Read KIMERU BIBLE PROTESTANT EDITION Gût 19 Bible Online

Gût 19 - KIMERU BIBLE PROTESTANT EDITION bible

Gût 19

¹MWATHANI nî aarîîrie Musa na Aaroni arabeera atîrî,

²“Îîreeni antû ba Israeli Waatho bûbû: babûreetere mwari întuune îtî na antû athûûku na îrîa îteekîrwa gîchooki.

³Naabuî bûmînenkanîre kîrî Eleazari mûthînjîri-Mûrungu. Nayo îkaumagarua oome ya kambî îthînjwe Eleazari ategeete.

⁴Eleazari mûthînjîri-Mûrungu akaaringithia tharike yaayo na kîara, na aminyaminye îngî au mbere ya îema rîa gûtirimanîra maminya mûgwanja.

⁵Nayo mwari îîu îgaakîîrua Eleazari mûthînjîri-Mûrungu ategeete. Mûgûûta jwaayo jwakîîrue amwe na nyama ciaayo, na tharike yaayo na mara jaayo.

⁶Mûthînjîri-Mûrungu akaajûkia mîtî ya mîtarakwa, na makuuû, na gîtambaa gîgîtuune abigere mwankiine jûrîa jûgwakîîria mwari îîu.

⁷Rîu mûthînjîri-Mûrungu akaûûra nguû ciaawe, na athambe, atonye kambîîne. Îndî agakara atîtheri mwanka ûgoro.

⁸Nawe muntû ûu ûgaakîîria mwarî îîu, akaûûra nguû ciaawe, na athambe. Nawe agakara atîtheri mwanka ûgoro.

⁹ Muntû ûthereetue akoothûrania mûju jwa mwari îîu, ajwîkie oome ya kambî antû atheru. Naju jûgeekwa antû au nîûntû bwa gûtumagîrwa nî kîûthûrano gîa antû ba Israeli juunganague na rûûjî nîkenda bithiria mûgiro. Nakîo kîu gîkethagîrwa kîrî kîgongwana gîa kûthambia meeyia.

¹⁰Muntû ûu ûûthûranîrie mûju jwa mwari îîu, akaûûra nguû ciaawe na akare atîtheri mwanka ûgoro. Nabu Waatho bûu bûkathingatagwa magiita jonthe nî antû ba Israeli na ageni barîa batûûraga amwe nabo.”

¹¹Ningî MWATHANI nî eetîre na mbere kuuga atîrî, “Muntû kinya ûrîkû akëeja kûringithia kiimba kîa muntû, agakaraga ntukû mûgwanja atîtheri.

¹²Muntû ûu, abuîrîte kwitheria na rûûjî ruungeenue na mûju jwa mwari întuune ntukû ya ithatû, na ya mûgwanja, nawe akathera. Îndî akëethîrwa atiitheria ntukû ya ithatû na ya mûgwanja atîîthîrwa atheri.

¹³Muntû kinya ûrîkû ûrîa ûkaringithia kiimba kîa muntû na arege kwitheria, muntû ûu ageekîra îema rîa MWATHANI rîa gûtirimanîra mûgiro. Muntû ûu agaatiga gûtaranîrua na antû ba Israeli. Nîkwîthîrwa muntû ûu ataatherua na rûûjî ruungeenue na mûju jwa mwari îrîa yaakîrîîrue.

¹⁴“Waatho bwegiî muntû akuîrîte îemeene nî bûbû: antû bonthe barîa bagatonyaga îemeene rîu, na barîa bonthe barî îemeene rîu, bagakaraga batîtheri ntukû mûgwanja.

¹⁵Nabio into bionthe birîa bikethagîrwa birî îemeene rîu bitî na nkunîki bikethagîrwa bitîtheri.

¹⁶Muntû kinya ûrîkû ûrîa ûkaaringithagia kiimba kîa muntû ûûragîri bûûrîîne kana atonge kiimba kîa muntû ûkuîte wengwa, kana atonge mûrûitû jwa muntû, kana atonge mbîrîra, akethagîrwa atîtheri ntukû mûgwanja.

¹⁷“Kîrî kûtheria muntû ta ûu, mûju jwa mwari îrîa yaakîrîîrue nîûntû bwa kûthambia meeyia jûkajûkagua jûgeekîrwa nyongûûne îrî na rûûjî rûrûkembûku.

¹⁸Muntû ûthereetue akajûkagia makuuû ajatombekage rûûjîîne rûu. Acoke aminyaminyîrie îema rîrîa muntû akuîrîte, na amiinyîrie into bionthe birîa birî ku, na aminyîrie muntû ûu ûringithîtie marûitû ja muntû kana kiimba kîa muntû ûûragi, kana ûkuîte wengwa, kana mbîrîra.

¹⁹Muntû ûu ûtheri akaminyaminyîria muntû ûu ûtîtheri rûûjî rûu ntukû ya ithatû na ya mûgwanja. Muntû ûu ûtîtheri akaitheragia ntukû ya mûgwanja, aûûre nguû ciaawe, na athaambe. Nawe akeethîrwa arî ûmûtheru ûgoro.

²⁰Muntû wonthe ûrîa ûkethagîrwa atîtheri na arege kwitheria, muntû ûu ageekagîra îema rîa MWATHANI rîa gûtirinamîra mûgiro. Ningî muntû ûu agaatiga gûtaranîrua na antû ba Israeli. Nîkwîthîrwa muntû ûu ataatherua na rûûjî ruungeenue na mûju jwa mwari îrîa yaakîrîîrue.

²¹Nabu bûbû nî Waatho bwa kûthingatagwa magiita jonthe. Muntû ûrîa ûkaminyaminyîria rûûjî rûu rwa kûtheria no mwanka aûûrage nguû ciaawe. Nawe muntû ûrîa ûkaaringithagia rûûjî rûu rwa kûtheria, muntû ûu akethagîrwa atîtheri mwanka ûgoro.

²²Muntû wonthe ûtîtheri ûrîa ûkaaringithagia gîntû, gîntû kîu gîgaatiga kwaa gîkîtheru, Muntû ûngî ûrîa ûkaaringithagia gîntû kîu kinya we agaakaraga atîtheri mwanka ûgoro.”