Read KIMERU BIBLE PROTESTANT EDITION Hab 3 Bible Online

Hab 3 - KIMERU BIBLE PROTESTANT EDITION bible

Hab 3

¹Rîrî nîrîo îromba rîa kîroria Habakuku.

²Itû MWATHANI, nî mbigîîtue mantû jaaku, na nî ngûkîrîte nîûntû bwa ngûgî ciaaku. MWATHANI thithia mantû ta jau îgiiteene rîeetû ûûjûragwe nî kîaao kinya rîrîa ûthûûri.

³Mûrungu eejîte aumîte Temani Ûrîa Mûtheru aumîte kîrîmeene gîa Parani. Mwago jwaawe jûûjûrîte nthîgûrû nthîgûrûûne kunthe nî akumagua.

⁴Weerû bwaawe nî ta weerû bwa rweni buumîte kuuma njareene yaawe, au aithîte inya yaawe.

⁵Atûmîte mîrimo îîtaga îrî mbere yaawe na gîkuû kîmûthingata kîrî akuî.

⁶Arûngama, nthîgûrû ka iinainaga; araithîîria, mîgongo îgateetema; Nabio irîma bia ntwîre bikaaragana, na tûrîma tûrîa twarî akuî na njîra îrîa eetagîîra kuuma kenya tûkorokera nthî.

⁷Ndîroona antû ba Kûshani barî thîîneene; na ba nthîgûrû ya Midiani bamakîte.

⁸Gwe MWATHANI nî mîuro îkûthûûrîîtie? Kana nî îria rîkûthûûrîtie? Gwe weetithîtie matu ta mbarathi; ûreeta na matu ja ngai jarî ngaarî yaaku ya mbarathi, ûracwîra antû baaku ûûmbani.

⁹Gwe nî waritîre mîgwî thigakiine ûreekîra mîgwî ûteene, ûraatûranga nthîgûrû na mîuro îraumîra.

¹⁰Irîma biakwonere birainaina; ndûûjî cia îkoondoria îrakoondoria; Îgûrû rîraurithia ngai, mîgombe ya îria îraitia îgûrû mono.

¹¹Riûa na mweri biarûngamîre ki kûrîa bitwîre nîûntû bwa weerû bwa mîgwî îrîa waagerere, nîûntû bwa kwenia kwa îtumo rîaaku.

¹²Weetîrîîre nthîgûrû ûthûûri; waakinyanga mîgongo na mûthûûro.

¹³Gwe waumagarîre ûreeta kwonokia antû baaku, ûreeta kwonokia mûnene ûrîa uthuurîte. Nî waaringîre mûtongeeria wa barîa baaî, na ûrathiria anthû baawe buru.

¹⁴Mîgwî yaaku yaamuntîre mûtongeeria wa njûûrî ya anthû njûûrî ciaawe cieejîre ta kîbubani nîkenda îtwaragania. Bo bagwîragua bakiinyagîîria nkîa na witho.

¹⁵Îndî gwe nî waakinyangîre îria na mbarathi ciaaku, nacio ndûûjî iraimba iraa inene.

¹⁶Ndaigua mantû jaau jonthe ngateetema, mîromo yaakwa igateetema nî ûguaa; mîîndîîndî yaakwa yûûjûri wonje, na magûrû jaaga inya. Ngeeteera nkiri rîrîa Mûrungu agakanûkia atwithûkîre.

¹⁷Kinya këethîra mûkûû jûtî maciara, na mpang'i cia mûzabibû itîciaraga, kinya mîzeituni îkarega gûciara na miuunda îkaaga irio, kinya ndîîthia cionthe igakua, na ng'ombe ikathira nkanateene,

¹⁸no ngeeta na mbere gûkaatha MWATHANI na nkerû, ngwîrîrue Mûrungu ûrîa ûmbonokagia.

¹⁹ MWATHANI, Mûrungu nîwe inya yaakwa; atûmaga magûrû jaakwa joogîa ta ja nkûrûngû, agatûma mbîtîîra irîmeene.