Read KIMERU BIBLE PROTESTANT EDITION Gût 6 Bible Online

Gût 6 - KIMERU BIBLE PROTESTANT EDITION bible

Gût 6

¹MWATHANI nî aarîîrie Musa aramwîra atîrî,

²“Îîra antû ba Israeli ûjû: Rîrîa ntomûrûme kana mûka agaciîtia mûciîtio jwa mwanya jwa kwaa Mûnaziri,[1] nîkenda atûmîkagîra MWATHANI,

³ muntû ûu atîbuîrîte kûnyua ndibei kana gîntû kîngî gîa kwogitia. Atîbuîrîte kûnyua ndibei îrî na nchechû. Atîbuîrîte kûnyua rûûjî rwa nzabibû kana arîa nzabibû ciethîrwa irî injûmo kana imbîthî.

⁴Rîrîa rîonthe muntû ûu agakara arî mûnaziri atîbuîrîte kûrîa gîntû kiumanîtie na mîzabibû; kîethîrwa kîrî mpîndî kana gîkonde kîa nzabibû.

⁵“Îgiita rîonthe rîrîa muntû akethagîrwa arî Mûnaziri atîbuîrîte kwenjwa. Îgiita rîu rîonthe akethagîrwa aciathûrîte kîrî MWATHANI, abuîrîte gûkara arî ûmûtheru atîkwenjwa.

⁶Rîrîa rîonthe agakara aciathûrîte kîrî MWATHANI atîbuîrîte gwîta akuî na kiimba.

⁷Kinya îthe kana ng'ina, kana mûtaana wa ng'ina, kana mwarî wa ng'ina agakua, Mûnaziri atîbuîrîte gûciîkîra mûgiro nîûntû bwaao nîûntû nî aathûri aa ûmûtheru kîrî MWATHANI.

⁸Îgiita rîonthe akethagîrwa arî ûmûtheru nîûntû nî aciathûrîte kîrî MWATHANI.

⁹Muntû akëeja gûkua ntûti arî akuî na mûnaziri, mûtuundu jwa mûnaziri ûu jûkagîa mûgiro. Mûnaziri ûu athiria ntukû ithanthatû nî eenjwe ntukû ya mûgwanja.

¹⁰Ntukû ya inyaanya yakinya no mwanka aikîrie mûthînjîri-Mûrungu ijea biîrî kana nkûngûthikû ijîîrî au mwariine jwa îema rîa gûtirimanîra.

¹¹Mûthînjîri-Mûrungu akaarita kîjea kîmwe kîrî kîgongwana gîa kûthiria meeyia na arite kîngî kîrî kîgongwana gîa gwakîîria. Kîgongwana gîa kûthiria meeyia ja mûnaziri gîkaaritwa nîûntû mûnaziri nî aagîîre mûgiro rîrîa muntû akuîre arî akuî nawe. O ntukû îîu nîyo akaatheria mûtwe jwaawe.

¹²Ningî muntû ta ûu abuîrîte gwikia gatûrûme ka mwaka jûmwe ga kîgongwana gîa kûthiria maatia, na abuîrîte gûciathûra kîrî MWATHANI o kaîrî. Narîo îgiita rîrîa aathirîtie mbere arî mûnaziri rîtîtarwa nîûntû kwathûrwa kwaawe nî kwaarî gûkûgîa mûgiro.

¹³ Rîrîa mûnaziri athiria îgiita rîaawe rîa gûciathûra, akaathingataga Waatho bûbû: Akaareetagwa mwariine jwa îema rîa gûtirimanîra.

¹⁴Mûnaziri ta ûu akaanditagîra gatûrûme gatî na antû athûûku ka mwaka jûmwe karî kîgongwana gîa gwakîîria. Ningî aritage kang'ondu ka mwaka jûmwe gatî na antû athûûku karî kîgongwana gîa kûthiria meeyia, na aritage ntûrûme îmwe îtî na antû athûûku îrî kîgongwana kîa gûcwaa thîîrî.

¹⁵Acoke aritage kîtheti kîa mîgaate îtiimbithîtue na tûmîgaate tûkaandi na mûtu jûmwinyu juunganîtue na maguta ja nzeituni, na tûmîgaate tûtiimbithîtue twaki maguta ja nzeituni. Ningî arite kîgongwana kîa irio na gîa gwîtûûrîria.

¹⁶Nawe mûthînjîri-Mûrungu akaajûkia into biu abireete mbere ya MWATHANI abirite birî kîgongwana gîa kûthiria meeyia na gîa gwakîîria.

¹⁷Ningî akaaritîra MWATHANI ntûrûme îrî kîgongwana gîa gûcwaa thîîrî. Aritanîrie kîgongwana kîu amwe na kîtheti kîmwe kîa mîgaate itiimbithîtue. Acoke arite kîgongwana kîa irio na kîa gwîtûûrîria.

¹⁸Nawe mûnaziri ûu, akeenjerwa mûtuundu jwaawe au mwariine jwa îema rîa gûtirimanîra. Mûtuundu jûu jwa rîrîa araciathûrîte kîrî MWATHANI jwenjwa jûgeekîrwa mwankiine rungu rwa kîgongwana gîa gûcwaa thîîrî.

¹⁹Mûthînjîri-Mûrungu akaajûkia guoko gwa ntûrûme kûrugi na ajûkie kamûgaate gatiimbithîtue kuuma kîthetiine na ajûkie kamûgaate gakoothû anenkere mûnaziri. Mûnaziri eenjwa nîrîo akaanenkerwa into biu.

²⁰Mûthînjîri-Mûrungu agookîîria into biu kîrî MWATHANI abirite birî kîgongwana gîa gûkîîria. Biu nî igongwana bibitheru na nî bia mûthînjîri-Mûrungu, o amwe na nyama cia kîbara, na kûgûrû gwa ntûrûme. Nyuma ya mantû jau, mûnaziri oomba kûnyua ndibei.

²¹“Jau nîjo mawaatho jegiî mûnaziri. Nawe akaritagîra MWATHANI kîgongwana kûringana na mûciîtio jwaawe jwa gûciathûra. Ëethîrwa aciîtîtie kûrita nkûrûki ya ûrîa akûûmba, no mwanka arite, kûringana na waatho bûu bwa gûciathûra arî mûnaziri.”

²²MWATHANI nî aarîîrie Musa aramwîra atîrî,

²³“Îîra Aaroni na ataana baawe ûjû, ‘Bûtharimage antû ba Israeli bûkiugaga:

²⁴MWATHANI arobutharima na akabûkaragia.

²⁵MWATHANI arobûgunaga na agatûma bûthinyaara.

²⁶MWATHANI arobwigagîîrua kîaao na akabweejaga thîîrî.’

²⁷Nabo batharimaga antû ba Israeli na riîtwa rîaakwa, naani nkaabatharimaga.”