Read KIMERU BIBLE PROTESTANT EDITION Gût 34 Bible Online

Gût 34 - KIMERU BIBLE PROTESTANT EDITION bible

Gût 34

¹MWATHANI nî aarîîrie Musa aramwîra atîrî,

²“Arîria antû ba Israeli ûbeere atî, rîrîa bûgatonya nthîgûrû ya Kanaani (nayo nî nthîgûrû îrîa bweei yaa rûgai rweenu) îîjî nîyo îkethagîrwa îrî mîanka yaao:

³Mwanka jwa nthîgûrû îîu jwa bwa ûmotho jûkambagîîria rwanda rwa Zini jûgeetania na mwanka jwa nthîgûrû ya Edomu. Mwanka jûu jûkethagîrwa jûkîambîrîria mûthieene jwa îria rîa Chumbî bwa gaiti.

⁴Mwanka jûu jûgeeta bwa ûmotho jwitîîrie mûcîcîbîroone jwa Akirabimu na jwîtîîre rwanda rwa Zini mwanka Kadeshi-barinea bwa ûmotho. Kuuma au jwîte mwanka Hazaradari jûkûrûke jwîte Azimoni.

⁵Kuuma Azimoni jûkoomboke jwîte mwanka kamûuro ka Misri jûthirîre îrieene rîa Mediterania.

⁶“Îria rîa Mediterania nîrîo rîkethagîrwa rîrî mwanka jwa nthîgûrû îîu jwa bwa rûgûrû.

⁷“Naju mwanka jweenu jwa rûteere rwa bwa ûrîo nî jûjû: jûkambîrîria îrieene rîa Mediterania jwîîta bwa kîrîma kîa Hori.

⁸Kuuma kîrîmeene kîa Hori mwanka jûgeetîîra mûcîcîbîroone jwa Hamathi jûthirîre Zedadi.

⁹Kuuma au jûgeeta jûkinye Zifuroni na mûthia jwaaju jûkeethîrwa jûrî Hazarenani. Jûu nîju jûkethagîrwa jûrî mwanka jwa nthîgûrû yeenu rûteere rwa bwa ûrîo.

¹⁰“Naju mwanka jwa nthîgûrû yeenu jwa rûteere rwa gaiti jûkambîrîria Hazarenani mwanka Shefamu.

¹¹Ningî jûkeenama kuuma Shefamu jwîte Ribula rûteereene rwa bwa gaiti rwa Aini. Kuuma au jûkeenama jûkinye rûteere rwa îria rîa Kinerethi bwa gaiti.

¹²Mwanka jûu jûkeenama jûkinye mûuroone jwa Jorodani na jûthirîre îrieene rîa Chumbî. Îîu nîyo îkethagîrwa îrî nthîgûrû yeenu na mîanka yaayo.”

¹³ Musa nî eerîre antû ba Israeli atîrî, “Îîu nîyo nthîgûrû îrîa îkaagaîrwa mîîrîga kenda na nusu îrî rûgai rwaao rûrîa bagaîri nî MWATHANI. Mîîrîga îîu îkîgaa nthîgûrû îîu nî kûra ikaringwa.

¹⁴Nîkwîthîrwa nchiarwa cia mwîrîga jwa Rubeni na cia mwîrîga jwa Gadi na cia nusu mwîrîga jwa Manase nî bathirîtie kûjûkia rûgai rwaao.

¹⁵Mîîrîga îîu yo-îîrî na nusu ya mwîrîga jwa Manase nî bathirîtie kûjûkia rûgai rwaao rwa nthîgûrû rûteere rwa bwa gaiti ka mûuro jwa Jorodani akuî na Jeriko.”

¹⁶MWATHANI nî aarîîrie Musa aramwîra atîrî,

¹⁷“Eleazari mûthînjîri-Mûrungu na Joshua mûtaana wa Nuni nîbo bakagaîra antû ba Israeli nthîgûrû yee rûgai rwaao.

¹⁸Ningî bûthuure mûtongeeria kuuma o mwîrîga wa kûbateetheria kûgaa nthîgûrû.

¹⁹Mariîtwa jaja nîjo ja antû bau: kuuma mwîrîgeene jwa Juda nî Kalebu mûtaana wa Jefune.

²⁰Kuuma mwîrîgeene jwa nchiarwa cia Simioni nî Shemueli mûtaana wa Amihudi.

²¹Kuuma mwîrîgeene jwa Benjamini nî Elidadi mûtaana wa Kisiloni.

²²Kuuma mwîrîgeene jwa nchiarwa cia Dani nî mûtongeeria waaju Buki mûtaana wa Jogili.

²³Kuuma mwîrîgeene jwa nchiarwa cia Josefu, na nchiarwa cia mwîrîga jwa Manase nî mûtongeeria waao Hanieli mûtaana wa efodi.

²⁴Kuuma mwîrîgeene jwa nchiarwa cia Efuraimu nî mûtongeeria waao Kemueli mûtaana wa Shifutani.

²⁵Kuuma mwîrîgeene jwa nchiarwa cia Zebuloni nî mûtongeeria waao Elizafani mûtaana wa Paranaki.

²⁶Kuuma mwîrîgeene jwa nchiarwa cia Isakari nî mûtongeeria waao Palitieli mûtaana wa Azani.

²⁷Kuuma mwîrîgeene jwa nchiarwa cia Asheri nî mûtongeeria waao Ahihudi mûtaana wa Shelomi.

²⁸Kuuma mwîrîgeene jwa nchiarwa cia Nafutali nî mûtongeeria waao Pedaheli mûtaana wa Amihudi.

²⁹Bau nîbo antû barîa MWATHANI aaugîre bagae nthîgûrû ya Kanaani îrî rûgai rwa Aisraeli.”