Read KIMERU BIBLE PROTESTANT EDITION Nah 3 Bible Online

Nah 3 - KIMERU BIBLE PROTESTANT EDITION bible

Nah 3

¹Wûi kîrî ntûûra îrîa îîtûûraga tharike, îrîa yûûjûri waayia. Ntûûra yûûjûri into birîa îtaîte.

²Igueni ûrîa nthanju ikûrîra na ûrîa magûrû ja ngaarî cia ndwaa jagûkiricana na ûrîa mbarathi ikûthûngûtha na ûrîa ngaarî cia ndwaa ikûruuma!

³Eetithia mbarathi baciumîrîtie mbarathi ciîtanga, nacio nchiû na matumo ka bikwenia! Barîa booragi batîtarîka. Ithûmba bia biimba nî bibinene, Biimba ka bikûgiitaria antû!

⁴Makanûkia jau jonthe jeejîîrîte Nineve nîûntû bwa ûmaraya bwaayo na ûrogi bûrîa îtumagîra gûkuucîîria nthî ingî kîrî yo, îgeeka mîgongo ûkomboone na ûmaraya bûu îkamîgwata bûbûûî na ûthongi bwaayo.

⁵MWATHANI Mweneinya arîîra Nineve atîrî, “Ngaakûguûria nguû, ntûme mîgongo yoone kîthûnû gîaaku, îkwoone wîkîrithîtue nthao.

⁶Nkaabwaka ntaka, mbûmeneerie, antû babûtegage barigari.

⁷Barîa bonthe bakaabwonaga bakaithaga moothiû nî kûrigara. Nabo bakaugaga atîrî, ‘Nineve nî îtuîkîte îgaanjo! Nûû ûkaamiigîîrua kîaao? Nûû ûkwenda kûmîboreria?’

⁸Nineve ka ûrî ûmwega nkûrûki ya ntûûra ya Thebesi, îrîa îrî rûteere rwa rûûjî rwa Naili? Kinya Thebesi nî yaathiûrûkîri nî rûûjî ta rûthingo na nîru yaaikaragia naru.

⁹Thebesi yeekagîrwa inya nî Ethiopia na kinya Misri ningî nî yaaigîkagwa ni Puti na Lîbia.

¹⁰Amwe na ûu antû ba Thebesi nî baikîrue kîthamîrioone twaana twa ntûûra îîu tûrooragîrwa njîreene na antû baayo ba îgweta baraogwa na nyororo baragaanua gatîgatî ka barîa babataîte.

¹¹Kinya gwe Nineve ûgakara ta woogiti, ûkare ta ûkûgirîka; na ûgaacwaa antû a gwituma kuuma kîrî anthû.

¹²Biitiiro bieenu birîa biaki biarika bigaakara ta mîkûû îrî na nkûû igundi nayo yainainua nûû ikagwa tûnyuene twa barîa bakûrîa.

¹³Atîrî, njûûrî cieenu itiûmba kwirikîria Mpingîro cia nthîgûrû yeenu irugûrîri anthû beenu na mwanki jûkûîîthia mîkîîndû ya mpingîro.

¹⁴Taeni rûûjî nîûntû bwa îgiita rîa gûcîgîîrua ndweene rikieni biitiiro bieenu bwega; kimeni ntaka bûûmbe maturubarî.

¹⁵Amwe na ûu, bûkaîthua na mwanki, na bûûragîrwe ndweene Bûkaathirua ta ûrîa imera bithiragua nî ngigî buî bûrî babaingî ta ngigî.

¹⁶Abiashara beenu baarî babaingî ta njota, îndî nandî bathaamîte ta ngigî ibuurûkîte.

¹⁷Atongeeria beenu bakari ta ngigî inyiingî ikari ndwegoone îgiita rîa mpio, îndî mûû jweeja ikabuurûka igeeta, na gûtî muntû wiijî nîkû ciîtaga.

¹⁸Îgwe, mûnene wa Asîria, atongeeria baaku nî bakuîte, athani baaku bamami ûrîa batîkoroûkîîra. Antû baaku banyaganîtue irîmeene, batî na muntû wa kûboothûrania.

¹⁹Ironda bieenu bitîona wa kûbioria, nkûûjî cieenu nî imbîî itîûmba kwora. Bonthe barîa bakaigua nteto cieenu bakaringa mpîî bagwîrîtue, nîûntû gûtî antû buî bûtaathîînia.”