Read KIMERU BIBLE PROTESTANT EDITION Gût 3 Bible Online

Gût 3 - KIMERU BIBLE PROTESTANT EDITION bible

Gût 3

¹Rîrîa MWATHANI aarîîrie Musa, arî kîrîmeene gîa Sinai, Aaroni aarî na ataana baba:

² Nadabu ûrîa waarî mwana wa kîranga, na Abihu, na Eleazari na Ithamari.

³Jau nîjo mariîtwa ja ataana ba Aaroni, barîa baathuuri baraathûrwa na njîra ya gwîtûûrîrua maguta, baraa athînjîri-Mûrungu.

⁴ Îndî Nadabu na Abihu nî baakuîrîîre au mbere ya MWATHANI rîrîa baatumagîra mwanki jûtîtheretue barî rwanda rwa Sinai. Nabo bataarî na aana. Tontû bûû, Eleazari na Ithamari nîbo baatumîkagîra barî athînjîri-Mûrungu îgiita rîonthe rîrîa îthe Aaroni aarî mwoyo.

⁵MWATHANI nî aarîîrie Musa aramwîra atîrî,

⁶“Thuranîra antû ba mwîrîga jwa Lawi, ûbathuure nîkenda batumîkagîra mûthînjîri-Mûrungu tawe Aaroni.

⁷Nîbo bagaatumîkagîra îemeene rîa gûtirimanîra bakîritaga ngûgî irîa ibuîrîte kûritwa nî Aaroni na irîa ibuîrîte kûritwa nî kîûthûrano kionthe kîa antû ba Israeli.

⁸Nîbo bakamenyagîîra into bionthe bia îema rîa gûtirimanîra na baritage ngûgî irîa ibuîrîte kûritagwa nî antû ba Israeli îemeene rîa gûtirimanîra.

⁹Alawi baeejani kîrî Aaroni na ataana baawe kuuma kîrî antû ba Israeli nîkenda babatumîkagîra.

¹⁰Aaroni na ataana baawe nîbo ûkathuura bae athînjîri-Mûrungu. Îndî muntû ûngî akëeja kûrita ngûgî îrîa îrî yaao no mwanka ooragwe.”

¹¹Ningî MWATHANI nî aarîîrie Musa aramwîra atîrî,

¹²“Nî ndathuurîre iranga bia antû ba Israeli biaa biaakwa, îndî nandî nkûthuura Alawi antûûne a iranga biu. Tontû bûû, Alawi bagatûûra barî baakwa.

¹³ Nîkwîthîrwa aana bonthe ba kîranga nî baakwa. Kuuma ntukû îrîa ndooragîre aana ba kîranga bonthe nthîgûrûûne ya Misri nîrîo ndaathûrîre marikithathi jonthe ja antû, na ja nyomoo cia antû ba Israeli jaraa jaakwa. Ni nî ni MWATHANI.”

¹⁴MWATHANI nî aarîîrie Musa arî rwanda rwa Sinai, aramwîra atîrî,

¹⁵“Tara nchiarwa cia Lawi kûringana na mîciî yaao na kûringana na mîîrîga yaao ûtare arûme bonthe; kuuma tûîjî twa mweri jûmwe na nkûrûki.”

¹⁶Tontû bûû, Musa arabatara o ta ûrîa MWATHANI aamwîrîte.

¹⁷Nabo ataana ba Lawi baarî Gerishoni, na Kohathi na Merari.

¹⁸Ataana ba Gerishoni nî Libini na Shimei. Najo mariîtwa jaao nîjo jaaere mariîtwa ja mîîrîga yaao.

¹⁹Ataana ba Kohathi baarî Amuramu, na Izihari, na Heburoni, na Uzieli. Najo mariîtwa jaao nîjo jaaere mariîtwa ja mîîrîga yaao.

²⁰Ataana ba Merari baarî Mahili na Mushi. Mariîtwa jaao nîjo jaaere mariîtwa ja mîîrîga yaao. Îîu nîyo mîciî ya Alawi kûringana na mîîrîga yaao.

²¹Antû ba mûciî jwa Libini na jwa Shimei baarî ba mwîrîga jwa Gerishoni.

²²Arûme bonthe ba mwîrîga jwa Gerishoni, kuuma tûîjî twa mweri jûmwe na nkûrûki, baarî ngiri mûgwanja cia magana jataano (7,500).

²³Nchiarwa cia Gerishoni ciaambaga kambî, nyuma ya îema rîa gûtirimanîra, bwa rûgûrû.

²⁴Mûtongeeria wa nchiarwa iu cia Gerishoni aarî Eliasafu mûtaana wa Laeli.

²⁵Ngûgî ya nchiarwa cia Gerishoni yaarî ya kûmenyagîîra îema rîa gûtirimanîra rîongwa, na kûmenyagîîra îema rîrîa rîaarîkunîkîte, na kûmenyagîîra itaambaa birîa biacuuragua mwariine.

²⁶Ningî nîbo baarî ba kûmenyagîîra itaambaa birîa biaacuurîîtue kîaragoone kûthiûrûkîra îema rîa gûtirimanîra na kîritîro kîa igongwana. Nîbo baamenyagîîra mîrigi îrîa yaacuuragia itambaa biu, na into birîa biaatumagîrwa amwe na into biu.

²⁷Antû ba mîciî ya Amuramu, na Izahari, na Heburoni, na Uzieli, baarî ba mwîrîga jwa Kohathi.

²⁸Arûme bonthe ba mwîrîga jwa Kohathi kuuma tûîjî twa mweri jûmwe na nkûrûki baarî ngiri inyaanya cia magana jatantatû (8,600), barîa baatumîkagîra antû arîa atheru.

