Read KIMERU BIBLE PROTESTANT EDITION Gût 18 Bible Online

Gût 18 - KIMERU BIBLE PROTESTANT EDITION bible

Gût 18

¹MWATHANI nî eerîre Aaroni atîrî, “Ûûgwe na nchiarwa ciaaku amwe na Alawi nî buî bûkarîagua meeyia jarîa jakathithagua jegiî îema rîa gûtirimanîra. Naagwe amwe na nchiarwa ciaaku, nî buî bûkaarîagua meeyia jarîa jakathithagua nî athînjîri-Mûrungu.

²Alawi nîbo bagaagûteethagîîria gwe na ataana baaku rîrîa bûgûtumîka îemeene rîa gûtirimanîra.

³Alawi nîbo bagagûtumîkagîra na baritage ngûgî cionthe îemeene rîa gûtirimanîra, îndî bagaakinya akuî na into birîa bitumagîrwa îemeene rîa gûtirimanîra kana kîritîroone kîa igongwana batîkeeje gûkua naagwe ûkua.

⁴Nabo bakaaritanagîria ngûgî cionthe cia îema rîa gûtirimanîra amwe na ûûgwe, îndî gûtî muntû ûtîtîkîrîîtue ûbuîrîte kwîja akuî naagwe.

⁵Naagwe nîgwe ûkaamenyagîîra mantû ja îema rîa gûtirimanîra na ja kîritîro kîa igongwana nîkenda ntîkaathûûre nî antû ba Israeli kaîrî.

⁶Naani rî, nî nthuurîte Alawi kuuma kîrî antû ba Israeli, ndabanenkanîra kîrî gwe nîkenda bantumîkagîra îemeene rîa gûtirimanîra.

⁷Tontû bûû, ûûgwe na ataana baaku nî buî bûgaatûmîkagîra bûrî athînjîri-Mûrungu mantûûne jonthe jegiî kîritîro kîa igongwana jarîa jegiî antû arîa atheru buru. Kîewa kîrîa nkûbwaa nî kûbweethia athînjîri-Mûrungu. Muntû kinya ûrîku ûrîa ûgaakuîrîria into birîa bitumagîrwa îemeene rîa gûtirimanîra no mwanka ooragwe.”

⁸MWATHANI nî aarîîrie Aaroni aramwîra, “Atîrî, ndîgûkûnenkera matigari ja biewa bionthe birîa nkaaritagîrwa, birîa bionthe Aisraeli bakaambathûragîra. Naani nkûbinenkanîra kîrî gwe na kîrî nchiarwa ciaaku ndauga biee gîchunchî gîa kiigai kîeenu mwanka kenya.

⁹Igongwana bionthe birîa bitî bia gwakîîria nî biaaku. Nabio nî igongwana birîa antû baritaga bia irio, na bia kûthiria meeyia, na bia kûthiria maatia. Igongwana biu bionthe bitheru nî biaaku na bia ataana baaku.

¹⁰Naabuî bûkaarîjagîra into biu antû arîa atheru buru, na nî arûme bonka bakabirîîjaga nîûntû nî bibitheru kîrî buî.

¹¹Ningî into birîa antû ba Israeli bakaaritaga birî igongwana bia gûûkîrîria nî bieenu kinya bio. Nkûbinenkanîra kîrî gwe, na kîrî ataana baaku, na kîrî aarî baaku nabu bûu nî Waatho mwanka kenya. Muntû wonthe wa nja yaaku ûrîa ûrî ûmûtheru no arîe into biu.

¹²“Ningî ngûkûnenkera maguta jonthe jarîa meega, na ndibei yonthe îrîa njega, na irio bionthe birîa biega na maketha ja mbere jonthe jarîa nditagîrwa nî antû ba Israeli.

¹³Najo maketha ja mbere jonthe nthîgûrûûne yaao jarîa bakaanditagîra jakaejaga jaaku. Muntû wonthe wa nja yaaku ûrîa ûthereetue oomba kûrîa into biu.

¹⁴ Into bionthe birîa nkethagîrwa mbathûrîri nî Israeli nîûntû bwa mûciîtio jwa kûbithiria buru bikethagîrwa birî biaakwa.

¹⁵Ningî marikithathi jonthe ja antû na ja nyomoo jarîa antû ba Israeli bakaanditagîra jakethagîrwa jarî jaaku. Îndî bûgaakûûraga marikithathi ja antû na ja nyomoo cionthe îrîa îtîtheri.

¹⁶Bûgaakûûraga marikithathi jau jarî na ûkûrû bwa mweri jûmwe. O îrikithathi bûkarîkûûra na fetha ithaano kûringana na kîthimi kîrîa gîtumagîrwa.

