Read KIMERU BIBLE PROTESTANT EDITION Gût 5 Bible Online

Gût 5 - KIMERU BIBLE PROTESTANT EDITION bible

Gût 5

¹MWATHANI nî arîîrie Musa aramwîra atîrî,

²“Îîra antû ba Israeli nî beenge kuuma kambîîne antû bonthe barîa barî na mûrimo jûmûthûûku jwa gîkonde, kana barîa bonthe bakuumwa nî maira kana tharike, na barîa bonthe bagîte mûgiro nîûntû bwa gûtonga kiimba.

³Nabo antû bau bëethîrwa barî arûme kana aka no mwanka beengwe baumagarue oome ya kambî nîkenda batîgeekîre kambî ciaao mûgiro kûrîa ntûûraga amwe nabo.”

⁴Nabo antû ba Israeli bareenga antû bau, barabaumagaria oome ya kambî, o ta ûrîa MWATHANI eerîte Musa.

⁵ Ningî MWATHANI nî aarîîrie Musa aramwîra atîrî,

⁶“Îîra antû ba Israeli ûjû: Rîrîa ntomûrûme kana mûka akaatîria muntû ûngî, agátiga kwaa mwîtîkua kîrî ni. Muntû ûu akeethîrwa eeîîtie.

⁷No mwanka aumbûre meeyia jaawe jarîa athithîtie. Ningî akaarîaa muntû ûu athûûkîrîîtie. Acoke oongeere gîchunchî kîmwe kîrî bitaano kîa birîa akûrîaa.

⁸Îndî muntû ûu ûthûûkîrîîtue akëeja gûkua na gûkeethîrwa gûtî muntû wa ndûgû ciaao ûûmba kûrîwa îrîi rîu, mûthînjîri-Mûrungu nîwe ûkaanenkerwa îrîi rîu antûûne aakwa. Îrîi rîu, rîa kûthiria ûthûûku nî mpongeeri ya rîa ntûrûme îrîa ya kîgongwana gîa kûthiria meeyia.

⁹Ningî biewa bionthe amwe na into bingî bibitheru bionthe, birîa biritagwa nî antû ba Israeli nî binenkagîrwe mûthînjîri-Mûrungu nîûntû nî biaawe.

¹⁰Muntû wonthe ûrîa wîthagîrwa arî na into bibitheru, into biu nî biaawe. Îndî birîa bionthe binenkagîrwa mûthînjîri-Mûrungu nî biaawe.”

¹¹Ningî MWATHANI nî aarîîrie Musa aramwîra atîrî,

¹²“Îîra antû ba Israeli ûjû: Mwekûrû wa muntû akëeja gûtaratara akeethîrwa atî mwîtîkua kîrî mûkûrû waawe,

¹³mwekûrû ûû akëeja kûthengeerwa nî ntomûrûme ûngî, na mantû jau jatîmenyekane kîrî mûkûrû waawe, kana jamenyekana kîrî muntû ûngî nîûntû gûtî we wamûgwata ûmaramariine bûu,

¹⁴nawe mûrûme wa mwekûrû ûu, akëeja kûrega kûmwîtîkia, mwekûrû eethîrwa arî mûmaramari kana atî mûmaramari;

¹⁵mûrûme wa mwekûrû ûu abuîrîte kûmwikia kîrî mûthînjîri-Mûrungu. Ningî mûkûrû wa mwekûrû ûu abuîrîte gwikia kîgongwana kîa irio nîûntû bwa mwekûrû ûu waawe. Nakîo kîgongwana kîîthîrwe kîrî gîa kilo îmwe ya mûtu jwa mûnyaki, jûtiungeenue na maguta ja nzeituni kana juunganua na ubaani. Nîkwîthîrwa kîu nî kîgongwana kîriti nîûntû ntomûrûme atîgwîtîkia mwekûrû waawe, na kîriti nîkenda ûûma bûmenyekana.

¹⁶“Mûthînjîri-Mûrungu agaikia mwekûrû ûu akuî na kîritîro kîa igongwana au mbere ya MWATHANI.

¹⁷Ningî ageekîra rûûjî rûrûtheru kongûûne. Acoke ajûkie mûthetu jûrîa jûrî nthî îemeene rîa gûtirimanîra ajwîkîre rûûjîîne rûu.

