Read KIMERU BIBLE PROTESTANT EDITION Gût 25 Bible Online

Gût 25 - KIMERU BIBLE PROTESTANT EDITION bible

Gût 25

¹Rîrîa antû ba Israeli baambîte kambî kîguuruune kîa mîgaa, arûme baao nî baambîrîîrie kûmaramara na aka ba Moabu.

²Nabo aka bau bareetaga antû ba Israeli baritîra mîrungu ya Moabu ya mîng'uanano igongwana. Nabo antû ba Israeli bararîa nyama cia igongwana biu na barathaathayia mîrungu îîu ya mîng'uanano.

³Tontû bûû, antû ba Israeli barathaathaîria mûrungu jwa mûng'uanano jûrîa jweetagwa Baali, au Peori. MWATHANI araakana nî mûthûûro mono nîûntû bwaao.

⁴MWATHANI areera Musa atîrî, “Ûraga atongeeria bonthe antû bategeete. Ûbooragîre au mbere yaakwa. Kwombîka noo ngatiga kûthûûra nîûntû bwa antû ba Israeli.”

⁵Musa areera agambi ba Israeli atîrî, “O ûmwe weenu nî oorage muntû wonthe wa mwîrîga jwaawe ûrîa ûrathaathaîrie Baali kûu Peori.”

⁶Kûrakara atîrî, muntû ûmwe wa antû ba Israeli nî aareetere mûka Mûmidiani nja yaawe Musa na kîûthûrano kîonthe kîa Israeli gîtegeete. Kîrîndî kîarîragîra au mwariine jwa îema rîa gûtirimanîra.

⁷Fineasi aarî mûtaana wa Eleazari. Eleazari aarî mûtaana wa Aaroni mûthînjîri-Mûrungu. Rîrîa Fineasi oonere mantû jau nî aaumîre au kîûthûrano kîaarî arî na îtumo.

⁸Aratonya îemeene rîa muntû ûu wa Israeli. Fineasi aramuunta ntomûrûme ûu na îtumo rîratûrîkania rîramuunta mûka ûu. Tontû bûû, mîrimo îrîa yaarî îkûgwata antû ba Israeli îrathira.

⁹Nabo antû barîa booragîrwe nî mîrimo îîu baarî antû ngiri mîrongo îîrî na inya (24,000).

¹⁰MWATHANI nî aarîîrie Musa aramwîra atîrî,

¹¹“Fineasi mûtaana wa Eleazari agûtûma mûthûûro jwaakwa jûrîa ndî naju nîûntû bwa antû ba Israeli jwathira. Nîwe ûrî na mûthûûro ta jwaakwa gatîgatîîne ka antû ba Israeli. Kîu nîkîo gîtûmi ntigîte kûbathiria na mûthûûro.

¹²Tontû bûû, rî, mwîre atîrî, ‘Ngwîka kîrîkanîro kîa thîîrî nawe.

¹³Nakîo kîrîkanîro kîu nî kîa kûmweethia mûthînjîri-Mûrungu amwe na nchiarwa ciaawe. Nîkwîthîrwa wîru bwaawe bwa gûkumia Mûrungu nî bûtûmîte athirîria antû ba Israeli meeyia jaao.’”

¹⁴Muntû ûu wa Israeli wooraganîîrue na mûka Mûmidiani eetagwa Zimuri mûtaana wa Salu. Zimuri nîwe waarî mûtongeeria wa nja yaawe, na aarî wa mwîrîga jwa Simioni.

¹⁵Mûka ûu Mûmidiani wooragîrwe eetagwa Kozibi mwarî wa Zuri. Zuri aarî mûtongeeria wa mîîrîga nthîgûrûûne ya Midiani.

¹⁶MWATHANI nî aarîîrie Musa aramwîra atîrî,

¹⁷Ithûkîra Amidiani ûbathirie buru.

¹⁸Nîkwîthîrwa kinya bo nî baabûthangîkîrie na moothûûku na barabwaîria rîrîa bwaarî kûu Peori. Ningî nîûntû bwa Kozibi mwarî wa mûtongeeria wa mwîrîga jûmwe jwaao, ûrîa wooragîrwe rîrîa antû ba Israeli baagwati nî mîrimo kûu Peori.