Read KIMERU BIBLE PROTESTANT EDITION Hab 2 Bible Online

Hab 2 - KIMERU BIBLE PROTESTANT EDITION bible

Hab 2

¹Ngaitia kîrîngoone gîa akaria, mbeteere mbone ûrîa MWATHANI akambîîra nthithie, na ûrîa agancokeria nîûntû bwa kûnung'una gwaakwa.

²MWATHANI arancokeeria arambîîra atîrî, “Andîka ûntû bûrîa ngaakwonia; ûbwaandîke mbechueene bûbwega na ntemwa inene nîkenda bûthomeka na mpwîî.

³ Nîkwîthîrwa mantû jarîa ngûkwonia nî jeeteerete kûûjûra; jau najo jakeeja na mpwîî. Mantû jarîa nkwonetie nî ja mma kinya jeethîrwa jeejîte mpaara, jeeteere; no mwanka jeeje, jatîthaa.

⁴ Atîrî, ûrîa ûtîagîri, ûu nî mwikumia, îndî ûrîa mwagîru agatûûra nîûntû bwa wîtîkio bwaawe.”

⁵Atîrî, ûtonga nî bwaîîragia antû; barîa baaî batîkarakaraga. Ûkîa bwaao bwa kwenda into nî ta bwa gîkuû; ûrîa gîkuû gîtîng'anagia akuû. Antû ta bau baitaagîra mîgongo îngî na antû ba kûngî bonthe bakaa baao.

⁶Antû bau bataîtwe bonthe bakabakurunga na babameneerie bakiugaga atîrî, “Wûi kîrî barîa baithûûmbagîra into bitî biaao Bageeta mbere bagiitongagia na njîra ya kwinyîîria barîa barî na marandû jaao mwanka rî!”

⁷Anga barîa bûrî na îrandû rîaao kinya bo batîbumbuthûkîra baamenya ûrîa bûkûthithia. Nabo bakaajûkia bionthe birîa bûrî nabio.

⁸Nîkwîthîrwa buî nî bûtaîte into bia mîgongo îmiingî, îndî matigari ja antû bau bangî jagataa into bieenu kinya buî, nîûntû bwa ûrîa bûûraganîte na bwîkîrîte nthîgûrû ndwaa amwe na ntûûra ciaayo na barîa batwîre ku.

⁹Wûi kîrî barîa batongagia nja ciaao na into bicûûi na njîra inthûûku, bakathûgaania bakarîte gûntû gûtî ûgwati kûrîa ûthûûku bûtîbakinyîra!

¹⁰Mîbango yeenu ya kûthiria antû bangî nî îmîthûûku, nî ya kûreetera nja cieenu nthao; tontû bûu, bûkwithiria bwingwa.

¹¹Nîkwîthîrwa maiga jarîa jarî nthingoone ka jakûbuugîîra mbu, na kinya mîarîro îrîa îrî nyomba no u.

¹²Wûi kîrî barîa baakaga ntûûra na ûûragani, bakamîaka mûsingiine jwa meeyia!

¹³Atîrî, anga tî MWATHANI Mweneinya ûtûmaga antû bainogia gûcwaa into îndî bikaya nî mwanki na mîgongo iinogia kûbiûthûrania îndî biaa bia ûtheri?

¹⁴ Nîkwîthîrwa o ta ûrîa rûûjî rûûjûri îrieene nîu kîrîra kîa ûkumio bwa MWATHANI gîkoojûra nthîgûrû.

¹⁵Wûi kîrî buî barîa bûnyuithagia bangî mbogita ya mûthûûro jweenu, nîkenda bûbeekîrithia nthao bwona kîthûnû kîaao.

¹⁶Kinya buî bûkoojûrwa nî nthao, antûûne a mwago buî bwingwa bûkaanyua bwogite. MWATHANI nîwe ûkaabûnyuithia îkanûkia rîeenu ûkumio bweenu bûtuîke nthao.

¹⁷Buî bûtûgûtîte mwitû jwa Lebanoni nîu kinya buî bûgaatûgûtwa. Nacio nyamû ciaaju irîa bworagîre, ikaabûmakia mono, ûntû bûu bûgaakarîka nîûntû buî nî bûûraganîte, na bwojûria ndwaa nthîgûrûûne na ntûûreene ciaayo na kîrî antû baayo

¹⁸Mûrungu jwa mûng'uanano rî, jûguna mûjûthithia atîa? Mûng'uanano jûthithîtue na chuuma nî jwa kûritana mantû ja ûrongo. Nîkwîthîrwa muntû eetîkagia gîntû kîrîa athithîtie na njara ciaawe athithia mûng'uanano jûtîûmba kwaria!

¹⁹Wûi kîrî muntû ûrîa wîraga mûrungu jwa mûng'uanano jwa mûtî, ûkîîra! Akeera iiga rîtîûmba kwaria, rûngama! Into biu biomba kûbûguûrîra ûntû? Atîrî, mîrungu îîu îthithîtue na thaabu na fetha îtî mwoyo.

²⁰MWATHANI arî kîûrûûne kîaawe gîkîtheru. Nthîgûrû yonthe nî îkire, rîrîa îrî mbere yaawe.