama mwariine jwa îema rîa gûtirimanîra barî amwe na Musa na Aaroni.

¹⁹Kora araremia kîûthûrano kionthe, nîkenda kîrega kwathîkîra Musa na Aaroni. Aroothûrania kîrîndî au îemeene rîa gûtirimanîra. MWATHANI aracionania kîrî kîûthûrano kionthe arî na ûkumio bûbûnene.

²⁰MWATHANI nî aarîîrie Musa na Aaroni arabeera atîrî,

²¹“Ciathûraneni na kîûthûrano gîkî naani nkîthirie o rîu.”

²²Îndî Musa na Aaroni baraturia maru, barenamîîria, baratiirithia moothiû jaao nthîgûrû, barauga atîrî, “Itû Mûrungu, gwe nîgwe woombîre antû bonthe. Muntû ûmwe akëeyia rî, nîka ûthûûra nî kîûthûrano kionthe?”

²³MWATHANI araarîria Musa aramwîra atîrî,

²⁴“Arîria kîrîndî ûkîîre ûjû: ‘Antû nî baumaume akuî na îema rîa Kora, na rîa Dathani, na rîa Abiramu.’”

²⁵Musa arookîîra areeta kîrî Dathani, na Abiramu, nabo atongeeria ba antû ba Israeli baramûthingata.

²⁶Musa araarîria kîrîndî arauga atîrî, “Itû ndabwerenca umaumeeni akuî na maema ja antû baba bathûûku na bûkaaringithia gîntû kîaao kinya kîrîku, bûtîkeeje kûthiranîrua nabo bakîthirua nîûntû bwa meeyia jaao.”

²⁷Tontû bûû, kîrîndî kîraumauma akuî na maema ja Kora, na ja Dathani na ja Abiramu. Dathani na Abiramu barî na aka baao na aana baao nî baarî bakuumagara baarûngama mîariine ya maema jaao.

²⁸Nîrîo Musa aaugîre atîrî, “Nandî bûkaamenya atî nî MWATHANI ûntûmîte nthithia mantû jarîa nthithagia jonthe, na tî ûûni ningwa nthithagia jarîa nkwenda.

²⁹Antû baba bakëeja gûkua gîkuû ta kîrîa antû bangî bakuujaga kana bagakua nî ûkûrû ja antû bangî, bûkamenya atî tî MWATHANI ûntûmîte.

³⁰Îndî MWATHANI agatûma gûkarîka ûntû bûtakarîka kaîrî nayo nthîgûrû îkagaûkana îkameria antû baba amwe na into biaao bionthe bakeenama bageeta kwa barîa akuû, rîu bûmenye atî antû baba nî kûmena bamenete MWATHANI.”

³¹Naku kûrakara atîrî, Musa akîthiria kwaria nteto iu akî, nthîgûrû îraatûka rungu rwa maema ja Dathani na ja Abiramu,

³²nayo nthîgûrû îrabameria amwe antû ba nja ciaao; na antû ba nja ya Kora bonthe na into biaao bionthe.

³³Tontû bûû, antû bau amwe na into biaao bionthe baramerua barî mwoyo nayo nthîgûrû îracokanîîra îrabathikîra ku. Antû bau barathirua buru kuuma kîrî kîrîndî kîa Israeli.

³⁴Nabo antû ba Israeli bonthe barîa baathiûrûkîrîte maema jau baramatûka bakwigua kîrîro kîaao, bakiugaga atîrî, “Kinya tuî menya twîja kûmerua nî nthî.”

³⁵MWATHANI aratûma mwanki, naju jûraîîthia antû magana jaîrî ja mîrongo îtaano barîa baaritaga ubaani.

³⁶MWATHANI nî aarîîrie Musa aramwîra atîrî,

³⁷“Arîria Eleazari mûtaana wa Aaroni mûthînjîri-Mûrungu ûmwîre ajûkie tûraî tûrîa twîkagîrwa mwanki tûrîa tûrî au antû bakûrûkagîîra, arite makara ajanyagie gataaria antû amwe nîkwîthîrwa tûraî tûu twîkagîrwa mwanki nî tûtûtheru.

³⁸Tûraî tûu nî twa antû barîa beeîtie bakanûkua nîûntû bwa meeyia jaao. Tûjûkie ûthithie natu tûbaati twa gûkunîkagîra kîritîro kîa igongwana. Natu tûkaa kîmenyithania kîrî antû ba Israeli kîa mantû jarîa MWATHANI athithîtie.”

³⁹Tontû bûû, Eleazari mûthînjîri-Mûrungu nî aajûkîrie tûraî tûu twa îturutia twa gwîkîra mwanki tûraturwa tûraa gîkunîki kîa kîritîro kîa igongwana. Tûraî tûu twaarî twa antû barîa baîthîîtue.

⁴⁰Ûntû bûu bûraa kîmenyithania kîrî antû ba Israeli atî gûtî muntû ûbuîrîte kûîthîîria ubaani kîritîroone kîa igongwana atî wa nchiarwa cia Aaroni. Akëeja kûthithia ûu, akaathirua ta Kora na gîkundi kîaawe. Mantû jau najo nî jaathithîrue nî Eleazari o ta ûrîa MWATHANI eerîte Musa.

⁴¹Îndî rûûnene kîrîndî kîonthe gîa antû ba Israeli nî kîanung'unîîre Musa na Aaroni gîkiugaga atîrî, “Nî bûûragîte antû ba MWATHANI.”

⁴²Naku nî gwakarîre atîrî, rîrîa kîrîndî kîothûranîte gîkînung'unagîra Musa na Aaroni, nî kîaraithîrîrie îemeene rîa gûtirimanîra. Kîroona îtu rîkunîkîte îema rîu, na ûkumio bwa MWATHANI bûrî o.

⁴³Nabo Musa na Aaroni nî beetîre bararûngama mbere ya îema rîa gûtirimanîra.

⁴⁴MWATHANI araarîria Musa aramwîra atîrî,

⁴⁵“Umauma kîrî kîrîndî gîkî nkîthirie ntûtî!” Nabo baraturia maru, bareenamîîria, baratiirithia moothiû jaao nthî.

⁴⁶Musa areera Aaroni atîrî, “Jûkia karai gaaku ga gwîkîra mwanki ûgeekîre kuuma kîritîroone kîa igongwana na ûcoke wîkîre ubaani ku ûmîkamate na mpwîî wîte kîrî kîrîndî. Naagwe ûrite kîgongwana gîa kûtheria antû. Nîkwîthîrwa MWATHANI nî athûûri nîbo. Tontû bakwambîrîria kûthirua nî mîrimo.”

⁴⁷Tontû bûû, Aaroni arajûkia karaî ga gwîkîra mwanki o ta ûrîa Musa aamwîrîte aroogîa kîrî kîrîndî. Îndî mûrimo nî jwaarî jûkûgwata antû. Aaroni areekîra ubaani karaîîne kau ararita kîgongwana gîa kûthirîria antû meeyia.

⁴⁸Ningî ararûngama gatîgatî ka barîa baakuîte na barîa baarî mwoyo, nayo mîrimo îrathira.

⁴⁹Antû barîa bonthe booragîrwe nî mûrimo baarî antû ngiri îkûmi na inya cia magana mûgwanja (14,700) gûtîgûtarwa barîa baakuîte nîûntû bwa meeyia ja Kora.

⁵⁰Mûrimo jûkûthira, Aaroni aracoka kîrî Musa au mwariine jwa îema rîa gûtirimanîra.