Read KIMERU BIBLE PROTESTANT EDITION Mik 2 Bible Online

Mik 2 - KIMERU BIBLE PROTESTANT EDITION bible

Mik 2

¹Wûi kîrî barîa baraaraga batî toro bakîbangania mantû jamaaî! Kûgîkia rûkîîrî bakathithia jo nîûntû nî bakûûmba kûjathithia.

²Bairîragîîria miuunda bakamîtuunyana kuuma kîrî eene; bairîrîria nyomba bakaijûkia; bainyagîîria antû amwe na nja ciaao, bakaabatuunya kinya mbûrago ciaao.

³Tontû bûû, nandî MWATHANI ariuga ûjû: ûûni nî mbangîte kûreetera antû ûthûûku na batîûmba kûbwebera. Ningî batîûmba kaîrî gwîtaga baikumîtie nîûntû îgiita rîu rîkeethîrwa rîrî rîa ûthûûku akî.

⁴Nabo antû bangî bagaatua kûbwinaga bakîbûkurungaga bakiirîrithagia kîrîro gîkînene, bakiugaga atîrî, “Tûkûthira buru; MWATHANI agûtûtuunya nthîgûrû yeetû tayo mbûrago yeetû anenkera barîa batûtaîte, miuunda yeetû.”

⁵Tontû bûû, Îgiita rîakinya rîa kûgaîra antû ba MWATHANI kiigai kîaao, buî gûtîkîo bûkaagaîrwa.

⁶Antû nî ka bakauga “Tiga gûtûtûmîrîria, gûtî muntû ûbuîrîte gûtûmîîria mantû ta jau; nîûntû gûtî nthao îgatwîjîîra.”

⁷Antû ba Israeli, gatûûmba kuuga MWATHANI nî athûûrangaga na mpwîî? Nîka oomba kûthithia mantû ta jaja? Mantû jarîa mbugaga, anga jatîgunaga muntû ûmwagîru?

⁸Bwithûkagîra antû baakwa ta anthû; antû bacoka baumîte ndweene bathûgaanagia barî kiindajî îndî buî bwîthagîrwa bûbeeteerete bûbatûnya nguû ciaao bûtî noo na kîaao.

⁹Bwîngaga aka ba antû baakwa bakauma nja ciaao inthongi; bûgatûma aana baao baaga kîtharimo gîaakwa mwanka kenya.

¹⁰No mwanka bwîte kîthamîrioone nîkwîthîrwa gûtî thîîrî îrî gûntû gûkû; nîûntû meeyia jeenu nîjo jatûmîte gûntû gûkû kûthirua buru.

¹¹Muntû akëeja kwonora wa kûroreria antû baba ûrongo ageeta akîbeeraga, “Bûkethagîrwa bûrî na ndibei cia mîthemba îmiingî” muntû ta ûu, nîwe antû baba beenda.

¹²Nî mma nkoothûrania antû ba Israeli bonthe, ncokanîîrie antû barîa batigarîte ba Israeli; ta ng'ondu kiugûûne ta ndîîtha îrîîthîtue. O kaîrî nthîgûrû yeenu yûjûre antû babaingî.

¹³MWATHANI akaabatongeeria abarite kîthamîrioone; nabo bakaunanga mpingîro baumagarîre ku. MWATHANI mûnene waao nîwe ûgeeta arî mbere yaao abatongeeretie.