Read KIMERU BIBLE PROTESTANT EDITION Gût 7 Bible Online

Gût 7 - KIMERU BIBLE PROTESTANT EDITION bible

Gût 7

¹Ntukû îrîa Musa aathirîrie gwaka îema rîa gûtirimanîra, nîyo aarîathûûrîre na ararîtheria na njîra ya gwîtûûrîria maguta amwe na into biaarîo bionthe. Ningî nî aathûûrîre kîritîro kîa igongwana arakîtheria na njîra ya gwîtûûrîria maguta amwe na into biaakîo bionthe.

²Rîu atongeeria ba Israeli barîa baarûngamîrîte mîîrîga yaao na baarûngamîrîte gûtarwa kwa antû,

³nî baaretere biewa biaao kîrî MWATHANI. Biewa biu baareetere biaarî tûgaarî twa gûkururia tûtaantatû tûkunîki, na ndeegwa îkûmi na ijîîrî. O atongeeria baîrî baareetaga kagaarî kamwe ga gûkururia, na o mûtongeeria akareeta ndeegwa îmwe, au îemeene rîa gûtirimanîra.

⁴Ningî MWATHANI nî aarîîrie Musa aramwîra atîrî,

⁵“Jûkia biewa biu biaao nîkenda bitumagîrwa ngûgîîne cia îema rîa gûtirimanîra. Ningî ûbinenkanîre kîrî Alawi kûringana na ngûgî irîa muntû akaritaga.”

⁶Tontû bûû, Musa arajûkia tûgaarî tûu twa gûkururua amwe na ndeegwa iu, aranenkera Alawi.

⁷Aranenkera nchiarwa cia Gerishoni tûgaarî twîrî twa gûkururua amwe na ndeegwa inya, kûringana na ngûgî irîa baaritaga.

⁸Aranenkera nchiarwa cia Merari tûgaarî tûna twa gûkururua amwe na ndeegwa inyaanya, kûringana na ngûgî irîa baaritaga. Nabo batongagîîrua nî Ithamari mûtaana wa Aaroni ûrîa waarî mûthînjîri-Mûrungu.

⁹Îndî gûtî bio aanenkeere nchiarwa cia Kohathi nîûntû ngûgî yaao yaarî ya kûmenyagîîra into birîa itheru, nabio biu biakamatagwa na ituro.

¹⁰Nabo atongeeria nî baaritîre biewa ntukû îrîa kîritîro kîa igongwana kîaathûrîrwe na kîratherua. Baabiritîre barabiîka au kîritîroone kîa igongwana.

¹¹MWATHANI nî eerîre Musa atîrî, “O ntukû mûtongeeria akaaritaga kîewa kîaawe nîûntû bwa kûtherua gwa kîritîro kîa igongwana.”

¹²Nahashoni mûtaana wa Aminadabu kuuma mwîrîgeene jwa Juda, nîwe waaritîre kîewa kîaawe ntukû ya mbere.

¹³Kîewa kîaawe kîaarî kîa mpakûri ya fetha, ya ûrito bwa kilo îmwe na nusu, na karaî ga fetha ka ûrito bwa akuî kilo îmwe. Mpakûri îîu na karaî kau, biojûri mûtu jûmwinyu jungeenue na maguta ja nzeituni, nîkenda bitumîrwa birî kîgongwana kîa irio.

¹⁴Ningî nî aaritîre mpakûri îmwe ya thaabu ya ûrito bwa gîchunchî kîmwe kuuma kîrî îkûmi gîa kilo imwe yûûjûri ubaani,

¹⁵Aracoka ararita kareegwa na ntûrûme, na gatûrûme ka mwaka jûmwe nîkenda biritwa birî kîgongwana gîa gwakîîria.

¹⁶Ningî ararita nthenge nîûntû bwa kîgongwana gîa kûthiria meeyia.

¹⁷Aracoka ararita ndeegwa ijîîrî, na ntûrûme ithaano, na ntheenge ithaano, na tûtûrûme tûtaano twa mwaka jûmwe birî kîgongwana kîa thîîrî. Kîu nîkîo kîewa kîrîa Nahashoni mûtaana wa Aminadabu aaritîre.

¹⁸Nethaneli tawe mûtongeeria wa mwîrîga jwa Isakari, mûtaana wa Zauri nîwe waaritîre kîewa ntukû ya ijîîrî.

