Read KIMERU BIBLE PROTESTANT EDITION Gût 28 Bible Online

Gût 28 - KIMERU BIBLE PROTESTANT EDITION bible

Gût 28

¹MWATHANI nî aarîîrie Musa aramwîra atîrî,

²“Îîra antû ba Israeli: banditagîre kîgongwana gîa gwakîîria magiita jarîa jaagîrîte kîrî biakûrîa biaakwa. Nakîo gîkethagîrwa kîrî na yeera rîrîega.

³Ningî ûbeere banditagîre tûtûrûme twîrî twa mwaka jûmwe, na tûtî na antû aathûûku, tûrî kîgongwana gîa gwakîîria kîrîa kîritagwa ntukû cionthe.

⁴Muntû aritage gatûrûme kamwe rûkîîrî kangî ûgoro.

⁵Ningî baritage kilo îmwe ya mûtu jûmwinyu buru juunganîtue na lita îmwe ya maguta ja nzeituni birî kîgongwana kîa irio.

⁶Kîu nî kîgongwana gîa gwakîîria kîrîa kîbuîrîte kûritagwa ntukû cionthe. Nakîo nî kîgongwana kîrîa kîrî yeera rîrîega kîrî ni MWATHANI. Kîgongwana kîu nîkîo ndaugîre kîritagwe rîrîa bwaarî kîrîmeene kîa Sinai.

⁷Gatûrûme kamwe gakaritagwa karî kîgongwana amwe na lita îmwe ya ndibei. Ndibei îîu îîtûragîrue au mbere yaakwa kîritîroone kîa igongwana.

⁸Gatûrûme kau kangî karitagwe ûgoro karî kîgongwana, o ta kîgongwana kîa irio kîa rûkîîrî na gîa gwîtûûrîria biritagwa. Bûritage kîgongwana gîa gwakîîria kîrîa kîrî yeera rîrîega kîrî ni MWATHANI.”

⁹Ningî MWATHANI nî aaugîre atîrî, “Ntukû ya sabatû yakinya bûritage tûtûrûme twîrî twa mwaka jûmwe na tûtî na antû aathûûku. Ningî bûritage kilo ijîîrî cia mûtu jûmwinyu juungeenue na maguta ja nzeituni birî kîgongwana kîa irio na kîa gwîtûûrîria.

¹⁰Kîu nîkîo kîgongwana gîa gwakîîria kîrîa kîritagwa ntukû cia sabatû cionthe, o amwe na igongwana bia gwakîîria na bia gwîtûûrîria birîa biritagwa ntukû cionthe.”

¹¹Ningî MWATHANI nî aaugîre atîrî, “Kûrî ntukû ya mbere ya mweri bûnditagîre kîgongwana tûreegwa twîrî, na ntûrûme îmwe, na tûtûrûme mûgwanja twa mwaka jûmwe tûtî na antû athûûku birî kîgongwana gîa gwakîîria.

¹²Bûkîrita o ndeegwa îrî kîgongwana bûmîritanagîrie na mûtu jûmwinyu kilo ithatû juungeenue na maguta birî kîgongwana kîa irio. Ningî bûkîrita o ntûrûme îrî kîgongwana, bûmîritanagîrie na kilo ijîîrî cia mûtu jûmwinyu juunganîtue na maguta.

¹³Ningî o gatûrûme karitanagîrue na kilo îmwe ya mûtu jûmwinyu buru juunganîtue na maguta, birî kîgongwana kîa irio gîa gwakîîria. Nabio bikethagîrwa birî na yeera rîrîega kîrî ni MWATHANI.

¹⁴O ndeegwa nî îritanagîrue na lita ijîîrî cia ndibei. O ntûrûme nî îritanagîrue na lita îmwe na nusu ya ndibei. Ningî o gatûrûme nî karitanagîrue na lita îmwe ya ndibei. Kîu nî kîgongwana gîa gwakîîria kîritanîrîîtue na kîgongwana gîa gwîtûûrîria. Kîgongwana kîu kîritagwe o rîmwe mweri, mwaka junthe.

