Read KIMERU BIBLE PROTESTANT EDITION Gût 17 Bible Online

Gût 17 - KIMERU BIBLE PROTESTANT EDITION bible

Gût 17

¹MWATHANI nî aarîîrie Musa aramwîra atîrî,

²“Îîra antû ba Israeli bakûnenkere o mwîrîga rûturo rûmwe kuuma kîrî mûtongeeria waaju. Cionthe ciîthîrwe irî nturo îkûmi na ijîîrî (12). Naagwe waandîke riîtwa rîa o mûtongeeria rûturoone rwaawe.

³Naagwe waandîke riîtwa rîa Aaroni rûturoone rwa mwîrîga jwa Lawi. O mûtongeeria wa mwîrîga akeethîrwa arî na rûturo rûmwe.

⁴Ningî wîîke nturo iu îemeene rîa gûtirimanîra mbere ya Îthandûkû rîa kîrîkanîro, arîa ntirimanagîra naagwe.

⁵Naku gûgakara atîrî, rûturo rwa muntû ûrîa nkathuura rûgaakûra ruume mpang'i. Ûu nîu nkaathiria kûnung'una gwa antû ba Israeli kûrîa bakarîte bagîkûnung'unagîra.”

⁶Tontû bûû, Musa araarîria antû ba Israeli, nabo atongeeria baao bonthe baramûnenkera o muntû rûturo rwaawe kûringana na mîîrîga yaao îkûmi na îîrî, o mwîrîga rûturo rûmwe. Naru rûturo rwa Aaroni nî rwaarî amwe na nturo iu ciaao.

⁷Musa nawe areeka nturo iu mbere ya MWATHANI îemeene rîa gûtirimanîra.

⁸ Naku kûrakara atîrî, rûûneene Musa nî eetîre îemeene rîa gûtirimanîra, nawe aroona rûturo rwa Aaroni wa kuuma mwîrîgeene jwa Lawi rûkûrîte rûkauma mpang'i na mabûûra na rûgaciara matuunda jakari ta nkandamia.

⁹Musa nawe ararita nturo cionthe au mbere ya MWATHANI îemeene rîa gûtirimanîra araciikia kîrî antû ba Israeli bonthe. O mûtongeeria aratega bwega nturo iu na o mûtongeeria arajûkia rûturo rwaawe.

¹⁰MWATHANI areera Musa atîrî, “Cokia rûturo rwa Aaroni kaîrî mbere ya Îthandûkû rîa kîrîkanîro nîkenda rwîîkwa rûrî kîririkania kîrî ndemi. Tontû bûû, bagatiga kûnung'una batîkeeje gûkua.”

¹¹Musa arathithia o ûrîa MWATHANI aamwîrîte athithie.

¹²Nabo antû ba Israeli baraarîria Musa baramwîra atîrî, “Nandî tûgûkua, tûkûthira; tûkûthira twinthe buru!

¹³O muntû wonthe ûrîa ûgaakuîrîîria îema rîa MWATHANI nîka agaakua. Nîka tûgaakua twinthe tûthire?”