¹⁹Kîewa kîaawe kîaarî kîa mpakûri ya fetha, ya ûrito bwa kilo îmwe na nusu, na karaî ka fetha ka ûrito bwa akuî kilo îmwe. Mpakûri îîu na karaî kau biojûri mûtu jûmwinyu juungeenue na maguta ja nzeituni nîkenda bitumîrwa birî kîgongwana kîa irio.

²⁰Ningî nî aaritîre mpakûri îmwe ya thaabu ya ûrito bwa gîchunchî kîmwe kuuma kîrî îkûmi gîa kilo yûûjûri ubaani.

²¹Aracoka ararita kareegwa, na ntûrûme, na gatûrûme ka mwaka jûmwe nîkenda biritwa birî kîgongwana gîa gwakîîria.

²²Ningî ararita nthenge nîûntû bwa kîgongwana gîa kûthiria meeyia.

²³Aracoka ararita ndeegwa ijîîrî, na ntûrûme ithaano, na nthenge ithaano, na tûtûrûme tûtaano twa mwaka jûmwe birî bia kîgongwana kîa thîîrî. Kîu nîkîo kîaarî kîewa kîa Nethaneli mûtaana wa Zauri.

²⁴Eliabu tawe mûtongeeria wa mwîrîga jwa Zabuluni, mûtaana wa Heloni, nîwe waaritîre kîewa kîaawe ntukû ya ithatû.

²⁵Kîewa kîaawe kîaarî kîa mpakûri ya fetha ya ûrito bwa kilo îmwe na nusu, na karaî ga fetha ka ûrito bwa akuî kilo îmwe. Mpakûri îîu na karaî kau biojûri mûtu jûmwinyu juungeenue na maguta ja nzeituni nîkenda bitumîrwa birî kîgongwana kîa irio.

²⁶Ningî nî aaritîre mpakûri îmwe ya thaabu ya ûrito bwa gîchunchî kîmwe kuuma kîrî îkûmi gîa kilo yûûjûri ubaani.

²⁷Aracoka ararita kareegwa, na ntûrûme, na gatûrûme ka mwaka jûmwe, nîkenda biritwa birî kîgongwana gîa gwakîîria.

²⁸Ningî ararita nthenge nîûntû bwa kîgongwana gîa kûthiria meeyia.

²⁹Aracoka ararita ndeegwa ijîîrî, na ntûrûme ithaano, na nthenge ithaano, na tûtûrûme tûtaano twa mwaka jûmwe birî bia kîgongwana kîa thîîrî. Kîu nîkîo kîaarî kîewa kîa Eliabu mûtaana wa Heloni.

³⁰Elizuri tawe mûtongeeria wa mwîrîga jwa Rubeni, mûtaana wa Shedeuri, nîwe waaritîre kîewa kîaawe ntukû ya inya.

³¹Kîewa kîaawe kîaarî mpakûri ya fetha ya ûrito bwa kilo îmwe na nusu, na karaî ka fetha ka ûrito bwa akuî kilo îmwe. Mpakûri îîu na karaî kau biojûri mûtu jûmwinyu juungeenue na maguta ja nzeituni, nîkenda bitumîrwa birî kîgongwana kîa irio.

³²Ningî nî aaritîre mpakûri îmwe ya thaabu ya ûrito bwa gîchunchî kîmwe kuuma kîrî îkûmi gîa kilo, yûûjûri ubaani.

³³Aracoka ararita kareegwa, na ntûrûme, na gatûrûme ka mwaka jûmwe nîkenda biritwa birî kîgongwana gîa gwakîîria.

³⁴Ningî ararita nthenge nîûntû bwa kîgongwana gîa kûthiria meeyia.

³⁵Aracoka ararita ndeegwa ijîîrî na ntûrûme ithaano, na nthenge ithaano, na tûtûrûme tûtaano twa mwaka jûmwe birî bia kîgongwana kîa thîîrî. Kîu nîkîo kîaarî kîewa kîa Elizuri mûtaana wa Shedeuri.

³⁶Shelumieli tawe mûtongeeria wa mwîrîga jwa Simioni, mûtaana wa Zurishadai, nîwe waaritîre kîewa kîaawe ntukû ya ithaano.

³⁷Kîewa kîaawe kîaarî mpakûri ya fetha ya ûrito bwa kilo îmwe na nusu, na karaî ka fetha ka ûrito bwa akuî kilo îmwe. Mpakûri îîu na karaî kau biojûri mûtu jûmwinyu juungeenue na maguta ja nzeituni, nîkenda bitumîrwa birî kîgongwana kîa irio.

