Read KIMERU BIBLE PROTESTANT EDITION Mik 6 Bible Online

Mik 6 - KIMERU BIBLE PROTESTANT EDITION bible

Mik 6

¹Igueni ûrîa MWATHANI akuuga mantûûne ja Israeli: Ithuranîre Israeli witeteere irîma bikûjîîre tûrîma twigue ûrîa ûkuuga.

²Buî irîma thikîîreeni îgamba rîa MWATHANI, o na kinya buî mîsingi ya nthî îrîa ya ntwîre; nîkwîthîrwa MWATHANI akaagambithia antû baawe, agambithie Israeli.

³MWATHANI ariuga atîrî, “Antû baakwa, nîatîa mbûthithîtie? Nîmbi mbûnogetie nabio? Ncokerieni nandî!

⁴ Tontû ûûni nî ndaabûritîre nthîgûrû ya Misri ndîrabûkûûra kûu ûkomboone; ningî ndîrabûnenkera Musa, na Aaroni, na Miriamu babûtongagîîria.

⁵ Itû antû baakwa, ririkaneni mantû jamathûûku jarîa Balaki mûnene wa Moabu aabûbangîrîte, na bûririkane ûrîa Balaamu mûtaana wa Beori aamûcokerie, na ûrîa gwakarîkîre kuuma Shitimu mwanka Giligali, nîkenda bûmenya mantû jarîa MWATHANI athithagia akionokania.”

⁶Nîmbi nkaaretera MWATHANI Mûrungu Ûrîa Ûrî îgûrû buru nkîîja mbere yaawe kûmûthaathayia? Nî igongwana bia gwakîîria bia njaû cia mwaka jûmwe mbuîri nî kûmûretera?

⁷Nî ntûrûme ngiri na ngiri na maguta jamaingî jagwîtîka ta rûûjî, jagaatûma MWATHANI agwîrua? Nî mwana waakwa wa kîranga nkaarita nîûntû bwa meeyia jaakwa; ndite mbeeû ya mwîrî jwaakwa nîûntû bwa meeyia jaakwa?

⁸Gwe muntû MWATHANI nî akwonetie ûrîa ûbuîrîte kûthithagia. Ûrîa MWATHANI eendaga nî atîrî, ûbuîrîte kûthithagia mantû ja îota wîthagîrwe ûrî na kîaao kîrîa gîtîthiraga na ûtûûrage winyiîtie mbere ya Mûrungu.

⁹Gûkîra MWATHANI nî ûntû bwa kîrîra MWATHANI nî akwarîria antû ba ntûûra ya Jerusalemu akiugaga atîrî, “Thikîîreeni buî antû barîa bûtwîre ntûûreene.

¹⁰Ndoomba kûûrîrua nî ûtonga bûrîa barîa baaî baciîkîrîte nyomba ciaao bûrîa bacionereete na waayia, kana mbûrîrua ithimi birîa bûtumagîra bitî bia mma?

¹¹Ka bûkwenda mbuga muntû ûrîa ûtumagîra ithimi bitî bia mma atîthûûkîtie?

¹²Buî itonga bûrî antû babaî na ngîti; buî barîa batwîre ntûûreene ya Jerusalemu no ûrongo bwaragia akî.

¹³Tontû bûû, nî mpambîrîtie kûbûkanûkia. Ûûni nkaabûthiria buru nîûntû bwa meeyia jeenu.

¹⁴Bûkaarîjaga biakûrîa na bûthinyare bûkarage bûrî na mpara; bûgacwaga into îndî kinya birîa bûgeekaga bûtîkarokaraga nabio. Nabio nkaabithiria îgiita rîa ndwaa.

¹⁵Bûkaandaga îndî bûtîkethaga; bwotorage nzeituni îndî bûtîkorotumîra maguta jaacio. Bûgaakinyangaga nzabibû îndî bûtîkoronyua ndibei yaacio.

¹⁶ Nîkwîthîrwa buî no bwathîkagîra mawîthîre ja îgiita rîa mûnene Omuri, na bûkathingata nkuagaya cia Ahabu na nchiarwa ciaawe. Gwe Jerusalemu ngakwethia îgaanjo. Nkaabûthiria nîkenda antû babûmena antû baaku batûûre bameni nî mîgongo.”