¹⁷Îndî marikithathi ja ng'ombe, kana ja ng'ondu, kana ja mbûri bûkájakûûreeni nîûntû nî jamatheru. Bûminyamînyagîrie tharike yaajo kîritîroone kîa igongwana na bûgaakîîria maguta jaajo jarî kîgongwana gîa gwakîîria kîrîa kîrî yeera rîrîega kîrî ni.

¹⁸Îndî nyama cia marikithathi ja nyomoo iu ikethagîrwa irî ciaaku; o ta ûrîa nyama ya kîbara îrîa îritagwa îrî kîewa kîa mwanya, na kûgûrû kwa ûrîo biîthagîrwa birî biaaku.

¹⁹Nabio igongwana bibitheru bionthe birîa antû ba Israeli banditagîra ngûkûnenkera bio, gwe amwe na ataana baaku, na aarî baaku. Nabu nî waatho bwa kûthingatagwa kenya na kenya. Nabu ûntû bûu nî kîrîkanîro gîaakwa na ûûgwe amwe na nchiarwa ciaaku. Kîu nî kîrîkanîro kîbuîrîte kûthingatagwa magiita jonthe.”

²⁰Ningî MWATHANI nî eerîre Aaroni atîrî, “Gwe ûtîîthîrwa ûrî na rûgai nthîgûrûûne kana wîthîrwa ûrî na ngwato amwe na antû bangî ba Israeli. Ni nî ni nkethagîrwa ndî ngwato yaaku na rûgai rwaaku.

²¹ “Ningî nî mpeete nchiarwa cia Lawi gîchunchî kîmwe kuuma kîrî îkûmi kîa into bionthe birîa nditagîrwa nî Aisraeli. Gîchunchî kîu kîmwe kuuma kîrî îkûmi nîkîo gîkethagîrwa kîrî îrîi rîaao nîûntû bwa gûtumîkîra îema rîa gûtirimanîra.

²²Kuuma nandî antû bangî ba Israeli batîbuîrîte gûkuîrîîria îema rîa gûtirimanîra batîkeeje kwîyia bakua.

²³Îndî nî Alawi bagatumîkaga îemeene rîa gûtirimanîra. Ningî bakëeja kûthithia meeyia bagaakanûkagua. Alawi batîbuîrîte kwîthagîrwa barî na ngwato nthîgûrûûne ya Israeli. Waatho bûu bûthingatagwe nthukîîne cionthe.

²⁴Îndî nkûnenkanîra kîrî Alawi into birîa nditagîrwa nî antû ba Israeli birî gîchunchî kîmwe kuuma kîrî îkûmi; birî igongwana into biu nîbio rûgai rwa Alawi. Alawi batîbuîrîte kwîthîrwa barî na ngwato gatîgatîîne ka antû ba Israeli.”

²⁵Ningî MWATHANI nî aarîîrie Musa aramwîra atîrî,

²⁶“Arîria Alawi ûbeere ûjû: Rîrîa bûkaajûkagia into birîa antû ba Israeli bakanditagîra birî gîchunchî kîmwe kuuma kîrî îkûmi, no mwanka bûnditagîre gîchunchî kîmwe kuuma kîrî îkûmi kîa bio.

²⁷Into biu bûkanditagîra bikethagîrwa birî igongwana o ta birîa nditagîrwa nî Aisraeli bia maketha ja mbere na ndibei ya mbere.

²⁸Ûu nîu bûkanditagîra igongwana kuuma kîrî ichunchî bia mbere bia îkûmi, bionthe birîa bûnenkeri nî antû ba Israeli. Bwanditîra igongwana biu, bûbinenkanagîre kîrî Aaroni, mûthînjîri-Mûrungu.

²⁹Bûnditagîre igongwana kuuma kîrî into birîa biega buru bia into birîa biathûri.

³⁰Naabuî bwanditîra into biu biega buru, bwoomba gûtigwa na bimwe o ta ûrîa mûrîmi atigagia maketha jamwe na ndibei îmwe anditîra îngî.

³¹Into biu nîbio îrîi rîaaku nîûntû bwa gûtumîkîra îema rîa gûtirimanîra. Naagwe amwe na antû ba nja yaaku bwoomba kûbirîîra gûntû kunthe kûrîa bûkwenda.

³²Naabuî bûtîîthagîrwa bûthûûkîtie rîrîa bûkarîîjaga into biu, bunka akî bwamba kûnditîra birîa biega buru biaabio. Îndî bûmenyagîîre bûtîkeeje gwîkîra igongwana bia antû ba Israeli mûgiro; bûrîa into biu mbere ya bûnditîra birîa biega buru biaabio. Bûkëeja kûthithia ûu, bûgaakua.”