³⁸Ningî nî aaritîre mpakûri îmwe ya thaabu ya ûrito bwa gîchunchî kîmwe kuuma kîrî îkûmi gîa kilo, yûûjûri ubaani.

³⁹Aracoka ararita kareegwa, na ntûrûme na gatûrûme ka mwaka jûmwe nîkenda biritwa birî kîgongwana gîa gwakîîria.

⁴⁰Ningî ararita nthenge nîûntû bwa kîgongwana gîa kûthiria meeyia.

⁴¹Aracoka ararita ndeegwa ijîîrî na ntûrûme ithaano, na nthenge ithaano, na tûtûrûme tûtaano twa mwaka jûmwe birî bia kîgongwana kîa thîîrî. Kîu nîkîo kîaarî kîewa kîa Shelumieli mûtaana wa Zurishadai.

⁴²Eliasafu mûtongeeria wa mwîrîga jwa Gadi, mûtaana wa Deueli, nîwe waaritîre kîewa kîaawe ntukû ya ithanthatû.

⁴³Kîewa kîaawe kîaarî mpakûri ya fetha ya ûrito bwa kilo îmwe na nusu, na karaî ka fetha ka ûrito bwa akuî kilo îmwe. Mpakûri îîu na karaî kau biojûri mûtu jûmwinyu juungeenue na maguta ja nzeituni, nîkenda bitumîrwa birî kîgongwana kîa irio.

⁴⁴Ningî nî aaritîre mpakûri îmwe ya thaabu ya ûrito bwa gîchunchî kîmwe kuuma kîrî îkûmi gîa kilo, yûûjûri ubaani.

⁴⁵Aracoka ararita kareegwa, na ntûrûme na gatûrûme ka mwaka jûmwe nîkenda biritwa birî kîgongwana gîa gwakîîria.

⁴⁶Ningî ararita nthenge nîûntû bwa kîgongwana gîa kûthiria meeyia.

⁴⁷Aracoka ararita ndeegwa ijîîrî na ntûrûme ithaano, na nthenge ithaano, na tûtûrûme tûtaano twa mwaka jûmwe birî bia kîgongwana kîa thîîrî. Kîu nîkîo kîaarî kîewa kîa Eliasafu mûtaana wa Deueli.

⁴⁸Elishama tawe mûtongeeria wa mwîrîga jwa Efuraimu, mûtaana wa Amihudi, nîwe waaritîre kîewa kîaawe ntukû ya mûgwanja.

⁴⁹Kîewa kîaawe kîaarî mpakûri ya fetha ya ûrito bwa kilo îmwe na nusu, na karaî ka fetha ka ûrito bwa akuî kilo îmwe. Mpakûri îîu na karaî kau biojûri mûtu jûmwinyu juungeenue na maguta ja nzeituni, nîkenda bitumîrwa birî kîgongwana kîa irio.

⁵⁰Ningî nî aaritîre mpakûri îmwe ya thaabu ya ûrito bwa gîchunchî kîmwe kuuma kîrî îkûmi gîa kilo, yûûjûri ubaani.

⁵¹Aracoka ararita kareegwa, na ntûrûme na gatûrûme ka mwaka jûmwe nîkenda biritwa birî kîgongwana gîa gwakîîria.

⁵²Ningî ararita nthenge nîûntû bwa kîgongwana gîa kûthiria meeyia.

⁵³Aracoka ararita ndeegwa ijîîrî na ntûrûme ithaano, na nthenge ithaano, na tûtûrûme tûtaano twa mwaka jûmwe birî bia kîgongwana kîa thîîrî. Kîu nîkîo kîaarî kîewa kîa Elishama mûtaana wa Amihudi.

⁵⁴Gamalieli, tawe mûtongeeria wa mwîrîga jwa Manase, mûtaana wa Pedahuzuri, nîwe waaritîre kîewa kîaawe ntukû ya inyaanya.

⁵⁵Kîewa kîaawe kîaarî mpakûri ya fetha ya ûrito bwa kilo îmwe na nusu, na karaî ka fetha ka ûrito bwa akuî kilo îmwe. Mpakûri îîu na karaî kau biojûri mûtu jûmwinyu juungeenue na maguta ja nzeituni, nîkenda bitumîrwa birî kîgongwana kîa irio.

