Read KIMERU BIBLE PROTESTANT EDITION Hag 2 Bible Online

Hag 2 - KIMERU BIBLE PROTESTANT EDITION bible

Hag 2

¹Kûrî ntukû ya mîrongo îîrî na îmwe ya mweri jwa mûgwanja mwakeene jwa îîrî jwa waathani bwa mûnene Dario, MWATHANI nî aarîrie kaîrî na njîra ya Kîroria Hagai.

²MWATHANI aramwîra atîrî, “Nandî arîria mûrûngamîîri wa Juda, tawe Zerubabeli mûtaana wa Shealitieli, na mûthînjîri-Mûrungu ûrîa mûnene, tawe Joshua mûtaana wa Jehozadaki na antû bonthe ba Israeli barîa batîgeere ûbeere ûjû:

³ ‘Nûû kîrî buî woona ûrîa kîûrû kîa mbere kîaathongi? Nandî nîatîa bûkwona gîkari? Bûrîkîona ta gîntû kîa ûtheri?

⁴Îndî, gwe Zerubabeli, naagwe mûthînjîri-Mûrungu ûrîa mûnene Joshua mûtaana wa Jehozadaki, naabuî bwinthe antû ba nthîgûrû, MWATHANI arîbwîra gîeni ûchamba! Riteeni ngûgî nîûntû ndî amwe naabuî.’ Ûu nîu MWATHANI Mweneinya akuuga.

⁵ ‘Rîrîa bwaumîre Misri nî ndaabwîkîîre wîrane atî nkethagîrwa ndî amwe naabuî magiita jonthe. Roho waakwa arî amwe naabuî; bûgákîreni.’

⁶ “MWATHANI Mweneinya ariuga atîrî, ‘O kaîrî, îgiita rîtî thau, nkainainia îgûrû, na nthîgûrû, na îria, na nthî înjûmo.

⁷Ningî nkainainia mîgongo yonthe, mwanka mîthithû yaao îreetwe gûkû, naani mbûjûrie nyomba îîjî mwago,’ nîu MWATHANI Mweneinya akuuga.

⁸‘Fetha nî yaakwa, na kinya thaabu nî yaakwa,’ nîu MWATHANI Mweneinya akuuga.

⁹‘Kîûrû kîu gîgaakwa gîkîerû gîkeethîrwa kîrî gîkîthongi nkûrûki ya kîrîa kîa mbere.’ Ningî ni ngatûma antû ba gûkû bathinyaare.” Nîu MWATHANI Mweneinya akuuga.

¹⁰Kûrî ntukû ya mîrongo îîrî na inya ya mweri jwa kenda, mwakeene jwa îîrî jwa waathani bwa Dario, MWATHANI nî aarîîrie Kîroria Hagai kaîrî.

¹¹Aramwîra atîrî, “Ûria athînjîri-Mûrungu bacokie kîûria gîkî:

¹²‘Muntû akëeja gûkamata nyama cia kîgongwana na nguû yaawe, nayo nguû îîu îkaringithia biakûrîa, kana mîgaate, kana ndibei, kana maguta ja nzeituni, kana biakûrîa bia mûthemba jûngî kinya jûrîkû rî, biakûrîa biu biomba kwaa bibitheru?’” Athînjîri-Mûrungu baracokia barauga, “Arî!”

¹³ Rîu Hagai arabooria atîrî, “A-muntû ûrî na mûgiro nîûntû bwa gûtongithia kiimba akariingithia biakûrîa noo birîkû kîrî biu rî, biakûrîa biu bikaagîa mûgiro kinya bio?” Athînjîri-Mûrungu baracokia barauga, “Îî biagîa mûgiro.”

¹⁴Rîu Hagai arabacokeria arabeera atîrî, “MWATHANI ariuga ûu nîu antû baba, na mûgongo jûjû, na ngûgî irîa cionthe baritaga ikari. Kîrîa kîonthe baritagîra iritîroone bia igongwana bitîtheri.”

¹⁵MWATHANI arîîra antû atîrî, “Thûgaanieni ûrîa gûgaakara kuuma nandî, mbere ya bwambîrîria gwaka kîûrû.

¹⁶Nîatîa bwathithagia? Bweetaga ithûmbeene bia nkano bwîrîgîrîte kwona kilo magana jaîrî, îndî bûkoona kilo îgana rîmwe akî. Bwetaga imiriine bia ndibei bwîrîgîrîte kwona lita îgana îndî bûkoona lita mîrongo îna cionka.

¹⁷Ndaatûmaga ruuo rwa mpio na ngai ya nchûgû înene bikaathûûkia birîa bionthe bwaandaga, amwe na ûu bûtaairiraga.

¹⁸Naarua nî ntukû ya mîrongo îîrî na inya ya mweri jwa kenda, ntukû îrîa mûsingi jwa kîûrû kîa MWATHANI jwoojûra. Kuuma nandî bûkoona ûrîa gûgaakara.

¹⁹Kinya këethîra gûtî na irio nchukuune, na gûtî na nzabibû, na nkûû na nkukumanga, na nzeituni, kuuma nandî nkaabûtharima.”

²⁰O ntukû îîu yongwa ya mîrongo îîrî na inya ya mweri jwa kenda MWATHANI nî aarîîrie Hagai kaîrî.

²¹Aramwîra atîrî, “Arîria Zerubabeli, mûrûngamîîri wa Juda ûmwîre ndî akuî kwinainia îgûrû na nthîgûrû,

²²na ndite anene ba mîgongo waathaniine. Nkaathiria ngaarî ciaao cia mbarathi na eetithia cio; mbarathi ciaao ikoragwa na eetithia cio bakooragana bongwa.

²³MWATHANI Mweneinya ariuga ntukû îîu yakinya, gwe nthûûmba yaakwa Zerubabeli mûtaana wa Shealitieli ngaakûthuura waathanage na riîtwa rîaakwa. Nîkwîthîrwa nîgwe nthuurîte.” Ûu nîu MWATHANI Mweneinya akuuga.