Read KIMERU BIBLE PROTESTANT EDITION Hab 1 Bible Online

Hab 1 - KIMERU BIBLE PROTESTANT EDITION bible

Hab 1

¹Nteto iji nîcio MWATHANI aaguûrîîre kîroria Habakuku.

²Itû MWATHANI, ngaakara mwanka rî, ngîkûrombaga ûteethio naagwe ûtîkûnthikîîra? Ngaagûkaîra mwanka rî, ngîkwîraga “Nî tûkûthirua,” ûtîgûtwonokia?

³Nîkî ûntû gwe ûndekagîîria nkoona moothûûku na mîthangîko îîjî? Nthiûrûkîri nî nthiranio na wînyangia ndwaa na mbûragano nîbio nkwona.

⁴Tontû bûû, Waatho nî bûthirîtue inya na mantû ja îota jatîthithagua. Tontû barîa baaî ka bathiûrûkîrîte barîa baagîru, îota rîtîthingataîrwa.

⁵ Raithîrieeni mîgongo îrîa îbûthiûrûkîrîte naabuî bûrîa bûkoona bûkaarigara. Nîkwîthîrwa ûntû bûrîa nkaathithia o bûrî mwoyo kinya bûkeerwa bu, bûtîîtîkia.

⁶ Nîkwîthîrwa rî, ni mbûkaûkîtie Ababiloni, mûgongo jwa antû babang'eentu na batî kîaao barîa bakinyangîte nthîgûrû yonthe bagîtaaga nthîgûrû ingî.

⁷Bo nî mûgongo jûkîri na jûmûng'entu, bo nîbo bacieejaga Waatho na waathani bwaao bongwa.

⁸Mbarathi ciaao irî rwîro nkûrûki ya nkarî, nî ing'eentu nkûrûki ya mbîrwa irî na mpara; Îî, eetithia mbarathi baao baumaga nthî cia kûraaja bakeeja baburûûkîte ta ndiiû îkwenda kûûraga gîntû kîrî mwoyo.

⁹Njûûrî ciaao ciithûkîte na ûng'eentu; antû bonthe baamakua nî mwîjîre jwaao. Nabo boothûranîtie atae babaingî ta mûthanga.

¹⁰Bo bamenagîîria anene, na gûceethera athani. Bathekagîra biitiiro bakoomba mîtaro kûbithiûrûkîra bakîendaga kûbitaa.

¹¹Bo bariithûka bakeegera ta ruuo bagaciîtîra, bo nî antû eeyia nîûntû inya yaao nîyo mûrungu jwaao.

¹²Anga gwe tîgwe MWATHANI Mûrungu waakwa, gwe mûtheru waakwa wa ntwîre? Tuî tûtîûragwa. Gwe MWATHANI, nîgwe ûthuurîte antû ba Ababiloni nîkenda bakanûkania; naagwe nîgwe inya yeetû, na ûbatûmîte nîkenda batûkanûkia.

¹³Gwe, meetho jaaku nî jamatheru mono jatî ja kwona ûthûûku kana ja kwona mantû jarîa maaî, nîkî îndî ûntû ûraithîrîîtie barîa batîîtîkîtie na wakira rîrîa barîa baaî bakûthiria barîa baagîru nkûrûki ya bo?

¹⁴Nîkwîthîrwa gwe weethetie antû ta makûyû, waboona ta nthingiiri itî na mûnene.

¹⁵Ababiloni barîbategia bonthe na ndwano bakabagwatia na ngara ta makûyû, bakaboothûrania, rîu bakagwîrua.

¹⁶Tontû bûû, bathaathagia ngara ciaao, na bagaciritîra igongwana bakaîthîria ndwano ciaao ubaani, nîûntû nîbio bitumaga bakara bwega, na biakûrîa biaao biîthîrwa birî bibithongi.

¹⁷Nîka Ababiloni bagakaraga bakîgwatagia antû na ngara, na bakîûragaga antû ba mîgongo îngî mwanka kenya batî na kîaao?