Read KIMERU BIBLE PROTESTANT EDITION Gût 30 Bible Online

Gût 30 - KIMERU BIBLE PROTESTANT EDITION bible

Gût 30

¹Musa nî aarîîrie atongeeria ba mîîrîga ya antû ba Israeli arauga atîrî, “Mantû jaja nîjo MWATHANI augîîte:

² Muntû akëeja gûciîtîria MWATHANI, kana akarîa muuma jwa gûciata ûntû, no mwanka oojûrie mûciîtio jûu, athithie jonthe jarîa augîîte akathithia.

³Mwarî arî nja ya îthe akëeja gûciîtîria MWATHANI kana agaciata ûntû na mûciîtio,

⁴nawe îthe akëethîrwa nî aamwigîrue agîciîtia kana agîciata ûntû na mûciîtio, na îthe nawe atîmûûrie noo atîa, mwarî ûu abuîrîte kûûjûria mîciîtio yaawe.

⁵Îndî îthe wa mwarî ûu akëeja kûregana na mîciîtio îrîa mwarî aciîtîtie, mîciîtio îîu îkethagîrwa îtî na ûbatu bwa kûûjûrua nî mwarî ûu. MWATHANI akaarekera mwarî ûu.

⁶Mwarî akëeja gûciîtia mûciîtio jwa gûciata ûntû, agaciîtia akîendaga kana na rûûo;

⁷akëeja kûgûrwa na mûkûrû waawe akëeja kwigua mantû ja mûciîtio jûu, nawe akarega kwîra mwekûrû waawe noo atîa ntukû îîu aigîrue, no mwanka mwekûrû ûu oojûrie mûciîtio jwaawe.

⁸Îndî mûkûrû waawe akëeja kûregana na mûciîtio jûu ntukû îîu ajwigîrue, mûciîtio jûtîîthîrwa jûrî o kaîrî nawe mwekûrû ûu atîbuîrîte kûjûûjûria. MWATHANI akamûrekera.

⁹Mûka ntigwa kana mûka wîngi nî mûkûrû waawe akëeja gûciîtia atî agaciata ûntû no mwanka ojûrie mûciîtio jwaawe.

¹⁰Mwekûrû ûgûri akëeja gûciîtia agaciata ûntû,

¹¹nawe mûkûrû waawe akëeja kwigua mantû jau na atîûrie mwekûrû waawe, kana aregana najo, no mwanka ojûrie mîciîtio yaawe.

¹²Îndî mûkûrû waawe akëeja kûregana na mîciîtio îîu ntukû îrîa amiigîrue, mîciîtio îîu îtîîthîrwa îrî o kaîrî na mwekûrû waawe atîbuîrîte kûmîûjûria. MWATHANI akamûrekera nîûntû mûkûrû waawe nî areganîre nayo.

¹³Mûkûrû arî na waatho bwa gwîtîkîîria mûciîtio kinya jûrîkû jwa mwekûrû kana akaregana na mûciîtio jûrîa mwekûrû waawe aciîtîtie nîûntû bwa gûciata.

¹⁴Îndî mûkûrû waawe akëeja gûkira akarega kûûria mwekûrû waawe noo atîa kuuma ntukû îrîa aigîrue mîciîtio îîu, nîka eetîkanîrîtie nayo nîûntû nî aakirîre akûmiigua.

¹⁵Îndî akëeja kûregana nayo nyuma ya kwigua na agakira, mûrûme wa mwekûrû ûu nîwe ûgaakanûkua nîûntû bwa mîciîtio ya mwekûrû waawe.”

¹⁶Jau nîjo mawaatho jarîa MWATHANI eerîre Musa jegiî mwekûrû na mûkûrû waawe, na jegiî mwarî ûtîgûri ûrî nja ya îthe.