²⁹Nchiarwa cia Kohathi ciaambaga kambî yaao nyuma ya îema rîa gûtirimanîra bwa ûmotho.

³⁰Mûtongeeria wa nchiarwa iu cia Kohathi aarî Elizafani mûtaana wa Uzieli.

³¹Nabo antû ba mwîrîga jwa Kohathi nîbo baamenyagîîra Îthandûkû rîa kîrîkanîro na meetha îrîa yaarîkagîîrwa mîgaate îmîtheru, na gîtugî kîrîa kîaarîkagîîrwa taawa, na iritîro bia igongwana, na into birîa biaatumagîrwa îemeene rîa gûtirimanîra nî athînjîri-Mûrungu, na itaambaa, na into bingî birîa biaatumagîrwa amwe na biu.

³²Alawi baarûngamîîri nî Eleazari mûtaana wa Aaroni ûrîa waarî mûthînjîri-Mûrungu. Ningî nîwe waarûngamagîîra antû arîa atheru.

³³Antû ba mîciî ya Amahali na Amushi, baarî ba mwîrîga jwa Merari.

³⁴Arûme bonthe ba mwîrîga jwa Merari, kuuma tûîjî twa mweri jûmwe na nkûrûki, baarî ngiri ithanthatû cia magana jaîrî (6,200).

³⁵Mûtongeeria wa nchiarwa iu cia Merari aarî Zurieli mûtaana wa Abihaili. Nabo baambaga kambî yaao bwa ûrîo bwa îema rîa gûtirimanîra.

³⁶Ngûgî ya nchiarwa cia Merari yaarî ya kûmenyagîîra mîînjîro ya îema rîa gûtirimanîra, na mîgaamba yaarîo, na itugî biaarîo, na ikinyithio biaarîo, na into bingî bionthe birîa bitumagîrwa amwe na biu.

³⁷Ningî nîbo baamenyagîîra kinya itugi bia kîarago kîrîa kîathiûrûkîte îema rîa gûtirimanîra, na ikinyithio biaarîo na biaango na mîkanda.

³⁸“Aaroni na ataana baawe, amwe na Musa, nîbo baambaga maema jaao, mbere ya îema rîa gûtirimanîra bwa gaiti. Nîbo baathithagia mantû jarîa jaabwîrîte kûthithua îemeene rîa gûtirimanîra, nîkenda antû ba Israeli bathaathagia ûrîa kwagîrîte. Muntû ûngî ûrîa wathithagia ngûgî iu ciaao, abuîrîte kûûragwa.

³⁹Arûme bonthe ba mwîrîga jwa Lawi barîa baatarîrwe nî Musa na Aaroni o ta ûrîa MWATHANI aabeerîte, kuuma tûîjî twa mweri jûmwe na nkûrûki, baarî ngiri mîrongo îîrî na ijîîrî (22,000).”

⁴⁰MWATHANI nî aarîîrie Musa aramwîra atîrî, “Tara arûme bonthe barîa barî aana ba iraanga ba Israeli kuuma tûîjî twa mweri jûmwe na nkûrûki, waandîke mariîtwa jaao.

⁴¹Naabuî bûkambathûrîra Alawi bae baakwa ni MWATHANI antûûne a aana ba iranga ba Israeli. Ningî bûmbathûrîre marikithathi ja ndîîthia cia Alawi, antûûne a marikithathi jonthe ja ndîîthia cia antû ba Israeli.”

⁴²Tontû bûû, Musa aratara aana ba iranga bonthe ba antû ba Israeli o ta ûrîa MWATHANI aamwîrîte.

⁴³Nabo arûme ba Israeli bonthe, barîa baarî aana ba iraanga ba ûkûrû bwa mweri jûmwe na nkûrûki barîa baatarîrwe baraandîkwa mariîtwa jaao baarî antû ngiri mîrongo îîrî na ijîîrî na magana jaîrî ja mîrongo mûgwanja na bathatû (22,273).

⁴⁴Ningî MWATHANI nî aarîîrie Musa aramwîra atîrî,

⁴⁵“Mbathûrîra Alawi bae baakwa, antûûne a aana ba iraanga bonthe ba antû ba Israeli, na ûmbathûrîre ndîîthia cia Alawi antûûne a ndîîthia cia antû ba Israeli. Ni nî ni MWATHANI.

⁴⁶Aana ba iraanga ba antû ba Israeli nî babaingî nkûrûki ya arûme ba Alawi, na antû magana jaîrî ja mîrongo mûgwanja na jathatû (273). Tontû bûû, antû bau magana jaîrî ja mîrongo mûgwanja na bathatû, nî babuîrîte kûrîîrwa mbeecha bakagûrwa.

⁴⁷O mwana ûmwe wa kîraanga agaakûûrwa na fetha ithaano kûringana na kîthimi kîrîa gîatumagîrwa îgiita rîu.

⁴⁸Nacio mbeecha iu igaatumîrwa gûkûûra antû bau inenkerwe Aaroni na ataana baawe.”

⁴⁹Tontû bûû, Musa arajûkia mbeecha iu kuuma kîrî iraanga biu magana jaîrî ja mîrongo mûgwanja na bithatû (273).

⁵⁰Kuuma kîrî iraanga biu Musa nî oothûranîrie fetha ngiri îmwe cia magana jathatû ja mîrongo îtaantatû na ithaano kûringana na kîthimi kîrîa gîaatumagîrwa.

⁵¹Musa aranenkera Aaroni na ataana baawe mbeecha iu ciaatumîri gûkûûra iraanga biu o ta ûrîa MWATHANI aamwîrîte.