Read KIMERU BIBLE PROTESTANT EDITION Gût 9 Bible Online

Gût 9 - KIMERU BIBLE PROTESTANT EDITION bible

Gût 9

¹ Kûrî mweriine jwa mbere mwakeene jwa îîrî, nyuma ya rîrîa antû ba Israeli baaumîre Misri, MWATHANI nî aarîîrie Musa kûu rwanda rwa Sinai aramwîra atîrî,

²“Antû ba Israeli nî bakûngwagîre mambura ja Pasaka îgiita rîaayo rîakinya.

³Ûgoro bwa ntukû ya îkûmi na inya, ya mweri jûjû, nîrîo bûgakûngwîra mambura ja Pasaka, kûringana na mawaatho jaayo.”

⁴Tontû bûû, Musa nî eerîre antû ba Israeli bakûngwîre mambura ja Pasaka.

⁵Nabo antû ba Israeli barakûngwîra mambura ja Pasaka ûgoro bwa ntukû ya îkûmi na inya, ya mweri jwa mbere, kûu rwanda rwa Sinai. O ta ûrîa MWATHANI eerîte Musa.

⁶Îndî nî kwaarî na antû bataatheri nîûntû bwa kûringithia kiimba, na batîngî kûûmba gûkûngwîra mambura ja Pasaka ntukû îîu. Nabo nî beetîre kîrî Musa na Aaroni ntukû îîu,

⁷barabeera atîrî, “Kinya këethîra tûtîtheri nîûntû bwa kûringithia kiimba rî, nîkî ûntû tûtîgwîtîkîîrua tûkûngwîra Pasaka na tûritanîria igongwana bia MWATHANI na antû bangî ba Israeli?”

⁸Musa arabeera atîrî, “Eteereni, mpambe menye ûrîa MWATHANI akauga nîûntû bweenu.”

⁹MWATHANI nî aarîîrie Musa aramwîra atîrî,

¹⁰“Arîria antû ba Israeli ûbeere ûjû: Muntû weenu kinya ûrîkû, kana muntû wa nchiarwa cieenu akëeja kwîthîrwa atîtheri nîûntû bwa kûringithia kiimba, kana akëethîrwa arî rûgendo kûraaja, kinya we no akûngwîre mambura ja Pasaka yaakwa.

¹¹Muntû ta ûu agaakûngwîra mambura ja Pasaka ûgoro bwa ntukû ya îkûmi na inya ya mweri jwa îîrî. Arîjanagîrie nyama cia gatûrûme na mîgaate îtiimbithîtue, na nyani irî na ng'ana.

¹² Nabo babuîrîte kûthingata mawaatho ja Pasaka. Batîbuîrîte gûtigaria noo mbi îraara, kana bauna marûitû ja gatûrûme kau.

¹³Îndî muntû wonthe ûmûtheru, na ûtî rûgendoone rwa kûraaja akëeja kûrega gûkûngwîra mambura ja Pasaka, muntû ûu agaatiga gûtaranîrua na antû baakwa, nîkwîthîrwa we atînditîrîte kîgongwana rîrîa kîritagwa. Nawe agaakanûkua nîûntû bwa meeyia jaawe.

¹⁴Nawe mûgeni akëethîrwa atûûranîtie naabuî na akëethîrwa akîendaga gûkûngwîra mambura ja Pasaka, no mwanka akûngwîre kûringana na waatho bwaayo. Waatho bwa Pasaka bûkéethagîrwa bûrî bûmwe kîrî mûgeni na kîrî muntû ûrîa ûciarîri nthîgûrûûne îîjî.”

¹⁵Ntukû îrîa îema rîa gûtirimanîra rîambîrwe, îtu nî rîarîkunîkîre. Rîaarîkunîkagîra kuuma ûgoro mwanka rûkîîrî rîkari ta mwanki.

¹⁶Ûu nîu gwakaraga magiita jonthe; îtu nî rîakunîkagîra îema rîa gûtirimanîra mûthenya, na ûtukû rîkarîkunîkîra rîkari ta mwanki.

¹⁷Rîrîa îema rîa gûtirimanîra rîatigaga gûkunîkwa nî îtu, nîrîo antû ba Israeli baambûraga maema jaao, bakaambîrîria rûgendo. Nabo nî baambaga maema jaao arîa îtu rîu rîarûngamaga.

¹⁸Antû ba Israeli baambûraga maema jaao rîrîa MWATHANI abeera bajaambûre, na nî baambaga kambî rîrîa MWATHANI abeera bamîambe. Nabo baakaraga maemeene jaao îgiita rîonthe rîrîa îtu rîaakunîkagîra îema rîa gûtirimanîra.

¹⁹Rîrîa îtu rîu rîakaraga rîkunîkîte îema rîa gûtirimanîra îgiita rîrîraaja, antû ba Israeli nî baathîkagîra Waatho bwa MWATHANI nabo bataambagîîria rûgendo.

²⁰Kûrî îgiita îtu rîaakaraga rîkunîkîte îema rîa gûtirimanîra ntukû inkai, nabo antû bagakara maemeene jaao kûringana na ûrîa MWATHANI aabeerîte. Ningî nî baambûraga kambî bakaambîrîria rûgendo rîrîa MWATHANI abeera.

²¹Kûrî îgiita rîmwe îtu rîaakaraga rîkunîkîte îema rîa gûtirimanîra kuuma ûgoro mwanka rûkîîrî. Nabo nî baambagîria rûgendo îtu rîatiga gûkunîka îema rîa gûtirimanîra kwëethîrwa kûrî ûtukû kana mûthenya.

²²Antû ba Israeli nî baakaraga maemeene jaao îgiita rîonthe rîrîa îtu rîakunîkaga îema rîa gûtirimanîra, kinya rîarîkunîka ntukû ijîîrî, kana mweri jûmwe, kana mwaka. Baambagîîria rûgendo akî rîrîa îtu rîatiga gûkunîka îema rîa gûtirimanîra.

²³Nabo baambaga kambî kana bakaambûra kambî MWATHANI abeera. Baathithagia o ta ûrîa MWATHANI eerîte Musa.