Read KIMERU BIBLE PROTESTANT EDITION Gût 4 Bible Online

Gût 4 - KIMERU BIBLE PROTESTANT EDITION bible

Gût 4

¹MWATHANI nî aarîîrie Musa na Aaroni arabeera atîrî,

²“Tara Alawi barîa barî nchiarwa cia Kohathi kûringana na mîciî yaao na mîîrîga yaao.

³Ûbatare kuuma arûme ba mîaka mîrongo îthatû mwanka arûme ba mîaka mîrongo îtaano, bonthe barîa boomba kûrita ngûgî îemeene rîa gûtirimanîra.

⁴Ngûgî îrîa nchiarwa cia Kohathi ikaaritaga îemeene rîa gûtirimanîra nî kûmenyagîîra into birîa itheru buru.

⁵“Rîrîa îgiita rîa kwambûra kambî rîgakinya, Aaroni na ataana baawe bagaakûrûkaga îemeene rîa gûtirimanîra bagacuurûkia itambaa, bagakunîkîra Îthandûkû rîa kîrîkanîro nabio.

⁶Ningî bakarîkunîkagîra na mûgûûta jwa mbûri, na bacokage bakarîkunîkîra na gîtambaa kîa rangi ya wiirû bwa îgûrû bunka. Rîu batonyithie mîgaamba îrîa ya kûrîkamata.

⁷“Ningî bakaaraga gîtambaa kîa rangi ya wiirû bwa îgûrû meetheene îrîa yeekagwa mîgaate îrîa mbathûrîri. Meetheene îîu nîyo beekaga thaani, na mpakûri cia ubaani, tûnyongû twa gwîkîra ndibei ya kîgongwana gîa gwîtûûrîria. Nayo mîgaate îrîa nditagîrwa no mwanka îîthagîrwe îrî o magiita jonthe.

⁸Rîu bakunîkîre into biu na gîtambaa gîgîtuune tunî, na bacoke babikunîkîre na mûgûûta jwa mbûri, na batonyithie mîgaamba ya gûkamata Îthandûkû rîa kîrîkanîro.

⁹Ningî bajûkîe nguû ya rangi ya wiirû bwa îgûrû bakunîkîre gîtugî kîrîa kîrîkagîîrwa taawa, amwe na taawa ciaakîo, na mîgwati ya ntambi ciaacio, na tûraî twa gwîkîra mwanki, na into bionthe birîa bitumagîrwa gwîkîra maguta taweene.

¹⁰Nakîo gîtugî gîa taawa, amwe na into biaakîo bionthe bikunîkîrwe na mûgûûta jwa mbûri biîkwe karûtareene karîa biakamatagîrwa.

¹¹Ningî bakunîkîre kîritîro kîa igongwana kîrîa kîaathithîtue na thaabu na gîtambaa kîa rangi ya wiirû bwa îgûrû. Bacoke bagîkunîkîre na mûgûûta jwa mbûri. Rîu batonyithie mîgaamba ya gûgîkamata.

¹²Bajûkie into bionthe birîa bitumagîrwa îemeene rîa gûtirimanîra babikunîkîre na gîtambaa kîa rangî ya wiirû bwa îgûrû, na babikunîkîre na mûgûûta jwa mbûri. Rîu babirîkîîre karûtareene ga kûbikamata.

¹³Ningî barite mûju kîritîroone kîa igongwana bagîkunîkîre na gîtambaa kîa rangi ya mûkû.

¹⁴Bacoke bajûkie into bionthe birîa bitumagîrwa kîritîroone kîa igongwana babirîkîîre îgûrû rîaakîo. Nabio nî tûraî twa gûkamata mwanki na iciko bia gûtaa mûju na tûraî. Ningî babikunîkîre na mûgûûta jwa mbûri na batonyithie mîgaamba ya gûgîkamata.

