Read KIMERU BIBLE PROTESTANT EDITION Gût 21 Bible Online

Gût 21 - KIMERU BIBLE PROTESTANT EDITION bible

Gût 21

¹ Mûnene wa Aradi ûrîa Mûkanaani, ûrîa waatûûraga rûteere rwa bwa ûmotho rwa Kanaani, rîrîa aigîrue Israeli nî îîtîrîte njîreene ya Atharimu, nî aaithûkîîre Aisraeli, arataa bamwe baao.

²Nîrîo Aisraeli baaciîtîrie mûciîtio kîrî MWATHANI baramwîra atîrî, “Ûkëeja gûtûma tûkoomba antû baba ndweene, nî mma tûkaathiria ntûûra ciaao buru.”

³MWATHANI araigua mûciîtio jwa antû ba Israeli aranenkanîra Akanaani kîrî bo. Nabo Aisraeli barabathiria buru na barathiria ntûûra ciaao. Naku antû au kûreetwa Horima.[4]

⁴ Nabo antû ba Israeli nî beetîre rûgendo kuuma kîrîmeene kîa Hori bareetîîra njîra îrîa yeetagîîra akuî na Îria Îtuune nîkenda bathiûrûka, beebera nthîgûrû ya Edomu. Îndî antû baranoga barî rûgendoone,

⁵ baranung'unîra Mûrungu amwe na Musa. Barauga atîrî, “Nîkî ûntû bwatûritîre nthîgûrûûne ya Misri, kana nîkenda twîja gûkuîra gûkû rwanda? Nîkwîthîrwa gûtî na irio na gûtî na kinya rûûjî. Tûtîkwenda biakûrîa bibi nî bibithûûku.”

⁶MWATHANI aratûma njoka inthûûku kîrî antû ba Israeli, nacio irarûmanga antû na babaingî baao barakua.

⁷Nîrîo antû beetîre kîrî Musa baramwîra atîrî, “Tuî nî twîîtie, tontû nî tûkûnung'unîrîte na twanung'unîra MWATHANI. Romba MWATHANI atwîngîre njoka ciume akuî naatuî.” Musa ararombera antû.

⁸MWATHANI areera Musa atîrî, “Thithia njoka ûmîcuuracuurie gîtugîîne. Naku gûgakara atîrî, o muntû ûrîa ûkaarûmwa nî njoka, araithîîria njoka îîu îcuuracuurîîtue atîkua.”

⁹ Tontû bûû, Musa arathithia njoka ya îturutia, na aramîcuuracuuria gîtugîîne. Naku nî gwakarîre atîrî, muntû wonthe ûrîa waarûmagwa nî njoka, araithîîria njoka îîu ya îturutia aataakujaga.

¹⁰Nabo antû ba Israeli nî beetîre na mbere na rûgendo baraamba kambî Obothi.

¹¹Ningî barauma Obothi bareeta baraamba kambî rwanda antû gwetagwa Iyeabarimu îrîa îrî rwanda yerekeene na nthîgûrû ya Moabu, bwa gaiti.

¹²Kuuma au bareeta baraamba kambî kîguuruune kîa Zaredi.

¹³Kuuma au bareeta baraamba kambî rûteere rûrîa rûngî rwa ûrîo bwa mûuro jwa Arinoni îrîa îrî rwanda rûrîa rûkinyîte mwankeene jwa nthîgûrû ya Moabu na ya Amori.

¹⁴Kîu nîkîo gîtûmi kuugi Yukuune rîa ndwaa cia MWATHANI, “Ntûûra ya Wahebu rûteereene rwa Sufa, na kîguuru kîa Arinoni,

¹⁵na mûgwanthî jwa iguuru biu juumîte ntûûra ya Ari jûgeeta mwanka mwankeene jwa Moabu.”

¹⁶Kuuma au bareeta mwanka Beeri nakîo nî kîthima kîrîa MWATHANI eerîte Musa bwaakîo atîrî, “Ûthûrania antû naani nkaabakuundia rûûjî.”

¹⁷Nîrîo Israeli yaainîre rwîmbo rûrû: “Therûka rûûjî gwe kîthima! Naabuî kiinîreeni!

¹⁸Kîthima nîkîo kîenjîîtwe nî anene ningî nî kîenjîrwe nî atongeeria ba antû barakîînja bagîtumagîra nturo ciaao cia ûnene na mîreegi yaao.” Kuuma kûu rwanda bareeta antû gweetagwa Matana.