¹⁵Ningî bûkînditîra igongwana bia gwakîîria na bia gwîtûûrîria, birîa biritagwa ntukû cionthe, bûritage nthenge îrî ya kîgongwana gîa kûthiria meeyia.”

¹⁶ MWATHANI nî eetîre na mbere kuuga atîrî, “Kûrî ntukû ya îkûmi na inya ya mweri jwa mbere nîrîo mambura ja Pasaka yaakwa ni MWATHANI jakambagîîria.

¹⁷ Nayo ntukû ya îkûmi na ithaano ya mweri jûu nîrîo bûkaambagîîria mambura ja mîgaate îtiimbithîtue. Mîgaate îtiimbithîtue îrîîwe ntukû mûgwanja.

¹⁸Ntukû ya mbere ya mambura jau îkethagîrwa îrî ya kûthaathayia Mûrungu na gûtî ngûgî îbuîrîte kûritagwa.

¹⁹Îndî bûnditagîre kîgongwana gîa gwakîîria nakîo nî: tûregwa twîrî, na ntûrûme îmwe, na tûtûrûme mûgwanja twa mwaka jûmwe, na no mwanka twîthîrwe tûtî na antû athûûku noo amwe.

²⁰Ningî bûritage kîgongwana kîu kîa irio kîa mûtu jûmwinyu juunganîtue na maguta: bûkaritanagîria kîgongwana kîa ndeegwa amwe na kilo ithatû cia mûtu jûmwinyu na bûritanagîrie ntûrûme îmwe amwe na kilo ijîîrî cia mûtu jûmwinyu.

²¹Gatûrûme kamwe ka tûu mûgwanja karitanagîrue amwe na kilo îmwe ya mûtu jûmwinyu buru.

²²Ningî bûritage nthenge îrî kîgongwana kîa kûthiria meeyia nîkenda bûthirîrua meeyia.

²³Naabuî bûkaaritaga igongwana biu o amwe na igongwana birîa bingî bia gwakîîria biritagwa o rûkîîrî o rûkîîrî.

²⁴Bûthithagie o ûu bûkanditîra kîgongwana gîa gwakîîria kîrîa kîrî yeera rîrîega ntukû mûgwanja. Igongwana biu biritagwe o amwe na igongwana birîa biritagwa o rûkîîrî o rûkîîrî birî igongwana bia gwakîîria na bia gwîîtûûrîria.

²⁵Nayo ntukû ya mûgwanja yakinya bûûthûranage nîkenda bûnthaathayia na bûkáritaga ngûgî no îrîkû.”

²⁶ MWATHANI nî aarîîrie arauga atîrî, “Ntukû ya mbere îrîa bûkaambagîîria gûketha, bûnditagîre ni MWATHANI kîgongwana kîa irio biu bikethi. Bûûthûranage biumiene biu bia mambura ja maketha nîkenda bûnthaathayia. Ntukû îîu bûkáritaga ngûgî.

²⁷Ningî bûnditagîre ndeegwa ijîîrî na ntûrûme na tûtûrûme mûgwanja twa mwaka jûmwe birî kîgongwana gîa gwakîîria kîrîa kîrî yeera rîrîega kîrî ni MWATHANI.

²⁸Bûcoke bûritage mûtu jûmwinyu juunganîtue na maguta birî kîgongwana kîa irio. O ndeegwa îritanagîrue na kilo ithatû cia mûtu jûmwinyu, na o ntûrûme îritanagîrue na kilo ijîîrî cia mûtu jûmwinyu.

²⁹O gatûrûme karitanagîrue na kilo îmwe ya mûtu jûmwinyu buru.

³⁰Ningî bûritage nthenge îrî ya kîgongwana gîa kûthiria meeyia jeenu.

³¹Ningî bûritage kîgongwana gîa gwakîîria kîrîa kîritagwa ntukû cionthe. Nyomoo ya kîgongwana kîu îîthîrwe îtî na antû athûûku noo amwe. Kîgongwana kîu kîritanagîrue na kîgongwana kîa irio, na gîa gwîtûûrîria.”