¹⁵Aaroni na ataana baawe baathiria gûkunîkîra îema rîa gûtirimanîra na gûkunîkîra into bionthe birîa bitumagîrwa ku rîrîa kambî îkwambûrwa, nîrîo nchiarwa cia Kohathi igaakamataga îema rîu rîa gûtirimanîra na into biaarîo. Îndî batîbuîrîte kûbiringithia batîkeeje gûkua. Îîu nîyo ngûgî ya nchiarwa cia Kohathi îemeene rîa gûtirimanîra.

¹⁶“Eleazari mûtaana wa Aaroni ûu mûthînjîri-Mûrungu nîwe ûkamenyagîîra maguta ja taawa, na ubaani, na igongwana bia irio birîa biritagwa magiita jonthe na maguta jarîa jatumagîrwa kwathûra antû. Ningî akamenyagîîra îema rîa gûtirimanîra rîonthe, na amenyagîîre antû arîa atheru, na into birîa bionthe bitumagîrwa antû au.”

¹⁷Ningî MWATHANI nî aarîîrie Musa na Aaroni arabeera atîrî,

¹⁸“Bûkárekeeria antû ba nchiarwa cia Kohathi bathirua kuuma mwîrîgeene jwa Alawi.

¹⁹Aaroni na ataana baawe nîbo bageetaga akuî na îema rîa gûtirimanîra na nîbo bakaeejaga nchiarwa cia Kohathi ngûgî îrîa bakaritaga na mîrigo îrîa o muntû agakamataga.

²⁰Îndî antû ba nchiarwa cia Kohathi batîbuîrîte gûtonya îemeene rîa gûtirimanîra bategeera into birîa itheru, batîkeeje gûkua.”

²¹MWATHANI nî aarîîrie Musa aramwîra atîrî,

²²“Tara nchiarwa cia Gerishoni kinya cio kûringana na mîciî yaao na mîîrîga yaao;

²³ûbatare kuuma arûme ba mîaka mîrongo îthatû mwanka arûme ba mîaka mîrongo îtaano, barîa bonthe boomba kûrita ngûgî, îemeene rîa gûtirimanîra.

²⁴Ngûgî îrîa nchiarwa cia Gerishoni ikaaritaga îemeene nî gûtumîkîra na gûkamataga into bibi:

²⁵Nîbo bagaakamataga itambaa bia îema rîa gûtirimanîra, na îema rîa gûtirimanîra rîongwa amwe na itambaa birîa birîkunîkaga na mûgûûta jwa mbûri jwa kûrîkunîkîra, na gîtambaa kîa mwari jwa îema rîa gûtirimanîra.

²⁶Bagaakamataga itambaa bia kîarago, na itambaa bia mpingîro ya kîarago kîrîa kîthiûrûkîrîte îema rîa gûtirimanîra na kîritîro kîa igongwana. Ningî nîbo bagaakamataga mîrigi îrîa îcuuragia itambaa biu, na into bingî bionthe birîa bitumagîrwa. Bakamenyagîîra into biu, ûrîa bibuîrîte kûmenyagîîrwa.

²⁷Ngûgî cionthe irîa nchiarwa cia Gerishoni ikaaritaga ikaarûngamagîîrwa nî Aaroni na ataana baawe. Nîbo bakoonagia nchiarwa iu cia Gerishoni ngûgî iu, na mantû jonthe jarîa ikaathithagia.

²⁸Iu nîcio ngûgî irîa nchiarwa cia Gerishoni ikaaritaga îemeene rîa gûtirimanîra. Ngûgî iu ikarûngamagîîrwa nî Ithamari mûtaana wa Aaroni mûthînjîri-Mûrungu.”

²⁹MWATHANI nî aarîîrie Musa aramwîra atîrî, “Tara nchiarwa cia Merari kûringana na mîciî yaao na mîîrîga yaao.

³⁰Ûbatare kuuma arûme ba mîaka mîrongo îthatû mwanka ba mîaka mîrongo îtaano barîa boomba kûrita ngûgî îemeene rîa gûtirimanîra.

