Read KIMERU BIBLE PROTESTANT EDITION Gût 2 Bible Online

Gût 2 - KIMERU BIBLE PROTESTANT EDITION bible

Gût 2

¹MWATHANI nî aarîîrie Musa na Aaroni arabeera atîrî,

²“Rîrîa antû ba Israeli bakaambaga kambî, o muntû nî aambage îema rîaawe arîa kûrî na rwano rwa mwîrîga jwaao. Maema jaambagwe jathiûrûkîrîte îema rîa gûtirimanîra, na jeerekeene narîo.

³Antû ba mwîrîga jwa Juda nîbo bakaamba kambî yaao rûteere rwa bwa gaiti rwa îema rîa gûtirimanîra, arîa gûkethagîrwa kûrî na rwano rwaao. Nabo bagaatongagîîrua nî Nahashoni mûtaana wa Aminadabu.

⁴Njûûrî îrîa akeethîrwa arûngamîrîte nî ya antû ngiri mîrongo mûgwanja na inya cia magana jatantatû (74,600).

⁵“Antû ba mwîrîga jwa Isakari nîbo bakaamba maema jaao bathingateene na mwîrîga jwa Juda. Mûtongeeria waao akeethîrwa arî Nethaneli mûtaana wa Zuari.

⁶Njûûrî îrîa akeethîrwa arûngamîrîte nî ya antû ngiri mîrongo îtaano na inya cia magana jana (54,400).

⁷“Antû ba mwîrîga jwa Zebuloni nîbo bakaamba maema jaao bathingateene na mwîrîga jwa Isakari. Mûtongeeria waao akeethîrwa arî Eliabu mûtaana wa Heloni.

⁸Njûûrî îrîa akeethîrwa arûngamîrîte nî ya antû ngiri mîrongo îtaano na mûgwanja cia magana jana (57,400).

⁹Antû bonthe ba mîîrîga îrîa îkethagîrwa yaambîte maema jaao arîa gûkethagîrwa kûrî na rwano rwa mwîrîga jwa Juda nî antû ngiri îgana rîa mîrongo înaana na ithanthatû cia magana jana (186,400). Bau nîbo bageetaga barî mbere.

¹⁰“Antû ba mwîrîga jwa Rubeni nîbo bakaamba kambî yaao rûteere rwa bwa ûmotho rwa îema rîa gûtirimanîra, arîa gûkethagîrwa kûrî na rwano rwaao. Nabo bagaatongagîîrua nî Elizuri mûtaana wa Shedeuri.

¹¹Njûûrî îrîa akeethîrwa arûngamîrîte nî ya antû ngiri mîrongo îna na ithanthatû cia magana jataano (46,500).

¹²Antû ba mwîrîga jwa Simioni nîbo bakamba maema jaao bathingateene na mwîrîga jwa Rubeni. Mûtongeeria waao akeethîrwa arî Shelumieli mûtaana wa Zurishadai.

¹³Njûûrî îrîa akeethîrwa arûngamîrîte nî ya antû ngiri mîrongo îtaano na kenda cia magana jathatû (59,300).

¹⁴Antû ba mwîrîga jwa Gadi nîbo bakaamba maema jaao bathingateene na mwîrîga jwa Simioni. Mûtongeeria waao akeethîrwa arî Eliasafu mûtaana wa Reueli

¹⁵Njûûrî îrîa akeethîrwa atongeeretie nî ya antû ngiri mîrongo îna na ithaano cia magana jatantatû ja mîrongo îtaano (45,650).

¹⁶Antû bonthe ba mîîrîga îrîa îkeethîrwa yaambîte maema jaao arîa gûkethagîrwa kûrî na rwano rwa mwîrîga jwa Rubeni nî antû ngiri îgana rîa mîrongo îtaano na îmwe cia magana jana ja mîrongo îtaano (151,450). Nîbo bageetaga barî gîkundi kîa biîrî.

¹⁷“Rîu nîrîo îema rîa gûtirimanîra na kambî ya Alawi îkambûragwa. Nabo Alawi bageetaga bakamatîte îema rîa gûtirimanîra, barî gatîgatî ga ikundi bio bina. O gîkundi gîgeetaga kîrî arîa rwano rwaakîo rûrî.