⁵⁶Ningî nî aaritîre mpakûri îmwe ya thaabu ya ûrito bwa gîchunchî kîmwe kuuma kîrî îkûmi gîa kilo, yûûjûri ubaani.

⁵⁷Aracoka ararita kareegwa, na ntûrûme na gatûrûme ka mwaka jûmwe nîkenda biritwa birî kîgongwana gîa gwakîîria.

⁵⁸Ningî ararita nthenge nîûntû bwa kîgongwana gîa kûthiria meeyia.

⁵⁹Aracoka ararita ndeegwa ijîîrî na ntûrûme ithaano, na nthenge ithaano, na tûtûrûme tûtaano twa mwaka jûmwe birî bia kîgongwana kîa thîîrî. Kîu nîkîo kîaarî kîewa kîa Gamalieli mûtaana wa Pedahazuri.

⁶⁰Abidani, tawe mûtongeeria wa mwîrîga jwa Benjamini, mûtaana wa Gideoni nîwe waaritîre kîewa kîaawe ntukû ya kenda.

⁶¹Aaritîre mpakûri ya fetha ya ûrito bwa kilo îmwe na nusu, na karaî ka fetha ka ûrito bwa akuî kilo îmwe. Mpakûri îîu na karaî kau biojûri mûtu jûmwinyu juungeenue na maguta ja nzeituni, nîkenda bitumîrwa birî kîgongwana kîa irio.

⁶²Ningî nî aaritîre mpakûri îmwe ya thaabu ya ûrito bwa gîchunchî kîmwe kuuma kîrî îkûmi gîa kilo, yûûjûri ubaani.

⁶³Aracoka ararita kareegwa, na ntûrûme na gatûrûme ka mwaka jûmwe nîkenda biritwa birî kîgongwana gîa gwakîîria.

⁶⁴Ningî ararita nthenge nîûntû bwa kîgongwana gîa kûthiria meeyia.

⁶⁵Aracoka ararita ndeegwa ijîîrî na ntûrûme ithaano, na nthenge ithaano, na tûtûrûme tûtaano twa mwaka jûmwe birî bia kîgongwana kîa thîîrî. Kîu nîkîo kîaarî kîewa kîa Abidani mûtaana wa Gideoni.

⁶⁶Ahiezeri, tawe mûtongeeria wa mwîrîga jwa Dani, mûtaana wa Amishadai nîwe waaritîre kîewa kîaawe ntukû ya îkûmi.

⁶⁷Kîewa kîaawe kîaarî kîa mpakûri ya fetha ya ûrito bwa kilo îmwe na nusu, na karaî ka fetha ka ûrito bwa akuî kilo îmwe. Mpakûri îîu na karaî kau biojûri mûtu jûmwinyu juungeenue na maguta ja nzeituni, nîkenda bitumîrwa birî kîgongwana kîa irio.

⁶⁸Ningî nî aaritîre mpakûri îmwe ya thaabu ya ûrito bwa gîchunchî kîmwe kuuma kîrî îkûmi gîa kilo, yûûjûri ubaani.

⁶⁹Aracoka ararita kareegwa, na ntûrûme na gatûrûme ka mwaka jûmwe nîkenda biritwa birî kîgongwana gîa gwakîîria.

⁷⁰Ningî ararita nthenge nîûntû bwa kîgongwana gîa kûthiria meeyia.

⁷¹Aracoka ararita ndeegwa ijîîrî na ntûrûme ithaano, na nthenge ithaano, na tûtûrûme tûtaano twa mwaka jûmwe birî bia kîgongwana kîa thîîrî. Kîu nîkîo kîaarî kîewa kîa Ahiezeri mûtaana wa Amishadai.

⁷²Pagieli, tawe mûtongeeria wa mwîrîga jwa Asheri, mûtaana wa Okirani, nîwe waaritîre kîewa kîaawe ntukû ya îkûmi na îmwe.

⁷³Kîewa kîaawe kîaarî kîa mpakûri ya fetha ya ûrito bwa kilo îmwe na nusu, na karaî ka fetha ka ûrito bwa akuî kilo îmwe. Mpakûri îîu na karaî kau biojûri mûtu jûmwinyu juungeenue na maguta ja nzeituni, nîkenda bitumîrwa birî kîgongwana kîa irio.

⁷⁴Ningî nî aaritîre mpakûri îmwe ya thaabu ya ûrito bwa gîchunchî kîmwe kuuma kîrî îkûmi gîa kilo, yûûjûri ubaani.

