Read KIMERU BIBLE PROTESTANT EDITION Gût 8 Bible Online

Gût 8 - KIMERU BIBLE PROTESTANT EDITION bible

Gût 8

¹ MWATHANI nî aarîîrie Musa aramwîra atîrî,

²“Arîria Aaroni ûmwîre ûjû: Rîrîa ûkaagwatagia taawa, irîa mûgwanja, ûciîkage ûrîa weerû bwaacio bûkaamûrîkaga au mbere ya gîtugî gîa kûrîkîîragîa taawa.”

³Aaroni arathithia ûu MWATHANI eerîte Musa. Areeka taawa ûrîa ikoombaga kûmûrîka au mbere ya gîtugî gîa kûrîkîîra taawa.

⁴Ningî MWATHANI nî eerîre Musa mûthithîrie jûrîa gîtugî kîu gîa kûrîkîîra taawa kîabuîrîte kûthithua. Gîtugî kîu gîa kûrîkîîra taawa kîaathithîtue na thaabu împûûre kuuma nthî mwanka îgûrû.

⁵MWATHANI nî aarîîrie Musa aramwîra atîrî,

⁶“Athûrana Alawi na antû bangî ba Israeli na ûbatherie.

⁷Naagwe ûkîbatheria ûthithagie ûjû: Ûbaminyaminyîrie rûûjî rwa kûbatheria na ûbeere beenje mîîrî yaao kunthe, na baûûre nguû ciaao. Nabo rîu bakaa babatheru.

⁸“Bacoke bajûkie kareegwa ga kîgongwana gîa gwakîîria, bajûkie mûtu jûmwinyu juungeenue na maguta ja nzeituni birî kîgongwana kîa irio. Naagwe ûjûkie kareegwa kau kangî karî kîgongwana gîa kûthiria meeyia.

⁹Ningî ûûgwe Musa ûûthûranie kîûthûrano kionthe kîa antû ba Israeli, rîu uumîrie Alawi au mbere ya îema rîa gûtirimanîra.

¹⁰Ûcoke ûreete Alawi mbere yaakwa, nabo antû ba Israeli babarîîkîîre njara.

¹¹Aaroni akaathûra Alawi, abanenkanîre kîrî ni barî kîgongwana gîa gûkîîrua, kîriti nî antû ba Israeli, nîkenda bantumîkagîra.

¹²Nabo Alawi bau bakarîkîîra njara ciaao îgûrû rîa mîtwe ya tûreegwa tûu. Nako kareegwa kamwe karitwe karî kîgongwana gîa kûthiria meeyia na kangî karitwe karî kîgongwana gîa gwakîîria kîrî ni nîkenda Alawi bagîa ngwatanîro naani.

¹³“Naagwe waathûre Alawi kîrî ni barî kîgongwana gîa gûkîîrua. Bwathûrwa, batumîkagîre Aaroni na ataana baawe.

¹⁴Ûu nîu ûkaathûra Alawi kuuma kîrî antû ba Israeli, nabo bae baakwa.

¹⁵Nyuma ya kûtheria Alawi na kûbaathûra kîrî ni barî kîgongwana gîa gûkîîrua rîu no batumîkage îemeene rîa gûtirimanîra.

¹⁶Nîkwîthîrwa Alawi nî banenkanîri kîrî ni buru nî antû ba Israeli, antû a aana ba iraanga ba antû ba Israeli bionthe. Nandî Alawi nî baakwa.

¹⁷ Marikithathi jonthe ja antû ba Israeli nî jaakwa; ja antû na ja nyomoo. Nîkwîthîrwa ntukû îrîa ndooragîre marikithathi jonthe nthîgûrûûne ya Misri nîrîo ndaathuurîre marikithathi ja Israeli jaraa jaakwa.

¹⁸Nandî ndîkûjûkia Alawi antûûne a marikithathi jonthe ja antû ba Israeli.

¹⁹Naani nî mpeejanîte Alawi kîrî Aaroni na ataana baawe barî kîewa kuuma kîrî antû ba Israeli, nîkenda batumikagîra antû bau ba Israeli barî îemeene rîa gûtirimanîra. Ningî nîkenda batûmaga antû ba Israeli barekagîrwa meeyia jaao batîkeeje kwonaga ûthûûku rîrîa beetaga akuî na antû arîa atheru.”

²⁰Musa, na Aaroni, na kîûthûrano kionthe kîa antû ba Israeli nî baathûrîre Alawi o ta ûrîa MWATHANI eerîte Musa.

²¹Alawi nî baithererie na baraûûra nguû ciaao. Aaroni arabanenkanîra kîrî MWATHANI barî kîgongwana gîa gûkîîrua. Aracoka arabatheria nîkenda bathirîrua meeyia nî MWATHANI.

²²Nyuma ya mantû jau, Alawi barambîrîria kûrita ngûgî îemeene rîa gûtirimanîra barûngamîîri nî Aaroni na ataana baawe kûringana na ûrîa MWATHANI eerîte Musa.

²³MWATHANI nî aarîîrie Musa aramwîra atîrî,

²⁴“Jaja nîjo mantû jegiî Alawi: Arûme ba kuuma mîaka mîrongo îîrî na îtaano na nkûrûki nîbo bakaritaga ngûgî bagîtumîkaga îemeene rîa gûtirimanîra.

²⁵Îndî bakinyia mîaka mîrongo îtaano na nkûrûki bagatigaga kûrita ngûgî ya gûtumîkîra îemeene.

²⁶Nabo Alawi ba mîaka mîrongo îtaano na nkûrûki bagateethagia Alawi bangî kûritaga ngûgî îemeene rîa gûtirimanîra, îndî bo batîbuîrîte kûgaîrwa ngûgî iu bonka. Ûu nîu ûkaathithagia mantûûne jegiî ngûgî cia Alawi.”