¹⁸“Antû ba mwîrîga jwa Efuraimu nîbo bakaamba kambî yaao rûteere rwa bwa rûgûrû, rwa îema rîa gûtirimanîra, arîa gûkethagîrwa kûrî na rwano rwaao. Nabo bagatongagîîrua nî Elishama mûtaana wa Amihudi.

¹⁹Njûûrî îrîa akeethîrwa atongeeretie nî ya antû ngiri mîrongo îna cia magana jataano (40,500).

²⁰Antû ba mwîrîga jwa Manase nîbo bakaamba maema jaao bathingateene na mwîrîga jwa Efuraimu. Mûtongeeria waao akeethîrwa arî Gamalieli mûtaana wa Pedazuri.

²¹Njûûrî îrîa akeethîrwa atongeeretie nî ya antû ngiri mîrongo îthatû na ijîîrî cia magana jaîrî (32,200).

²²Antû ba mwîrîga jwa Benjamini nîbo bakaamba maema jaao bathingateene na mwîrîga jwa Manase. Mûtongeeria waao akeethîrwa arî Abidani mûtaana wa Gedioni.

²³Njûûrî îrîa akeethîrwa atongeeretie nî ya antû ngiri mîrongo îthatû na ithaano cia magana jana (35,400).

²⁴Antû bonthe ba mîîrîga îrîa îkeethagîrwa yambîte maema jaao arîa gûkethagîrwa kûrî na rwano rwa mwîrîga jwa Efuraimu nî antû ngiri îgana rîa inyanya cia îgana rîmwe (108,100). Nabo nîbo bageeta barî gîkundi kîa bithatû.

²⁵“Antû ba mwîrîga jwa Dani nîbo bakaamba kambî yaao rûteere rwa bwa ûrîo rwa îema rîa gûtirimanîra, arîa gûkethagîrwa kûrî na rwano rwaao. Nabo bagatongagîîrua nî Ahiezeri mûtaana wa Amishadai.

²⁶Njûûrî îrîa akeethîrwa atongeeretie nî ya antû ngiri mîrongo îtaantatû na ijîîrî cia magana mûgwanja (62,700).

²⁷Antû ba mwîrîga jwa Asheri nîbo bakaamba maema jaao bathingateene na mwîrîga jwa Dani. Mûtongeeria waao akeethîrwa arî Pagieli mûtaana wa Okirani.

²⁸Njûûrî îrîa akeethîrwa atongeeretie nî ya antû ngiri mîrongo îna na îmwe cia magana jataano (41,500).

²⁹Antû ba mwîrîga jwa Nafutali nîbo bakaamba maema jaao bathingateene na mwîrîga jwa Asheri. Mûtongeeria waao akeethîrwa arî Ahira mûtaana wa Enani.

³⁰Njûûrî îrîa akeethîrwa atongeeretie nî ya antû ngiri mîrongo îtaano na ithatû cia magana jana (53,400).

³¹Antû bonthe ba mîîrîga îrîa îkethagîrwa yaambîte maema jaao arîa gûkethagîrwa kûrî na rwano rwa mwîrîga jwa Dani nî antû ngiri îgana rîa mîrongo îtaano na mûgwanja cia magana jatantatû (157,600). Nabo bau nîbo bageetaga barî ba mûthia.

³²“Bau nîbo antû ba Israeli barîa bonthe baarî kambîîne, barîa baatari kûringana na mîîrîga yaao. Nabo baarî arûme ngiri magana jatantatû ja ithatû, cia magana jataano ja mîrongo îtaano (603,550). Nabo baabaangi kûringana na ikundi bia gwîta ndweene.

³³Îndî Alawi baatátaranîîrue amwe na antû bangî ba Israeli o ta ûrîa MWATHANI eerîte Musa.”

³⁴Ûu nîu antû ba Israeli baathithîrie kûringana na mantû jarîa jonthe MWATHANI eerîte Musa. Nabo nî baambîre kambî ciaao arîa rwano rwa mwîrîga jwaao na mûciî jwaao rwaarî. Ûu nîu beetaga barî rûgendoone.