Read KIMERU BIBLE PROTESTANT EDITION Gût 32 Bible Online

Gût 32 - KIMERU BIBLE PROTESTANT EDITION bible

Gût 32

¹Nacio nchiarwa cia Rubeni na cia Gadi nî ciaarî na nyomoo cia ndîîthia inyingî mono. Nabo baroona nthîgûrû ya Jazeri na ya Gileadi irî inthongi cia kûrîîthia.

²Tontû bûû, bareeta kîrî Musa na Eleazari mûthînjîri-Mûrungu na atongeeria ba kîûthûrano kîa antû ba Israeli barabeera atîrî,

³“Ntûûra cia Atarothi, na Diboni, na Jazeri, na Nimura, na Heshiboni, na Eleale, na Sebamu, na Nebo na Beoni

⁴nî gûntû kûrîa MWATHANI aatûmîre tuî antû ba Israeli tûgûtaa naku nî gûntû gûkwega gwa kûrîîthia. Naatuî nthûûmba cieenu tûrî na ndîîthia înene.

⁵Bûkëeja kwîthîrwa bûkîonaga kwagîrîte, tûnenkereni nthîgûrû îîjî nîkenda yaa kiigai gîeetû tuî nthûûmba cieenu. Itû bûgaatwikia rwongo rûrîa rûngî rwa mûuro jwa Jorodani.”

⁶Îndî Musa arooria nchiarwa iu cia Gadi na cia Rubeni atîrî, “Nîka bûkwenda antû bangî ba Israeli beeta ndweene naabuî bûtigi gûkû?

⁷Nîkî ûntû bûkwenda kûûraga antû bangî ba Israeli nkoro batîrauna mûuro jwa Jorodani beeta nthîgûrû îrîa MWATHANI abaeete?

⁸ Ûu nî oou biûjûjû bieenu biaathithîrie rîrîa ndaabitûmîre kuuma Kadeshi-barinea biîta gûcûnkûûna nthîgûrû.

⁹Nîkwîthîrwa rîrîa beetîre barakinya kîguuruune kîa Eshikoli na baroona nthîgûrû îîu, nî baatûmîre antû ba Israeli bakua Nkoro bararemwa nî gwîta nthîgûrû îrîa MWATHANI abaeete.

¹⁰ MWATHANI nî aathûûrîre ntukû îîu araciîtia arauga atîrî,

¹¹‘Nî mma gûtî muntû noo ûmwe wa barîa baaumîre Misri kuuma antû ba mîaka mîrongo îîrî na nkûrûki ûkoona nthîgûrû îrîa ndaaciîtîrie nkaa Abrahamu, na Isaaka, na Jakubu, nîûntû bo bataambathîkîîre.

¹²Nî Kalebu mûtaana wa Jefune ûrîa Mûkenizi na Joshua mûtaana wa Nuni akî bakaamîona nîûntû nîbo bambathîkîrîte ni MWATHANI!’

¹³MWATHANI nî aathûûrîrue nî Israeli aratûma bataratarania na rwanda mîaka mîrongo îna mwanka nthukî irîa cionthe ciathithîtie ûthûûku mbere ya MWATHANI irathira buru.

¹⁴Atîrî, kinya buî bûgûkara ta ba abaagu, rûciara rwa antû babaaî nîkenda bwîta na mbere gûtûma buî MWATHANI athûûra nkûrûki nîûntû bwa antû ba Israeli.

¹⁵Nîkwîthîrwa bwagarûka bwatiga kûthingata MWATHANI, MWATHANI akabwîrûkîra rwanda kaîrî. Naabuî bûgaatûma antû ba Israeli bonthe bathirue.”

¹⁶Nabo antû ba mîîrîga îîu bareetaîta akuî na Musa baramwîra atîrî, “Twîtîkîîrie twakîre ndîîthia cieetû, twakîre aka beetû na aana beetû ntûûra.

¹⁷Îndî tuî tûkaarûma mathaga tûtongeerie antû bangî ba Israeli mwanka twoone bakwona gûntû kwaao kwa gûtûûra. Nabo aana beetû bagakara ntûûra irîa mbirigîre na rûthingo batîkeeje kwithûkîrwa nî antû ba nthîgûrû îîjî.

¹⁸Tûtîcoka nja cieetû mwanka rîrîa antû bangî ba Israeli bakaigwaatîra nthîgûrû îrîa bagaîri.

¹⁹Nîkwîthîrwa tuî tûtîîthîrwa tûrî na rûgai rwongo rwa Jorodani, nîûntû rûgai rweetû nî rwongo rûrû rwa bwa gaiti ya Jorodani rûrî.”

²⁰Tontû bûû, Musa arabeera atîrî, “Bûkëethîrwa bûkaathithia ûu rûmeeni mathaga ja ndwaa bûrî aja mbere ya MWATHANI,

²¹Bwinthe rûmeeni mathaga bûrî mbere ya MWATHANI bûûne mûuro Jorodani bwithûkîre anthû baawe mwanka rîrîa akaboomba.