⁷⁵Aracoka ararita kareegwa, na ntûrûme na gatûrûme ka mwaka jûmwe nîkenda biritwa birî kîgongwana gîa gwakîîria.

⁷⁶Ningî ararita nthenge nîûntû bwa kîgongwana gîa kûthiria meeyia.

⁷⁷Aracoka ararita ndeegwa ijîîrî na ntûrûme ithaano, na nthenge ithaano, na tûtûrûme tûtaano twa mwaka jûmwe birî bia kîgongwana kîa thîîrî. Kîu nîkîo kîaarî kîewa kîa Pagieli mûtaana wa Okirani.

⁷⁸Ahira, mûtongeeria wa mwîrîga jwa Nafutali, mûtaana wa Enani, nîwe waaritîre kîewa kîaawe ntukû ya îkûmi na ijîîrî.

⁷⁹Kîewa kîaawe kîaarî kîa mpakûri ya fetha ya ûrito bwa kilo îmwe na nusu, na karaî ka fetha ka ûrito bwa akuî kilo îmwe. Mpakûri îîu na karaî kau biojûri mûtu jûmwinyu juungeenue na maguta ja nzeituni, nîkenda bitumîrwa birî kîgongwana kîa irio.

⁸⁰Ningî nî aaritîre mpakûri îmwe ya thaabu ya ûrito bwa gîchunchî kîmwe kuuma kîrî îkûmi gîa kilo, yûûjûri ubaani.

⁸¹Aracoka ararita kareegwa, na ntûrûme na gatûrûme ka mwaka jûmwe nîkenda biritwa birî kîgongwana gîa gwakîîria.

⁸²Ningî ararita nthenge nîûntû bwa kîgongwana gîa kûthiria meeyia.

⁸³Aracoka ararita ndeegwa ijîîrî na ntûrûme ithaano, na nthenge ithaano, na tûtûrûme tûtaano twa mwaka jûmwe birî bia kîgongwana kîa thîîrî. Kîu nîkîo kîaarî kîewa kîa Ahira mûtaana wa Enani.

⁸⁴“Bibi nîbio biewa birîa biaaritîrwe nî atongeeria ba mîîrîga ya Israeli ntûkû irîa kîritîro kîa igongwana kîaathûragwa: Mpakûri îkûmi na ijîîrî cia fetha, na tûraî îkûmi na twîrî twa fetha, na mpakûri ingî îkûmi na ijîîrî cia thaabu.

⁸⁵O mpakûri ya fetha yeethagîrwa îrî na ûrito bwa kilo na nusu. O karaî nako kethagîrwa karî na ûrito bwa akuî kilo îmwe. Into bionthe bia fetha biaarî na ûrito bwa kilo mîrongo îîrî na mûgwanja na nusu.

⁸⁶Mpakûri cia thaabu ciaarî îkûmi na ijîîrî, ciûjûri ubaani. Nacio ciaarî na ûrito bwa akuî kilo îmwe na nusu.

⁸⁷Nacio nyomoo cionthe cia kîgongwana kîa gwakîîria ciaarî; ndeegwa îkûmi na ijîîrî, na ntûrûme îkûmi na ijîîrî, na tûtûrûme twa mwaka jûmwe îkûmi na twîîrî. Ningî nî kwaarî kinya na kîgongwana kîa irio, na nthenge îkûmi na ijîîrî cia kîgongwana gîa kûthiria meeyia.

⁸⁸Nyomoo irîa cionthe ciaaritîrwe irî kîgongwana kîa thîîrî ciaarî ndeegwa mîrongo îîrî na inya, na ntûrûme mîrongo îtaantatû, na nthenge mîrongo îtaantatû, na tûtûrûme twa mwaka jûmwe mîrongo îtaantatû. Biu bionthe nîbio biewa birîa biaritîrwe nîûntû bwa kûtheria kîritîro kîa igongwana nyuma ya kwathûrwa.

⁸⁹Rîrîa Musa aatonyere îemeene rîa gûtirimanîra nîkenda aaranîria na MWATHANI, nî aigîrue kajû gakîmwaragîria gakiumaga îgûrû rîa gîtî gîa kîaao kîrîa kîarîîkagîîrwa îgûrû rîa Îthandûkû rîa kîrîkanîro. Kajû kau kaumaga gatîgatî ga akerubimu bobaîrî gakamwarîria.”