Read KIMERU BIBLE PROTESTANT EDITION Gût 35 Bible Online

Gût 35 - KIMERU BIBLE PROTESTANT EDITION bible

Gût 35

¹ Musa arî bûûrîîne ya Moabu, rûteere rwa mûuro jwa Jorodani, akuî na Jeriko, MWATHANI nî aarîîrie Musa aramwîra atîrî,

²“Îîra antû ba Israeli atî rîrîa bagaatonya nthîgûrû ya Kanaani bagaîrwa rûgai rwaao nabo bagaîre Alawi ntûûra. Ningî bagaîrwe gûntû kûrîa kûthiûrûkîrîte ntûûra iu nîkenda barîîthagia ku.

³Ntûûra iu bakaagîrwa nîku bagatûûraga. Ningî barîîthagie ku ng'ombe na ng'ondu na mbûri amwe na nyomoo ingî ciaao cionthe.

⁴Ithaka birîa bûkaagaîra Alawi biîthîrwe bithiûrûkîrîte ntûûra iu, biambîrîrîîtie rûthingoone rwa ntûûra, kuumagara bwa oome ta nusu kilomita (0.5km).

⁵Naabuî bûkaathima ithaka biu kûthiûrûkîra ntûûra; rûteere rwa bwa gaiti kilomita îmwe (1km) na rûteere rwa bwa ûmotho kilomita îmwe (1km), na rûteere rwa bwa rûgûrû kilomita îmwe (1km), na rûteere rwa bwa ûrîo kilomita îmwe (1km). Biu nîbio bikethagîrwa birî ithaka bia Alawi bia kûrîîthagia.

⁶Bûgaîre Alawi ntûûra ithanthatû. Muntû ûûraganîte no amatûke agaiciithe ntûûreene îmwe ya iu. Bûcoke bûgaîre Alawi ntûûra ingî mîrongo îna na ijîîrî (42).

⁷Ntûûra cionthe irîa bûkaagaîra Alawi ikeethîrwa irî mîrongo îna na inyaanya (48), amwe na ithaka biaacio bia kûrîîthia.

⁸Ntûûra irîa bûkagaîra Alawi nî irîa ikethagîrwa inenkanîri nî antû bangî ba Israeli kuumania na ntûûra irîa bagaîri. Mwîrîga jûmûnene jûkaritaga ntûûra inyingî na mwîrîga jûmûnini jûkaritaga ntûûra inkai.”

⁹ MWATHANI nî aarîîrie Musa aramwîra atîrî,

¹⁰“Îîra antû ba Israeli atî, rîrîa bakauna mûuro jwa Jorodani beete nthîgûrû ya Kanaani,

¹¹rîu bûthuure ntûûra irîa muntû oomba kûmatûka ageeta gwiciitha rîrîa ooragana atîkwenda.

¹²Ntûûra iu nîcio muntû ûûraganîte oomba gwiciitha atîkeeje kûûragwa nî muntû ûkwenda kwirîîria. Muntû ûûraganîte atîbuîrîte kûûragwa atîgambîri mbere ya kîûthûrano kîa antû ba Israeli.

¹³Nacio ntûûra iu cia gwiciithagwa ikeethîrwa irî ithanthatû.

¹⁴Ntûûra ithatû ciîthîrwe irî rûteere rwa bwa gaiti ka mûuro jwa Jorodani na ntûûra ingî ithatû ciîthîrwe irî nthîgûrûûne ya Kanaani. Iu nîcio ikethagîrwa irî ntûûra cia gwiciithagwa nî muntû rîrîa ooraganîte.

¹⁵Ntûûra iu cio ithanthatû nîku muntû ûûraganîte atîkwenda akamatûkaga ageeta gwiciitha. Muntû ûu ûûraganîte ëethîrwa arî Mûisraeli, kana muntû wa kûngî, kana mûgeni ûtûûranîrîte naabuî.

¹⁶Îndî muntû akëeja kûringa muntû ûngî na gîntû gîa chuuma, muntû ûu ûringîrwe agakua, mûringani ûu nî mûûragani. Mûûragani ûu no mwanka ooragwe.

