Read KIMERU BIBLE PROTESTANT EDITION Gût 20 Bible Online

Gût 20 - KIMERU BIBLE PROTESTANT EDITION bible

Gût 20

¹Nakîo kîûthûrano kîonthe kîa antû ba Israeli nî gîaakinyîre rwanda rwa Zini kûrî mweriine jwa mbere, kîraamba kambî Kadeshi. Au nîo Miriamu aakuîrîîre arathikwa.

² Naku gûtaarî na rûûjî rwa kûnyuuwa nî kîûthûrano gîa antû. Nakîo kîrîndî kîroothûrana kîranung'unîra Musa na Aaroni.

³Kîrîndî kîratetia Musa gîkîmwîraga atîrî, “Nî kaaba tûrîngî gûkujanîria na antû bangî ba Israeli rîrîa baakuîrîîre mbere ya îema rîa MWATHANI!

⁴Nîkî ûntû ûreekeete tuî antû ba MWATHANI, tûkuîra gûkû rwanda, tûkua na kinya ndîîthia cieetû ikua?

⁵Nîmbi yaatûmîre ûtûrita nthîgûrûûne ya Misri ûtûreeta gûntû gûkûthûûku ûjû. Gûntû gûtî na irio, kana nkûû, kana nzabibû, kana nkukumanga. Ningî gûtî na kinya rûûjî rwa kûnyua.”

⁶Musa na Aaroni barauma kîrî kîrîndî bareeta mwariine jwa îema rîa gûtirimanîra, baraturia maru bareenamîîria, baratiirithia moothiû nthî. Nabu weerû bwa ûkumio bwa MWATHANI bûroonekana.

⁷MWATHANI nî aarîîrie Musa aramwîra atîrî,

⁸“Jûkia rûturo, naagwe bûrî na Aaroni bûûthûranie kîrîndî. Ûcoke waarîrie iiga bûrî au mbere ya kîûthûrano, narîo iiga riume rûûjî. Tontû bûû, ûgaatûma iiga riume rûûjî rwa kûnyuuwa nî antû na ndîîthia ciaao.”

⁹Musa arajûkia rûturo rûrîa rwaarî mbere ya MWATHANI o ta ûrîa MWATHANI aamwîrîte.

¹⁰Musa na Aaroni nabo baroothûrania kîrîndî mbere ya iiga. Musa arabeera atîrî, “Nthikîîreeni buî ndemi. No mwanka tûtûme rûûjî ruume iigeene rîrî?”

¹¹Musa arookîîria rûturo, araringa iiga maringa jaîrî. Naru rûûjî rûrwingî rûrauma ku rûranyuuwa nî kîûthûrano gîa antû amwe na ndîîthia ciaao.

¹²MWATHANI araarîria Musa na Aaroni arabeera atîrî, “Nîkwîthîrwa bûtîrambîtîkîrie bwonania inya yaakwa întheru kîrî antû ba Israeli. Tontû bûû, bûtîbatongeeria bûbaikia nthîgûrûûne îrîa mbaeete.”

¹³Antû au rûûjî rûu rwaumîre gwetîrwe Meriba nîûntû nîo antû ba Israeli baanung'unîîre MWATHANI, nawe MWATHANI nî aaboonerie atî nî ûmûtheru.

¹⁴Musa arî kûu Kadeshi, nî aatûmanîre kîrî mûnene wa Edomu eerwa atîrî, “Mûnene nî wiijî ûrîa tuî Aisraeli, antû ba ndûgû cieenu tûrîte thîîna.

¹⁵Nî wiijî ûrîa biûjûjû bieetû bieetîre Misri na baratûûra ku îgiita rîrîraaja. Nabo antû ba Misri baratûthithîria mantû jamathûûku amwe na biûjûjû bieetû.

¹⁶Naatuî rîrîa twarîrîîre MWATHANI, nî aaigîrue kîrîro gîeetû aratûma mûraîka aratûrita Misri. Nandî tûrî aja Kadeshi, ntûûra îrî mwankeene jwa nthîgûrû yaaku.

¹⁷Ndakwerenca ûtwîtîkîîrie tûkûrûkîîre nthîgûrû yaaku. Naatuî tûtîîtîîra miuundeene yeenu, kana miuundeene yeenu ya mîzabibû, na tûtînyua rûûjî rwa ithima bieenu. Tûgeetîîra njîreene îrîa mbariî na tûtîaûkîra no kû mwanka tûkûrûke mîanka ya nthîgûrû yeenu.”

¹⁸Îndî mûnene wa Edomu aramûcokeria atîrî, “Bûgákûrûkîîra nthîgûrûûne yaakwa, nîûntû bwathithia ûu nkabwithûkîra mbîje ndwee naabuî.”

¹⁹Îndî antû ba Israeli baramwîra atîrî, “Tûgeetîîra njîreene akî. Ningî tuî na ndîîthia cieetû tûkëeja gûkuunda rûûjî rwa ithima biaaku, tûgakûrîa ru. Nî gwîtîîra tûgeetîîra njîreene na magûrû akî na gûtî ûntû bûngî tûkaathithia.”

²⁰Mûnene wa Edomu arabacokeria atîrî, “Ntîbwîtîkîîria bûkûrûkîîra nthîgûrûûne.” Nabo Aedomu babaingî barauma barî njûûrî îrî na inya mono bareeta kwithûkîra Aisraeli.

²¹Tontû bûû, antû ba Edomu bararegeera antû ba Israeli beetîîra nthîgûrûûne ya Edomu. Nabo antû ba Israeli baragarûka bareeta na njîra îngî.

²²Nakîo kîûthûrano kîonthe kîa antû ba Israeli, nî gîeetîre rûgendo kuuma Kadeshi mwanka kîrakinya kîrîmeene kîa Hori.

²³MWATHANI nî aarîîrie Musa na Aaroni au kîrîmeene kîa Hori, kîrîa kîrî akuî na mwanka jwa nthîgûrû ya Edomu, arabeera atîrî,

²⁴“Aaroni agûkinyia rîa gûkua. Nîkwîthîrwa atîtonya nthîgûrû îrîa mpeete antû ba Israeli nîûntû nî bwaaregere kûmbathîkîra bûrî kûrîa rûûjîîne rwa Meriba.

²⁵Îtania na Aaroni na mûtaana waawe Eleazari kîrîmeene kîa Hori.

²⁶Rîu ûrite Aaroni nguû, wîkîre mûtaana waawe cio. Aaroni agaakuîra kûu.”

²⁷Musa arathithia o ta ûrîa MWATHANI aamwîrîte. Baraitia kîrîmeene kîa Hori, kîûthûrano gîa antû kîonthe gîtegeete.

²⁸ Barî nao, Musa ararita Aaroni nguû, areekîra Eleazari mûtaana wa Aaroni nguû iu. Aaroni arakuîra kîrîmeene îgûrû. Musa na Eleazari bareenama barauma kîrîmeene.

²⁹Nakîo kîûthûrano kîonthe gîa antû ba Israeli gîkûmenya atî Aaroni agûkua, kîraithikîîra nîûntû bwa Aaroni ntukû mîrongo îthatû.