Read KIMERU BIBLE PROTESTANT EDITION Zef 1 Bible Online

Zef 1 - KIMERU BIBLE PROTESTANT EDITION bible

Zef 1

¹ MWATHANI nî aarîîrie Zefania rîrîa Josia mûtaana wa Amoni aathaga Juda. Zefania aarî mûtaana wa Kuushi, na Kuushi aarî mûtaana wa Gedalia, na Gedalia aarî mûtaana wa Amaria, na Amaria aarî mûtaana wa Hezekia.

²MWATHANI nî aarîrie arauga atîrî, “Nkaathiria into bionthe mbiegere buru kuuma nthîgûrûûne.

³Nkaathiria antû na nyomoo na nthirie nyoni na makûyû. Ngaatûma barîa baaî boombwa buru na nthirie antû nthîgûrûûne buru.

⁴Ngaakanûkia antû ba Juda, na nkanûkie barîa bonthe batwîre Jerusalemu nthirie buru barîa batigeere barîa bathaathagia Baali kuuma gûntû gûkû na athînjîri-mîrungu îtî ya mma boorîrie buru.

⁵Nkaathiria barîa bonthe bathaathagia njota, mweri, na riûa; barî îgûrûgûrû rîa nyomba na nthirie barîa baciîtagia na riîtwa rîa MWATHANI na nyumeene bagaciîtia na mûrungu jwa Moleki;

⁶Ningî nkaathiria barîa bagarûkîte batiga kûthingata MWATHANI, barîa baticwaga MWATHANI, kana beetîkîîria abatongeeria.

⁷Kireeni bûrî mbere ya MWATHANI Mûrungu! Nîkwîthîrwa ntukû ya MWATHANI ya kûgiitanîra îgamba îrî akuî; MWATHANI nî eetîte anthû nîkenda barita antû baawe barî kîgongwana.

⁸Ntukû îîu ya kûritîra MWATHANI kîgongwana yakinya ngaakanûkia atongeeria na ataana ba anene na barîa bonthe bathingataga nkuagaya cia gûntû kûngî.

⁹Ntukû îîu nîyo ngakanûkia athaathayia ba mîrungu îngî barîa bathaathagia ta antû batîîtîkîtie. Ningî ngakanûkia barîa baiyaga na kûûragana nîkenda boojûrîa nyomba cia aathi baao into bia wamba, nîu MWATHANI akuuga.

¹⁰Ntukû îîu kîrîro gîkaigîîgua Mpingîroone ya Makûyû ya Jerusalemu na kiigiigue rûteere rwa ntûûra rûrîa rwaki rua. Ningî gûkaigîîgua kajû ga kîrîro kuuma irîmeene.

¹¹Ugeeni mbu buî bûrî thokoone! Nîkwîthîrwa abiashara bonthe bakeethîrwa bakuîte, barîa baringaga biashara na fetha batîîthîrwa barî o.

¹²Îgiita rîu nkaajûkia taawa nchûûnkûûne Jerusalemu, nkanûkie antû barîa bainyagîîria bangî barîa baugaga na nkoro atî, ‘Gûtîu MWATHANI akaathithia bûbwega kana bûbûûî.’

¹³Into biaao bigaatawa na nyomba ciaao ithûûkangue. Kinya baaka nyomba batiitûûra; na kinya baanda mîzabibû batînyua ndibei yaayo.

¹⁴Ntukû îrîa nene ya MWATHANI îrî akuî, nayo îîjîte na mpwîî mono. Ntukû îîu ya MWATHANI îkeethîrwa îrî înthûûku. Kinya nchamba ya ndwaa îgakaya na kajû.

¹⁵Ntukû îîu ya MWATHANI akoonania mûthûûro jwaawe, ikeethîrwa îrî ntukû ya kwithikîîra na ya thîîna înene, ntukû ya kûthirua buru, na ya muundu jûmûnene.

¹⁶Îkeethîrwa îrî ntukû ya kûringwa ngoji cia ndwaa na kwithûkîra ntûûra îrîa ciirigîri na irî na mûnaara.

¹⁷Nkareetera antû mîthangîko mwanka batue gwîtaga ta ntumuumu, nîûntû bwa ûrîa beeîrîîtie MWATHANI. Tharike yaao îgeetûûrwa ta rûûjî na mîîrî yaao îkare ta ntaka nthîgûrûûne.

¹⁸Thaabu na fetha îtîbateethia ntukû îrîa MWATHANI agaatûrîkîria antû mûthûûro jwaawe. Nthîgûrû yonthe îkaathirua nî marûrû ja mûthûûro jwaawe; nîûntû MWATHANI akaathiria na mpwîî barîa bonthe barî nthîgûrûûne.”