²²Rîrîa MWATHANI akoomba anthû baawe ndweene, rîu no bûcoke nthîgûrûûne yeenu nîûntû gûtî ûntû bûkeethîrwa bûtigeerie bûtîthithîtie bûrîa MWATHANI akwenda kana ûrîa antû bangî ba Israeli bakwenda. MWATHANI ageetîkîîria nthîgûrû îîjî îrî rûteere rwa bwa gaiti ka mûuro jwa Jorodani yee yeenu.

²³Îndî bûkëethîrwa bûtîthithia mantû jau bwauga, bûkeethîrwa bûrî na meeyia mbere ya MWATHANI. Gûtî nkaanja menyeni atî bûgaakanûkua nîûntû bwa meeyia jeenu.

²⁴Tontû bûû, akeeni ntûûra nîûntû bwa aana beenu na bwake nkanata nîûntû bwa ng'ondu cieenu, na bûthithie mantû jau bauga.”

²⁵Nabo antû ba mwîrîga jwa Gadi na jwa Rubeni nî beerîre Musa atîrî, “Tuî nthûûmba ciaaku ikaathithia o ta ûrîa gwe mwathi weetû wauga.

²⁶Aka beetû, na aana beetû, na ndîîthia cieetû, igatigwa ntûûreene cia Gileadi.

²⁷Îndî tuî nthûûmba ciaaku tûkauna Jorodani twinthe tûrî na mathaga ja ndwaa mbere ya MWATHANI twîte ndweene o ta ûrîa gwe Mwathi weetû wauga.”

²⁸ Tontû bûû, Musa areera Eleazari mûthînjîri-Mûrungu, na Joshua mûtaana wa Nuni, na atongeeria ba mîciî ya Israeli mantû jegiî mîîrîga îîu yo îîrî.

²⁹Musa arabeera atîrî, “Antû ba mwîrîga jwa Gadi na jwa Rubeni bonthe barîa barî na mathaga bakeeja kuuna Jorodani mbere ya MWATHANI bageetania naabuî ndweene naabuî bûgataa nthîgûrû. Rîu bûbagaîre nthîgûrû ya Gileadi îrî rûgai rwaao.

³⁰Îndî bakëeja kûrega kuunania naabuî mûuro jwa Jorodani barî na mathaga ja gwîta ndweene, bûbagaîre rûgai rwaao kûu Kanaani bûkeethîrwa bûrî.”

³¹Nabo antû ba mwîrîga jwa Gadi na jwa Rubeni baracokia barauga atîrî, “Mwathi weetû, tuî nthûûmba ciaaku tûkathithia ûrîa MWATHANI augîîte.

³²Tûkauna mûuro jwa Jorodani tûrî na mathaga ja ndwaa mbere ya MWATHANI twîte nthîgûrûûne ya Kanaani. Îndî naarîa tûkwenda rûgai rweetû rwîthîrwa rûrî nî rûteere rûrû tûrî rwa Jorodani.”

³³Nîrîo Musa anenkanîîre nthîgûrû îrîa yaathagwa nî mûnene Sihoni wa Aamori na ya mûnene Ogi wa Bashani kîrî mwîrîga jwa Gadi na mwîrîga jwa Rubeni, na nusu ya mwîrîga jwa Manase. Manase aarî mûtaana wa Josefu. Ningî arabaneenkera ntûûra cia nthîgûrû iu cionthe na ntûûra cia nthîgûrû irîa ciaathiûrûkîrîte.

³⁴Nacio nchiarwa cia Gadi iraaka ntûûra ya Diboni, na ya Atarothi, na ya Aroeri,

³⁵na ya Atirothi-shofani, na ya Jazeri, na ya Jogibeha,

³⁶na ya Bethinimura na ya Bethiharani. Cionthe ciaarî ntûûra ciairigîri na rûthingo na igaakwa nkanata cia ng'ondu na mbûri.

³⁷Nacio nchiarwa cia Rubeni iraaka ntûûra ya Heshiboni, na ya Eleale, na ya Kiriathaimu,

³⁸na ya Nebo, na ya Baali-meoni (nyumeene mariîtwa ja ntûûra iu nî jaagarûrîrwe) na ya Sibuma. Ningî nî baeere ntûûra ingî irîa baakîre mariîtwa jangî.

³⁹Nacio nchiarwa cia Makiri ûrîa mûtaana wa Manase nî ciaithûkîîre Gileadi iramîtaa, na ireenga Aamori barîa baatûûraga ku.

⁴⁰Musa aranenkanîra Gileadi kîrî nchiarwa cia Makiri ûrîa mûtaana wa Manase iratûûra ku.

⁴¹Jairi ûrîa waarî wa mwîrîga jwa Manase nî aithûkîîre ntûûra imwe na araitaa, araciîta ntûûra cia Havothi-jairi.

⁴²Nobaha areeta arataa ntûûra ya Kenathi na tûtûûra tûrîa twaamîthiûûkîrîte. Aracoka aramîgarûra riîtwa aramîîta riîtwa rîaawe.