Read KIMERU BIBLE PROTESTANT EDITION Nah 2 Bible Online

Nah 2 - KIMERU BIBLE PROTESTANT EDITION bible

Nah 2

¹Nineve, aithûki bagûkwithûkîra. Kabeeni îgûrû nthingoone cia biitiiro; bûkarie njîra; ithuranîreni nîûntû bwa ndwaa, bûgîe inya.

²(MWATHANI agaacokeria nchiarwa cia Jakubu ûkumio bwaao, acokerie Israeli gîtîîo kîaayo, nîûntû aithûki nî babaithûkîrîte bathûûkangia mîzabibû yaao.)

³Anthû bairigîrîîtie na rong'o intuune, beekîrîte nguû intuune. Nî baithuranîrîte kwithûkîra ntûûra! Chuuma cia ngaarî ciaao cia ndwaa irîa ikururagua nî mbarathi, irîenia ta ndweni, mbarathi nacio ka ikûûria nî rî ikaithûka.

⁴Ngaarî cia ndwaa nîka ciûjûri njîreene ikiumaga mûthia jûmwe jwa ntûûra igeeta jûngî. Nacio irîakana ta inyiinga ikeenia ta ndweni.

⁵Atongeeria ba njûûrî bagwîtwa, nîka bakûgiitara beetangîte. Aithûki bakûûgîa rûthingoone, bagwîka gîntû gîkari ta rong'o îgûrû rîaao gîa kwigîra nakîo[1] bakiithûranîra kuuna mpingîro.

⁶Biingîîro bia ndûûjî bikûrugûrwa. Gîkaroone kîa mûnene nî nthîîna ntheri.

⁷Mûka wa mûnene agûtawa, eetîîwa nawe na aarî barîa bamûmenyagîîra no kîrîro bakiugaga mbu na inya, bakîringaga ibara kwonania ûrîa barî na kwithikîîra.

⁸Antû barîkuûka kuuma Nineve ta rûûjî rwa ndia rûrugûrîri. Barîîrwa barûngame îndî gûtî we ûkûrûngama

⁹Taeeni Fetha! Taeeni thaabu! Ntûûra îîjî îrî ûtonga bûbwingî bwa goro na bwa mîthemba îmingî.

¹⁰Îkwînyangua! Îkwîrûkîrwa buru! Îkûthira! Bakûûjûrwa nî ûguaa batuîkanga maru. Bathirîri nî inya buru mwanka moothiû jaatuka.

¹¹Nandî ntûûra îrîa îraakari ta gîkurungu kîa ngatûnyi îrîkû? Îrîa îraakari ta kîmamo kîa ngatûnyi; kûrîa bianaana bia ngatûnyi birareragîrwa na ngatûnyi ndûme na nka igeetaga ku ikeethîra bianaana biaacio birî thîîria.

¹²Ngatûnyi yooragaga nyamû cia kûng'ana nîûntû bwa bianaana biaayo amwe na ngatûnyi nka. Nayo yoojûragia gîkurungu kîaayo nyamû imbûrage, îkoojûria kîmamo kîaayo nyama intambuurange.

¹³MWATHANI Mweneinya arîîra antû ba Nineve atîrî, “Ûûni ndî mûnthû weenu! Nkaaîthia ngaarî cieenu cia ndwaa ntige igîtoogaga toogi. Ningî mbûragîre ndweene asikarî beenu barîa bakari ta bianaana bia ngatûnyi. Nkabûtuunya into birîa bûtunyîte antû bangî. Nabo atûmwa beenu batîkoroigîîgua kaîrî.”