¹⁹Kuuma Matana bareeta Nahalieli, na kuuma Nahalieli bareeta Bamothi.

²⁰Kuuma Bamothi bareeta kîguuruune kîrîa kîrî nthîgûrûûne ya Moabu, kîrîa kîrî ruungu rwa kîrîma kîa Pisiga kîrîa kîerekeene na rwanda.

²¹Nabo antû ba Israeli nî baatûmanîre kîrî Sihoni, mûnene wa Aamori barauga atîrî,

²²“Îtîkîîria tûkûrûkîîre nthîgûrûûne yaaku. Tûtîaûkîra mîundeene yeenu, kana miuundeene yeenu ya mîzabibû. Ningî tûtînyua rûûjî rwa ithima bieenu. Tûgeetîîra akî njîreene îrîa mbariî mwanka tûgiitanie nthîgûrû yeenu buru.”

²³Îndî mûnene Sihoni ateetîkîrîrîîrie Israeli îkûrûkîîra nthîgûrûûne yaawe. Nî oothûranîrie antû baawe bonthe bareeta ndweene na Israeli rwanda, arakinya Jahazi araithûkîra Israeli.

²⁴Îndî antû ba Israeli barooraga njûûrî ya Amori mono. Barabatuunya nthîgûrû kuuma mûuro jwa Arinoni mwanka jwa Jaboki, mwanka gûkinya nthîgûrûûne ya antû ba Amoni. Nîkwîthîrwa mwanka jwa Amoni nî jwaakarîtue mono.

²⁵Tontû bûû, antû ba Israeli barataa ntûûra cionthe cia Aamori na kinya Heshiboni na tûtûûra tûrîa tûmîthiûrûkîrîte.

²⁶Heshiboni yaarî ntûûra ya mûnene Sihoni wa Aamori. Sihoni nî aarî akûrwaa na mûnene ûrîa waathaga Moabu mbereene, aramûûmba na arataa nthîgûrû yaawe yonthe mwanka mûuro jwa Arinoni.

²⁷Kîu nîkîo gîtûmi mwini ainîre arauga: “Njûûni Heshiboni bûmîake ntûûra ya mûnene Sihoni nî yaakwe kaîrî.

²⁸ Nîkwîthîrwa njûûrî nî yaumîre îkari ta mwanki ntûûreene ya Heshiboni, îrauma ntûûreene ya mûnene Sihoni îrathiria ntûûra ya Moabu. Îrathetheranga antû barîa baatûûraga tûrîmeene twa Arinoni.

²⁹Wûi kîrî gwe Moabu! Bûkûthira buî antû barîa bathaathayia mûrungu jwa mûng'uanano jwa Kemoshi Nî jûtûmîte arûme baaju batawa, na kinya aka baaju batawa nî Sihoni mûnene wa Aamori.

³⁰Nchiarwa ciaao îrathirua kuuma ntûûreene ya Heshiboni mwanka ya Diboni. Naatuî tûrabatûgûta kuuma ntûûreene ya Nofa mwanka ya Medeba.”

³¹Tontû bûû, antû ba Israeli nî baatûûrîre nthîgûrû ya Aamori.

³²Ningî Musa nî aatûmîre achûnkûûni ntûûreene ya Jazeri. Rîu njûûrî ya Aisraeli baramiithûkîra, baramîtaa amwe na tûtûûra tûrîa twamîthiûrûkîrîte, na barataa into bia Aamori barîa baatûûraga ku.

³³Rîu Aisraeli baragarûka bareeta na njîra îrîa yeetaga bwa nthîgûrû ya Bashani. Mûnene wa Bashani tawe Ogi nî aaumagarîre arî na njûûrî yonthe yaawe areeta kwithûkîra Aisraeli kûu ntûûreene ya Edirei.

³⁴Îndî MWATHANI nî eerîre Musa atîrî, “Bûkaamûkîreni. Nîkwîthîrwa nî mûnenkanîrîte amwe na antû baawe bonthe nthîgûrû yaawe. Naabuî bûmûthithîrie o ta ûrîa bwathithîîrie Sihoni mûnene wa Aamori ûrîa waatûûraga ntûûreene ya Heshiboni.”

³⁵Tontû bûû, baramûûraga. Ningî barooraga ataana baawe, antû ba ntûûra yaawe bonthe mwanka kûreethîrwa gûtî we watigara. Nabo Aisraeli barataa nthîgûrû yaawe îraa yaao.