¹⁸Rîu mûthînjîri-Mûrungu agaatûma mwekûrû ûu arûngame mbere ya MWATHANI, akaogora mûtuundu jwa mwekûrû ûu, na atûme mwekûrû ûu agwatîîra kîgongwana kîrîa kîa irio, kîrîa kîriti nîûntû mwekûrû ûu atîgwîtîkua nî mûkûrû waawe.

¹⁹Mûthînjîri-Mûrungu akauga nteto iji nîkenda atûma mwekûrû ûu aciîtia. ‘Ûkëeja kwîthîrwa ûtáthenganîîra na ntomûrûme ûngî kuuma rîrîa waagûrîrwe nî mûkûrû waaku, na ûkëethîrwa îgiiteene rîu ûtámaramara, kîrumi kîrîa kîîjanagia na rûûjî rûrû rwa ng'ana gîtîkûgwata.

²⁰Îndî ûkëeja kwîthîrwa kûrî rîo waataratara kuuma rîrîa mûkûrû waaku aakûjûkîrie, ûkëethîrwa nî ûmaramarîte na ûkëethîrwa ûrathenganîîra na ntomûrûme ûngî tiga mûkûrû waaku,

²¹MWATHANI arotûma antû beenu bagakûmeneeria na bagakûgwatithia kîrumi. Arotûma ûgacicimara gûntû gwaaku kwa ûka naagwe ûkaa nthaata. (Ûu nîu mûthînjîri-Mûrungu agaatûmaga mwekûrû ta ûu aciîtia mûciîtio jwa kîrumi.)

²²Naru rûûjî rûrîa rûreetaga kîrumi rûrotonya kîu gîaaku, rûgatûma ûgaciincimara gûntû gwaaku kwa ûka, naagwe ûkaa nthaata.’ Nawe mwekûrû akauga, ‘Îî nî gûkare o ûu.’

²³“Mûthînjîri-Mûrungu akaandîka kîrumi kîu Yukuune, acoke athambie maandîko na rûûjî rûu rwa ng'ana.

²⁴Nawe akaanyuithia mwekûrû ûu, rûûjî rûu rwa ng'ana rûrîa rwa kûreeta kîrumi. Naru rûûjî rûu rwatonya kîu rwoomba gûtûma mwekûrû ûu aigue ûrûrû mono.

²⁵Nîrîo mûthînjîri-Mûrungu akajûkia kîgongwana kîa irio kîrîa kîriti nîûntû bwa ntomûrûme kûrega gwîtîkia mwekûrû waawe, kuuma njareene cia mwekûrû ûu, agîûkîîrie mbere ya MWATHANI, na agiikie kîritîroone kîa igongwana.

²⁶Mûthînjîri-Mûrungu acoke arûme mûtu jwa kîgongwana kîu kîa irio na nkuundi jûrî jwa kûririkanagwa, ajwîîthîrie kîritîroone kîa igongwana. Nyuma ya ûu, anyuithie mwekûrû ûu rûûjî.

²⁷Mwekûrû ûu akëethîrwa amaramarîte, na akëethîrwa atî mwîtîkua kîrî mûkûrû waawe, anyuithua rûûjî rûu rwa kîrumi rûgaatonya kîu kîaawe rûtûme aigue ûrûrû mono. Mwekûrû agaciincimana gûntû kwaawe kwa ûka ae nthaata. Ningî mwekûrû ûu akaamenagîîrua nî antû baao.

²⁸Îndî mwekûrû ûu akëethîrwa atámaramara, nawe akeethîrwa arî ûmûtheru, atîgwatwa nî kîrumi. Nawe akeethîrwa akîûmbaga gûciara aana.

²⁹“Bûu nîbu Waatho bûrîa bûbuîrîte kûthingatagwa rîrîa ntomûrûme atîgwîtîkia mwekûrû waawe. Bûthingatagwe rîrîa mwekûrû amaramara na agûri.

³⁰Kana rîrîa ntomûrûme atîgwîtîkia mwekûrû waawe. Ntomûrûme ûu agaikagia mwekûrû waawe mbere ya MWATHANI. Nawe mûthînjîri-Mûrungu agaatûmaga mwekûrû ta ûu athingata Waatho bûu.

³¹Mûrûme wa mwekûrû ta ûu atîîthagîrwa arî na maatia, îndî mwekûrû ta ûu agakanûkagua nîûntû bwa meeyia jaawe.”