Read KIMERU BIBLE PROTESTANT EDITION Gût 36 Bible Online

Gût 36 - KIMERU BIBLE PROTESTANT EDITION bible

Gût 36

¹Gileadi aarî mûtaana wa Makiri, Makiri ûmwe wa nchiarwa cia Manase. Manase aarî mûtaana wa Josefu. Nabo atongeeria ba mîciî ya nchiarwa cia Gileadi nî beetîre kîrî Musa baramwarîria amwe na atongeeria ba antû ba Israeli barabeera atîrî,

² “MWATHANI nî aakwaarîîrie gwe mwathi weetû Musa ûgaîre antû ba Israeli rûgai rwaao na njîra ya kûringa kuura. Ningî nî MWATHANI waakwîrîre ûgaîre aarî ba Zelofehadi muntû wa ndûgû cieetû rûgai.

³Îndî aarî bau bëethîrwa bagûri nî arûme ba mwîrîga jûngî, nîka rûgai rweetû rûkaa rwa mwîrîga jûngî. Naru rûgai rûrîa tûgaîri na kûringa kuura rûnyiie.

⁴Mwaka jwa gûcokeria antû into biaao jwaakinya, rûgai rwa aarî ba Zelofehadi rûgacokua kîrî mîîrîga îrîa bagûri. Naatuî tûtuunywe rûgai rûu rwaao na nî tuî antû ba mwîrîga jwaao.”

⁵Musa nawe nî aarîîrie antû ba Israeli kûringana na ûrîa MWATHANI aamwîrîte arabeera atîrî, “Mwîrîga jwa nchiarwa cia Josefu nî jûkuuga nteto cia mma.

⁶MWATHANI ariuga ûjû mantû jegiî aarî ba Zelofehadi, ‘Rekaneni nabo bagûrwe nî arûme barîa bakeenda bunka arûme bau beethîrwe barî mwîrîga jwaao.

⁷Rûgai rwa antû ba Israeli rûtîbuîrîte kûritwa mwîrîgeene jûmwe rwikua jûngî, tontû no mwanka antû bonthe ba Israeli bakare rûteere rwa nthîgûrû îrîa mwîrîga jwaao jûgaîri.

⁸O bunka mûka ûrîa ûkagaîrwa rûgai mwîrîgeene kinya jûrîkû jwa antû ba Israeli no mwanka ajûkue mwîrîgeene jûu nî muntû wa mwîrîga jwaao. Tontû bûû, antû bonthe ndeene ya Israeli bakaagaîrwa rûgai mwîrîgeene jwaao.

⁹Tontû bûû, gûtî rûgai rûkaaritwa mwîrîgeene jûmwe rwikua mwîrîgeene jûngî. Nîkwîthîrwa no mwanka mîîrîga ya antû ba Israeli îkare kûrîa îgaîri rûgai.’”

¹⁰Nabo aarî ba Zelofehadi nî baathithîrie ûrîa Musa eerîtwe nî MWATHANI.

¹¹Tontû bûû, aarî bau ba Zelofehadi, tabo Mahala, na Tiriza, na Hogila, na Milika, na Noa, nî baagûrîrwe nî antû ba ndûgû ya Zelofehadi.

¹²Nî bagûrîrwe mîciîne ya mwîrîga jwa Manase. Manase aarî mûtaana wa Josefu. Naru rûgai rwa aarî bau ba Zelofehadi nî rwaakarîre kûu mwîrîgeene jwaao.

¹³Jau nîjo maathana na mawaatho jarîa MWATHANI eerîre Musa. Ningî nîjo Musa eerîre antû ba Israeli barî bûûrîîne ya Moabu rûteere rwa mûuro jwa Jorodani akuî na Jeriko.