Read KIMERU BIBLE PROTESTANT EDITION Gût 31 Bible Online

Gût 31 - KIMERU BIBLE PROTESTANT EDITION bible

Gût 31

¹MWATHANI nî aarîîrîe Musa aramwîra atîrî,

²“Kanûkia Amidiani ûrîîrie antû ba Israeli. Nyuma ya ûu ûgaakua.”

³Musa nî aarîîrie antû arabeera, “thuranîreni antû bamwe beenu baikundîke mathaga ja ndwaa bakarwee na Amidiani nîkenda boojûria ûrîa MWATHANI augîîte bwa kwirîîria kîrî Amidiani.

⁴O bunka mwîrîga ndeene ya Israeli yonthe nî jûtûme antû ngiri îmwe ndweene.”

⁵Tontû bûû, kuumania na mangiri ja antû ba Israeli, nî beetîre ndweene antû ngiri îmwe kuuma kîrî mwîrîga, bonthe baarî antû ngiri îkûmi na ijîîrî.

⁶Musa arabatûma ndweene, antû ngiri kuuma kîrî o mwîrîga amwe na Fineasi mûtaana wa mûthînjîri-Mûrungu Eleazari, barî na into bibitheru kuuma antû arîa atheru na akamatîte tarumbeta ya kwîja kûringaga ndweene.

⁷Nabo bararwaa na Amidiani o ta ûrîa MWATHANI eerîte Musa barooraga arûme bonthe.

⁸Ningî barooraganîria antû bau amwe na anene ba Midiani bataano tabo: Evi, na Rekemu, na Zuri, na Huri, na Reba. Ningî barooraga Balaamu mûtaana wa Beori.

⁹Antû ba Israeli barataa aka ba Midiani na aana baao. Barataa nyomoo cionthe: ng'ombe, na mbûri na ng'ondu. Barataa into biaao bionthe.

¹⁰Ningî baraîîthia ntûûra cia Amidiani irîa baatûûraga, na maema jaao jonthe.

¹¹Barataa into bionthe, kinya antû na nyomoo.

¹²Ningî barareeta atae na into birîa bataîte kîrî Musa, na mûthînjîri-Mûrungu Eleazari, na kîûthûrano kionthe kîa antû ba Israeli au kambîîne bûûrîîne ya Moabu rûteere rwa mûuro jwa Jorodani akuî na Jeriko.

¹³Musa na mûthînjîri-Mûrungu Eleazari na atongeeria bonthe ba kîûthûrano kionthe barauma kambîîne bareeta kûthagaana njûûrî.

¹⁴Musa nî aathûûrîre nî atongeeria ba njûûrî; barîa baatongagîîria asikarî ngiri inyiingî na barîa baatongagîîria asikarî magana jamaingî, barîa baumîte ndweene.

¹⁵Musa arabooria atîrî, “Nîka bwarega kûûraga aka?

¹⁶ Atîrî, anga tî aka bathingatîte nteto cia Balaamu baraatûma antû ba Israeli barema MWATHANI kûrîa Peori na tontû bûu bûratûma mîrimo îîjîîra antû ba MWATHANI.

¹⁷Nandî ûrageeni twaana tûîjî tunthe na aka bonthe barîa baathenganîîra na arûme.

¹⁸Îndî bwitigîrie aarî bonthe barîa bataathengerwa nî arûme.

¹⁹Nabo antû bonthe barîa booraganîte kana baringithîtie kiimba bakare oome ya kambî ntukû mûgwanja. Nabo bakaitheria ntukû ya ithatû na ya mûgwanja.

²⁰Ningî baûûre nguû ciaao cionthe na bûthambie into bionthe birîa bithithîtue na mîgûûta, na birîa bithithîtue na guee ya mbûri, na birîa bithithîtue na mîtî.”

²¹Eleazari mûthînjîri-Mûrungu areera antû bau baumîte ndweene atîrî, “Bûbû nîbu Waatho bûrîa MWATHANI eerîte Musa. Nabu nî bûbû:

²²Into bionthe bia thaabu, na fetha, na îturutia, na chuuma, na îthaga rîrîa rîtîrootaga, na îthaga rîrîa rîthithagia mbûrûbûrû,

²³into bionthe birîa biûmba kûûmîîria mwanki bitonyithue mwankiine nîkenda bitherua. Îndî into bingî bionthe birîa bitîûmîîria mwanki bitonyithue rûûjîîne rûrîa rûthereetue nîkenda bitherua.

²⁴Nabo baûûre nguû ciaacio ntukû ya mûgwanja. Nabo bakaathera, na rîu boomba gûkûrûka kambîîne.”

²⁵MWATHANI nî aarîîrie Musa aramwîra atîrî,

²⁶“Ûûgwe na Eleazari mûthînjîri-Mûrungu, na atongeeria ba mîîrîga ya kîûthûrano kionthe kîa antû ba Israeli, bûtare into bionthe birîa bitai amwe na antû na nyomoo.

²⁷Antû bau, na nyomoo iu na into biu biaataîrwe bigawe jaîrî jaîrî. Bimwe binenkanîrwe kîrî njûûrî îrîa yeetîre ndweene na bingî binenkerwe Kîûthûrano kionthe.

²⁸Kuuma kîrî into birîa bigaîri njûûrî, ûjûkie muntû ûmwe kuuma kîrî atae magana jataano na nyomoo îmwe kuuma kîrî nyomoo magana jataano irîa itaîtwe; ciethîrwa irî ng'ombe, kana ntigiri, kana ng'ondu kana mbûri.

