Read KIMERU BIBLE PROTESTANT EDITION Zef 3 Bible Online

Zef 3 - KIMERU BIBLE PROTESTANT EDITION bible

Zef 3

¹Wûi kîrî Jerusalemu, ntûûra îrîa ndemi na maramari, îrîa inyagîîria antû baayo.

²Îtîthikagîîra muntû no ûrîkû, na îtîîtîkagîîria kwîrwa rîrîa îthûûkîtie. Yo îtîîtîkîtie MWATHANI îtîrombaga ûteethio kuuma kîrî Mûrungu waayo.

³Atongeeria baayo bagambaga ta ngatûnyi na agambi baayo bakari ta mbîrwa irî na mpara; irîa itîtigagia gantû karaara o.

⁴Iroria biaayo nî biikoroku, na nî antû batîîtîkîtie Mûrungu. Nabo athînjîri-Mûrungu baayo beekagîra mûgiro birîa birî bibitheru, bakaunaga Waatho nîkenda bathithia ûrîa bakwenda.

⁵Îndî MWATHANI arî ntûûreene kinya nandî na nî ûmwagîru, na atîthithagia ûntû bûbûthûûku. Agitagîra antû baawe îgamba na îota o rûkîîrî o rûkîîrî riûa rîkiuma. Nabo antû barîa batîagîrîte bakaraga bakîîagia na kûthithia jarîa maaî batî na nthoni.

⁶MWATHANI ariuga atîrî, “Nî nthirîtie antû ba mîgongo buru ndathiria biitiiro biaao; na ndaathûûkangia njîra cia ntûûra ciaao mwanka kwaa itîûmba gwîtîîrwa. Ntûûra ciaao nî ciîrûkîri gûtî muntû ûtigeere ku, itî na wa gûtûûra ku.

⁷Ûûni ndaugaga atîrî, ‘Antû baakwa bagaankîra beetîkîîrie ûrîa nkûbeera na atî batîûrîrua nî jarîa mbaritanîte.’ Îndî bo nîka beetîre na mbere kûthithia mantû jamathûûku.”

⁸Tontû bûû, MWATHANI ariuga atîrî, “Mbeteereeni ntukû îgaakinya îrîa nkaa mûkûûjî bûkîgambîrwa. Nî ngitîte kûûthûrania mîgongo amwe, mbûthûranie moonene, nîkenda mbwonia ûrîa nthûûri na inya. Nthîgûrû yonthe îkaathirua nî marûrû ja mûthûûro jwaakwa.

⁹Îî, îgiita rîu, nkaatheria mîromo ya antû ba mîgongo barîa bathaathagia mîrungu ya mîng'uanano, batue kûthaathayia MWATHANI akî, na batue kûmûtumîkagîra wenka, bagwatanîrîte.

¹⁰Kinya kuuma kûraaja Ethiopia, antû baakwa barîa banyaganîtie bakeeja, bandeterete biewa.

¹¹Îgiita rîu rîaakinya, buî antû baakwa bûtîîthîrwa bûrî na gîtûmi gîa kwigua nthao nîûntû bwa îrema rîeenu. Nîkwîthîrwa îgiita rîu, nkaarita barîa baikumagia gatîgatîîne keenu, naabuî bûtîkorogîta îrema kaîrî bûrî kîrîmeene gîaakwa kîrîa kîtheru.

¹²Tontû antû barîa ngaatigia gatîgatî keenu, nî antû bainyiîtie buru. Nabo bagaatua gûcwaga kînogoko riîtweene rîu rîa MWATHANI.

¹³ Bau nî barîa baatigeere ba Israeli. Batîkorothithia ûthûûku kana baaria ûrongo, kana baigîîgua bakîaîrania na tûnyua twaao. Nîkwîthîrwa bo bagakara kiindajî bathinyaare gûtî na ûgwati na gûtî we ûkaabamakia.”

¹⁴Ina na nkerû, gwe Jerusalemu! Ina Israeli! Ina ûgwîrîîtue na nkoro yonthe Gwe mwarî wa Jerusalemu!

¹⁵MWATHANI nî akûthirîrîîtie îkanûkia eenga anthû baaku. MWATHANI mûnene wa Israeli arî amwe naagwe; ûtîkîra ûthûûku kaîrî.

¹⁶Ntukû îîu yakinya Jerusalemu îkeerwa atîrî, “Ûgaakîra gwe Zaiûni; na ûkágogoa njara ciaaku.

¹⁷MWATHANI Mûrungu waaku arî gatîgatî gaaku, We nchamba yaaku ya ndwaa nî akûûmbanîrîte; MWATHANI akaagwîragua nîgwe na agwîkagîre inya nîûntû bwa wendo bwaawe. Akainaga agwîrîîtue nîûntû bwaaku;

¹⁸ta ûrîa muntû ainaga ntukû ya mambura.” MWATHANI ariuga atîrî, “Ngaakûthirîria ûthûûku bûtîgakwîjîîre nîkenda bûtîkeeje gûgwîkîrithia nthao.

¹⁹Atîrî, îgiita rîu rîakinya, ngaakanûkia anthû baaku. Îndî nkoonokia ithua na ncokie atae nja ciaao, na antû a nthao irîa barî nacio bagaakumagua na bamenyeke nthîgûrûûne yonthe.

²⁰Îgiita rîu nîrîo ngagûcokia nja yaaku ndaarîîkia gûgûcokanîîria Îî, ngatûma ûmenyeke mono na ûkumague nî antû ba mîgongo yonthe rîrîa ngaagûcokeria mawega jarîa waarî najo o ûkîonaga.” Ûu nîu MWATHANI augîîte.