Read KIMERU BIBLE PROTESTANT EDITION Hag 1 Bible Online

Hag 1 - KIMERU BIBLE PROTESTANT EDITION bible

Hag 1

¹ Kûrî ntukû ya mbere ya mweri jwa îtaantatû, mwakeene jwa îîrî jwa waathani bwa mûnene wa nthîgûrû ya Parasia tawe Dario, MWATHANI nî aaere kîroria Hagai nteto cia kwîra mûrûngamîîri wa Juda tawe Zerubabeli mûtaana wa Shealitieli, na mûthînjîri-Mûrungu ûrîa mûnene tawe Joshua mûtaana wa Jehozadaki.

²MWATHANI Mweneinya nawe aaugîre ûjû, “Antû baba bariuga îgiita rîtîkinyi rîa gwaka kaîrî kîûrû kîa MWATHANI.”

³MWATHANI nî aarîrie na antû na njîra ya kîroria Hagai arabeera atîrî,

⁴“Ka bûkwona kwagîrîte îgiita rîrî bûkaraga nyomba cieenu imbake bwega îndî nyomba yaakwa îthûûkangîtue?

⁵Tontû bûû, nandî MWATHANI Mweneinya ariuga atîrî, thûgaanieni bwega bwoone ûrîa bûthithîtie.

⁶Buî bwaandîte mono îndî bûketheete bûbûkai; bûrîjaga biakûrîa îndî bûtînyiraga; bûnyunyaga bia kûnyua îndî bûtîthiraga nyoonta; bwîkagîra nguû îndî bûtigagua mûruutîra; na barîa bagwataga mûchaara beekagîra mbeecha ciaao mîbukoone îmîtûrîku.”

⁷Tontû bûû, MWATHANI Mweneinya ariuga ûjû, “Thûgaanieni bwega bwoone ûrîa bûthithîtie.

⁸Itieeni irîmeene bûreete mbaaû bwake kîûrû nîkenda ngwîrua nîkîo, na nîkenda mpûûmba gûkumithîrua ku,” nîu MWATHANI akuuga.

⁹“Buî bweteereete kwona maketha jamaingî îndî rî, bwoneete jamakai. Ningî rîrîa bwaakethere bûraania maketha nî ndaajeenyangîrie. MWATHANI Mweneinya arîûria atîrî, ‘Bûrîthûgaania nîkî tontû ndaathithîrie ûu?’ MWATHANI Mweneinya agacokia atîrî, ‘Nîkwîthîrwa nyomba yaakwa îkarîte îthûûkangîtue, îndî buî nî mantû ja nyomba cieenu akî bûmenyaga bwaacio.’

¹⁰“Kîu nîkîo gîtûmîte kûrega kuura, na miuunda yeenu yaaga gantû.

¹¹Nî ntûmîte kwara mono na kûgîa na mpara nthîgûrûûne; irîmeene, miuundeene ya nkano, na ya mîzabibû, na ya matuunda. Ndatûma ngai îrega kuurîra kîrîa kîonthe gîkûraga nthîgûrû, gîa gûteethia nyomoo na antû.”

¹²Rîu Zerubabeli mûtaana wa Shealitieli, na Joshua mûtaana wa Jehozadaki, na antû bangî bonthe barîa baatigarîte baraathîkîra kajû ka MWATHANI Mûrungu waao. Jehozadaki aarî mûthînjîri-Mûrungu ûrîa mûnene. Ningî baraathîkîra nteto cia kîroria Hagai ûrîa MWATHANI Mûrungu waao aatûmîte. Antû nabo nî baakîrîre MWATHANI mono.

¹³Tontû bûû, Hagai mûtûmwa wa MWATHANI areera antû ntûmwa ya MWATHANI, nayo nî atîrî, “Ndî amwe naabuî.”

¹⁴MWATHANI nî eekîîre antû baba wîru bwa gwakîra MWATHANI Mweneinya, Mûrungu waao kîûrû. Nabo nî mûrûngamîîri wa Juda, tawe Zerubabeli mûtaana wa Shealitieli, na mûthînjîri-Mûrungu ûrîa mûnene, tawe Joshua mûtaana wa Jehozadaki, na antû ba Israeli barîa baatigeere bonthe.

¹⁵Baambîrîrie kûrita ngûgî îîu ntukû ya mîrongo îîrî na inya cia mweri jwa îtaantatû mwakeene jûu jwa îîrî jwa waathani bwa mûnene Dario.