²⁹Into biu biriti kuuma kîrî birîa bigaîri njûûrî, ûbinenkanîre kîrî Eleazari mûthînjîri-Mûrungu birî bia MWATHANI.

³⁰Kuuma kîrî birîa bigaîri antû bau bangî ba Israeli birîa bitaîtwe, ûrite muntû ûmwe kuuma o kîrî atae mîrongo îtaano, na nyomoo îmwe kuuma kîrî nyomoo mîrongo îtaano irîa itai, ciethîrwa irî ng'ombe, kana ntigiri, kana ng'ondu kana mbûri. Antû bau na nyomoo iu inenkanîrwe kîrî Alawi barîa bamenyagîîra îema rîa MWATHANI rîa gûtirimanîrwa.”

³¹Tontû bûû, Musa na Eleazari mûthînjîri-Mûrungu barathithia o ta ûrîa MWATHANI augîîte.

³²Antû ba Israeli barîa baarî ndweene baataîre ng'ondu ngiri magana jatantatû ja mîrongo mûgwanja na ithaano (675,000),

³³na ng'ombe ngiri mîrongo mûgwanja na ijîîrî (72,000),

³⁴na ntigiri ngiri mîrongo îtaantatû na îmwe (61,000),

³⁵na aarî barîa bataathenganîîra na arûme ngiri mîrongo îthatû na ijîîrî (32,000),

³⁶Njûûrî ya Israeli îrîa yaarî ndweene yaanenkeerwe ng'ondu ngiri magana jathatû ja mîrongo îthatû na mûgwanja na magana jataano (337,500).

³⁷MWATHANI araritîrwa ng'ondu magana jatantatû ja mîrongo mûgwanja na ithaano (675).

³⁸Ng'ombe nacio ciaarî ngiri mîrongo îthatû na ithanthatû (36,000) Kuuma kîrî cio MWATHANI nî aritîîrwe ng'ombe mîrongo mûgwanja na ijîîrî (72).

³⁹Ntigiri nacio ciaarî ngiri mîrongo îthatû cia magana jataano (30,500). Kuuma kîrî cio MWATHANI nî aaritîîrwe ntigiri mîrongo îtaantatû na îmwe (61).

⁴⁰Aarî barîa bataarî bakûthenganîîra na arûme baarî ngiri îkûmi na ithanthatû (16,000). Kuuma kîrî bo, MWATHANI nî aaritîîrwe aarî mîrongo îthatû na baîrî (32).

⁴¹Musa nî aanenkanîîre bionthe birîa biaaritîri MWATHANI kîrî Eleazari mûthînjîri-Mûrungu o ta ûrîa MWATHANI eerîte Musa.

⁴²Njûûrî ya Israeli îrîa yaarî ndweene yaagaîrîîrwe nî Musa nusu ya into birîa biaatai, o ûmwe na antû bangî ba Israeli.

⁴³Nusu ya kîûthûrano kîa antû ba Israeli kîagaîrîîrwe ng'ondu ngiri magana jathatû na mîrongo îthatû na mûgwanja cia magana jataano (337,500),

⁴⁴na ng'ombe ngiri mîrongo îtaantatû na ithanthatû (66,000),

⁴⁵na ntigiri ngiri mîrongo îthatû cia magana jataano (30,500),

⁴⁶na aarî barîa bataathenganîîra na arûme ngiri îkûmi na ithanthatû (16,000).

⁴⁷Kuuma kîrî antû na nyomoo irîa ciaagaîri antû bangî ba Israeli, Musa nî aaritîre muntû ûmwe kuuma o kîrî antû mîrongo îtaano, na nyomoo îmwe kuuma o kîrî nyomoo mîrongo îtaano, aranenkera Alawi barîa baamenyagîîra îema rîa gûtirimanîra o ta ûrîa MWATHANI eerîte Musa.

⁴⁸Nabo atongeeria ba njûûrî barîa baatongagîîria ngiri inyiingî cia asikarî, na barîa baatongagîîria asikarî magana jamaingî nî beetîre kîrî Musa.

⁴⁹Baramwîra atîrî, “Tuî nthûûmba ciaaku tûgûtara asikarî barîa twaatongeeretie ndweene. Bonthe barî o.

⁵⁰Ningî tûkûreeta kîrî MWATHANI into birîa o muntû aataîte. Nabio nî into bia thaabu na baangiri, na mîûûri, na mina, na mîkathî.”

⁵¹Musa na Eleazari mûthînjîri-Mûrungu barajûkia thaabu na into biu bionthe bia kwigemia.

⁵²Nayo thaabu yonthe îrîa baajûkîrie kuuma kîrî atongeeria barîa batongeeretie asikarî ngiri inyingî na barîa batongeeretie asikarî magana jamaingî yaarî kilo magana jaîrî (200).

⁵³Asikarî barîa baarî ndweene nî baarî bakûgaîrwa o asikarî into biaawe.

⁵⁴Musa na Eleazari mûthînjîri-Mûrungu nî baajûkîrie thaabu îîu kuuma kîrî atongeeria ba njûûrî barîa baatongeeretie asikarî ngiri inyingî na barîa baatongeeretie asikarî magana jamaingî, baramiikia îemeene rîa gûtirimanîra îrî kîririkania kîrî MWATHANI nîûntû bwa antû ba Israeli.