³¹Ngûgî irîa nchiarwa cia Merari ikaaritaga îemeene rîa gûtirimanîra nî gûkamataga mîînjîro ya îema rîa gûtirimanîra, na mîgaamba yaarîo, na itugî biaarîo na ikinyithio biaabio,

³²na itugî birîa bithiurûkîrîte kîarago na ikinyithio biaabio, na biaango biaabio, na mîrigi yaayo, na into bingî bionthe birîa bitumagîrwa amwe nabio. Naagwe wîrage o muntû o muntû gîntû kîrîa agaakamataga.

³³Iu nîcio ngûgî irîa nchiarwa cia Merari ikaaritaga îemeene rîa gûtirimanîra. Ngûgî iu ikaarûngamagîîrwa nî Ithamari mûtaana wa Aaroni ûrîa mûthînjîri-Mûrungu.”

³⁴Musa, na Aaroni, na atongeeria ba kîûthûrano kionthe kîa antû ba Israeli nî baatarîre nchiarwa cia Kohathi kûringana na mîciî yaao na mîîrîga yaao.

³⁵Baatarîrwe kuuma arûme ba mîaka mîrongo îthatû mwanka ba mîaka mîrongo îtaano, barîa boomba kûrita ngûgî îemeene rîa gûtirimanîra.

³⁶Arûme ba mwîrîga jwa Kohathi barîa baatarîrwe baarî ngiri ijîîrî cia magana mûgwanja ja mîrongo îtaano (2,750).

³⁷Bau bonthe baatumîkaga îemeene rîa gûtirimanîra. Ningî nîbo baatarîrwe nî Musa na Aaroni o ta ûrîa MWATHANI eerîte Musa.

³⁸Nacio nchiarwa cia Gerishoni nî ciaatarîrwe kûringana na mîciî yaao na mîîrîga yaao.

³⁹Baatarîrwe arûme ba kuuma mîaka mîrongo îthatû mwanka ba mîaka mîrongo îtaano, barîa boomba kûrita ngûgî îemeene rîa gûtirimanîra.

⁴⁰Arûme bau baatarîrwe kûringana na mîciî yaao baarî antû ngiri ijîîrî cia magana jatantatû ja mîrongo îthatû (2,630).

⁴¹Bau nîbo arûme barîa ba nchiarwa cia Gerishoni barîa bonthe boomba gûtumîka îemeene rîa gûtirimanîra, barîa baatarîrwe nî Musa na Aaroni o ta ûrîa MWATHANI aaugîîte.

⁴²Nacio nchiarwa cia Merari nî ciaatarîrwe kûringana na mîciî yaao na mîîrîga yaao.

⁴³Baatarîrwe arûme ba mîaka mîrongo îthatû mwanka ba mîaka mîrongo îtaano, barîa bonthe boomba kûrita ngûgî îemeene rîa gûtirimanîra.

⁴⁴Arûme bau baatarîrwe kûringana na mîîrîga yaao baarî antû ngiri ithatû cia magana jaîrî (3,200).

⁴⁵Bau nîbo nchiarwa cia Merari, irîa ciaatarîrwe kûringana na mîîrîga yaao nî Musa na Aaroni, o ta ûrîa MWATHANI eerîte Musa.

⁴⁶“Tontû bûû, Alawi bonthe nî baatarîrwe nî Musa, na Aaroni na atongeeria ba Israeli kûringana na mîciî yaao na mîîrîga yaao.

⁴⁷Arûme bonthe ba mîaka mîrongo îthatû mwanka ba mîaka mîrongo îtaano, barîa bonthe boomba gûtumîkîra îemeene rîa gûtirimanîra na kûrîkamata,

⁴⁸baarî antû ngiri inyaanya cia magana jataano ja mîrongo înaana (8,580).

⁴⁹Musa nî aabatarîre na araboonia ngûgî irîa bakaritaga na into birîa bagaakamataga o ta ûrîa MWATHANI aamwîrîte.”