¹⁷Muntû akëeja kûringa muntû ûngî na iiga nawe muntû ûu ûringîrwe agakua, mûringani ûu nî mûûragani. Mûûragani ûu no mwanka ooragwe.

¹⁸Kana muntû akëeja kûringa muntû ûngî na gîntû kîa mûtî, muntû ûu uringîrwe nawe agäkua, mûringani ûu nî mûûragani. Mûûragani ûu no mwanka ooragwe.

¹⁹Muntû ûrîa ûkëethîrwa akîendaga kwirîîria kîrî muntû ûrîa ûûraganîte, atirimana na muntû ûu, no amûûrage.

²⁰Muntû akëeja kûmunta muntû ûngî ûtheri arî na ûthû kana muntû akäringa muntû ûngî na gîntû amwiciithîrîte, nawe muntû ûu ûngî agakua,

²¹kana muntû akëethîrwa arî na ûthû na muntû ûngî akaringa muntû ûu na njara agäkua, muntû ûu ûûraganîre no mwanka ooragwe. Muntû ûu nî mûûragani, na no mwanka ooragwe acemania na muntû ûrîa ûkûmûcwaa airîîria.

²²“Muntû oomba kûmunta muntû ûngî atîkwenda, kana akamûgera gîntû gîkamûûraga atîkwenda.

²³Ningî oomba kûûraga muntû ûngî na iiga atîmwene, kinya këethîra atî na ûthû na atîkwendaga kûmûûraga.

²⁴Rîu kîûthûrano gîkagambîra mûûragani na muntû ûrîa ûkwenda kwirîîria ûu ûkuîte. Kîrîndî gîkaathithia ûjû.

²⁵Gîgatunyûkia muntû ûûraganîte kuuma kîrî muntû ûu ûkwenda kwirîîria. Ningî gîkeera mûûragani acoke ntûûreene îrîa amatûkîte gwicîîtha. Mûûragani ûu agaakara kûu mwanka rîrîa mûthînjîri-Mûrungu ûrîa mûnene agaakua.

²⁶Îndî mûûragani ûu akëeja kuumagara oome ya ntûûra îîu arî ya gwîciitha,

²⁷nawe muntû ûu ûkwenda kwirîîria akëeja kûmûgwatithanîria oome ya ntûûra ya gwiciitha, nawe aköoraga mûûragani ûu, muntû ûu ûkwenda kwirîîria atîîthîrwa arî mûûragani.

²⁸Mûûragani no mwanka akare ntûûreene îrîa arî ya gwiciitha mwanka rîrîa mûthînjîri-Mûrungu ûrîa mûnene agaakua. Îndî nyuma ya gûkua kwa mûthînjîri-Mûrungu ûrîa mûnene, mûûragani ûu oomba gûcoka kwaawe.

²⁹Naabuî bûthingatage mantû jau gûntû kunthe kûrîa bûgatûûraga nthukîîne cionthe.

³⁰ “Muntû akëeja kûûraga muntû ûngî, no mwanka ooragwe. Mûûragani atîbuîrîte nîûntû bwa ûkûûjî bwa muntû ûmwe.

³¹Îndî mûûragani atîbuîri kûrîîrwa îrîi nîkenda atîkooragwe. No mwanka mûûragani ooragwe.

³²Ningî bûtîbuîrîte gwîtîkîîria îrîi rîa mûûragani ûrîa ûrî ntûûreene ya gwiciitha nîkenda acoka kwaawe mbere ya mûthînjîri-Mûrungu ûrîa mûnene akua.

³³Bûkëeja kûûragana bweekîra nthîgûrû mûgiro. Nthîgûrû îkagîa mûgiro îtîûmba kûtherua na kîngî tiga kûûraga mûûragani.

³⁴Bûgeekagîreni nthîgûrû îrîa bûtûûraga mûgiro tontû kinya ni MWATHANI nî ntûûraga amwe naabui antû ba Israeli.”