Read KIMERU BIBLE PROTESTANT EDITION Mik 1 Bible Online

Mik 1 - KIMERU BIBLE PROTESTANT EDITION bible

Mik 1

¹ MWATHANI nî aarîîrie Mika mantû jarîa aamûguûrîîre jegiî ntûûra cia Samaria na Jerusalemu, îgiiteene rîa waathani bwa Jothamu, na bwa Ahazi, na bwa Hezekia barîa baarî anene ba Juda. Mika aarî wa kuuma ntûûra ya Moreshethi.

²Thikîîreeni buî mîgongo yonthe; bwigue buî bwinthe atûûri ba nthîgûrû! MWATHANI Mûrungu arî kîûrûûne kîaawe gîkîtheru Akaabûkûûjîîra îgambeene.

³MWATHANI nî aumîte gîkaroone kîaawe gîkîtheru nawe akeenama eeje agîkinyangaga tûthûmbî twa irîma.

⁴Nabio irîma bikaarerûka birî rungu rwaawe ta ûrîa mûûra jûrerûkaga mwankiine; biîtîke igwanthîne, ta ûrîa rûûjî rwîtîkaga ruumîte irîmeene.

⁵Mantû jau jagaakarîka nîûntû bwa ûremi bwa antû ba Israeli, nîûntû bwa meeyia jaao. Nîmbi îreterete Israeli îrema? Anga tî ntûûra ya Samaria! Nîmbi îtûmîte antû ba Israeli baa eeyia? Anga tî ntûûra ya Jerusalemu!

⁶Tontû bûû, ngatûma ntûûra ya Samaria îînyangue îtigwe îrî ithûmba kûu rwanda, yee gûntû gwa kwaandaga mîzabibû. Nkamîmomoranga ngere maiga iguuruune na mbanîke mîsingi yaayo oome werûûne.

⁷Mîrungu yaayo yonthe ya mîng'uanano îkaunangwa tûchunchî, biewa birîa mîrungu îîu yeejagwa biîthue na mwanki, nthirie mîrungu ya mîng'uanano ya Samaria yonthe buru. Nîkwîthîrwa Samaria yoonere into biu kuumania na birîa maraya jarîagwa, na noka bigeeta kûrîaa maraya jangî.

⁸Rîu Mîka arauga atîrî, “Ûûni nkarîra na ndithikîîre; ngeeta ntîkîrîte iratû na ndî kîthûnû; ndîre kîrîro ta kîa mbîrwa na ndiithikîîre ta ntuntuguru.

⁹Ironda bia Samaria bitîûmba kwora nabio nîbio bigwîta Juda, Ûthûûku nî bûkinyîte mpingîroone cia Jerusalemu kûrîa antû baakwa batwîre.”

¹⁰Antû ba Juda menya bwîra anthû beetû na Gathi mantû jeetû kana bûrîra kinya aniini. Ituutieni nthî tîîriine kûu Bethileafura.

¹¹Buî bûtwîre Shafiri ciîtîreni kîthamîrioone bûrî kîthûnû na bûrîîi nî nthoni; naabuî bûtwîre Zaanani menya buumagara ntûûreene; Nabo antû ba Bethiezeli bambîrîria gûkaya bûmenya gûtî giitiiro nao.

¹²Nîkwîthîrwa MWATHANI eengeeretie kûthithîria Jerusalemu ûthûûku antû ba Marothi barîûria nîkû wega bûkauma.

¹³Antû ba Lakishi, oogeereni mbarathi ngaarîîne; nîûntû bwairitanîre kûthithia meeyia kuumania na Israeli, naabuî nojo bwaritanîre Jerusalemu kûthithia.

¹⁴Tontû bûû, nandî, eeni Moreshethi-gathi biewa mbere ya bûtigana. Anene ba Israeli nabo gûtî rîo bakoona ûteethio kuuma ntûûra ya Akizibu.

¹⁵Ûûni MWATHANI nkaareeta anthû baithûkîre antû ba Maresha; Nabo atongeeria barîa akaathe ba Israeli bageeta gwiciitha gîkurunguune kîa Adulamu.

¹⁶Enjeni mîtuundu bûtigwe mîtwe îmîtheri, bûrîrîre aana beenu barîa bwendeete; cienjeni buru nîûntû aana beenu bageeta, bakaabûtiga baikue kîthamîrioone.