Read KIMERU BIBLE PROTESTANT EDITION Mik 7 Bible Online

Mik 7 - KIMERU BIBLE PROTESTANT EDITION bible

Mik 7

¹Wûi naanû kîrî ni! Nîkwîthîrwa nkari ta muntû ûrî na mpara na gûtî matuunda jatigeere îgiita rîa mûû, gûkari ta rîrîa nzabibû ciîthagîrwa ikethi gûtî nzabibû cionora cia kûrûma gûtî nkûû, na nîcio mpendeete.

²Gûtî muntû ûtigeere nthîgûrûûne ûkîraga Mûrungu gûtî we ûthithagia mantû ja mma ûtigeere gatîgatîîne ka antû; Bonthe bakaraga beeteerete kûûragana, o muntû agîcwaga ûrîa oomba gûtegia muntû ûngî.

³Bo baijî kûthithia ûthûûku bwega mono; atongeeria na agambi baao beetagia nkukumo, nabo antû ba îgweta bakeerana ûthûûku bûrîa babangîte rîu bonthe bakagwatanîra kûthithia ûthûûku bûu.

⁴Antû barîa beega buru kîrî bau bakari ta nkonko nabo barîa bathithagia mantû ja mma kîrî bo bakari ta rwego rwa miigua. Ntukû îgaakinya îrîa Mûrungu akaabakanûkia o ta ûrîa abeerîte na njîra ya akaria baao iroria. Nandî antû baba bagakinyia rîa kwangaratanua.

⁵Menya muntû eetîkia mûtûûri waawe kana mûcoore waawe; muntû nî amenyagîîre rwaria rwaawe akîarîria kinya mûka waawe.

⁶ Nîkwîthîrwa mûtaana nî akûmena îthe, na mwarî akathûûkîîra ng'ina, mûka wa mûtaana agatetia ng'ina wa nthaka Anthû ba muntû batuîkîte nî antû ba nja yaawe yongwa.

⁷Îndî ûûni rî, no MWATHANI ûganteethia wîrîgîîro bwaakwa nî Mûrungu ûrîa ûmbonokagia; nî mbijî Mûrungu waakwa akaambigua.

⁸Itû mûnthû waakwa, tiga kûgwîrua ndagwa nthî nîûntû ngookîîra; rîrîa ndî muunduune, MWATHANI nîwe weerû bwaakwa.

⁹Ûûni nkoomîîria îkanûkia rîa MWATHANI nîûntû nî mbîîtie kîrî we, Mwanka rîrîa akaangambîra antuîre îgamba. MWATHANI akaandeeta werûûne; nawe akaambonokia nkîonaga.

¹⁰Rîu mûnthû waakwa oona agaacokerwa nî nthao, we ûrîa ûragia atîrî, “MWATHANI Mûrungu waaku arî kû?” Naani nkamûtega na meetho mûthekere ndoona agerwa nthî akinyangwa ta ûrîa ntaka îkinyangagwa njîreene.

¹¹Antû ba Jerusalemu, ntukû ya gwaka nthingo cia ntûûra yeenu îrî akuî. Nayo ntukû îîu yakinya, mîanka ya nthîgûrû yeenu îkaaramua.

¹²Ntukû îîu, antû beenu bagaacoka kuuma Asîria bwa gaiti na Misri, bwa ûmotho na kuuma nteere cia mûuro jwa Eufurate, na kuuma nthîgûrû cia kûraaja cia îria na irîma.

¹³Îndî nthîgûrû îgatigwa îrî întheri nîûntû bwa ûthûûku bwa antû barîa batûûraga ku.

¹⁴MWATHANI rîîthia antû baaku, barîa withuurîrîte wengwa, barîa batûûraga bonka mwitûûne, gatîgatîîne ka miuunda îmînoru. Ka beete Bashani na Gileadi bagatûûrage ku o ta ûrîa baatûûraga mbere.

¹⁵Nkaaboonia mantû ja kûrigaria o ta rîrîa baumîte nthîgûrûûne ya Misri

¹⁶Antû ba mîgongo baboona bakaigua nthoni na kinya beethîrwa barî na inya; barigare bakunîke tûnyua twaao na bainge matû jaao.

¹⁷Nabo bagaikururia nthîgûrû mûthetuune ta njoka; baume bitiiroone biaao bakiinainaga nî ûguaa. Beete kîrî MWATHANI Mûrungu waao.

¹⁸Gûtî Mûrungu ûngî taagwe Gwe nî ûrekagîra antû baaku barîa batigeere meeyia jaao. Gwe ûtîtûûraga ûthûûri mwanka kenya nîûntû ûrî Mûrungu wa kîaao.

¹⁹MWATHANI agaatwigîîrua kîaao kaîrî, na agaatûthirîria meeyia jeetû na ajagere îrieene ndeene.

²⁰Itû MWATHANI wigîîrue antû baaku kîaao ûûjûrîrie nchiarwa cia Jakubu na cia Abrahamu ûrîa waaciîtîîrie biûjûjû bieetû karaaja.