Read KIMERU BIBLE PROTESTANT EDITION Zek 1 Bible Online

Zek 1 - KIMERU BIBLE PROTESTANT EDITION bible

Zek 1

¹ Kûrî mweri jwa înaana mwakeene jwa îîrî jwa waathani bwa Dario mûnene wa Parasia, MWATHANI nî aarîîrie kîroria Zekaria mûtaana wa Berekia, Berekia mûtaana wa Ido.

²MWATHANI nî eerîre kîroria kîu kîîre antû atîrî, “Ûûni MWATHANI nî ndaathûûrîre nî biûjûjû bieenu.

³Tontû bûû, îîra antû ûjû: ‘Ûûni MWATHANI Mweneinya ndîbeera bancokeere, naani nkaabacokeera.

⁴Bûgakareeni ta biûjûjû bieenu birîa biatwîre kwîrwa nî iroria atîrî, MWATHANI Mweneinya arîbwîra garûkeeni bûtigane na mîîtîre yeenu îmîthûûku na bûtigane na mathithio jeenu jamathûûku.’ Îndî bio bitaanthikîîra kana bimbathîkîra.” Nîu MWATHANI akuuga.

⁵“Biûjûjû bieenu rî, birî a nandî? A iroria biu rî, birî mwoyo nandî?

⁶Nî ndaanenkeere biûjûjû bieenu maathana jaakwa, na mawaatho jaakwa na njîra ya nthûûmba ciaakwa iroria îndî biûjûjû bieenu nî biaregere kûjaathîkîra na birakanûkua nîûntû bûu. Îndî nî biairirîre na birauga, ‘O ta ûrîa MWATHANI Mweneinya aaugîre nîu agaatûthithîria nîûntû bwa mîîtîre yeetû na mathithio jeetû, nou atûthithîrîtie.’”

⁷Kûrî ntukû ya mîrongo îîrî na inya ya mweri jwa îkûmi na jûmwe taju mweri jûrîa jwîtagwa Shebati, mwakeene jwa îîrî jwa waathani bwa Dario, MWATHANI nî aarîîrie Kîroria Zekaria mûtaana wa Berekia, Berekia mûtaana wa Ido ûrîa waarî kîroria. Zekaria arauga atîrî,

⁸ “Ûtukû nî ndîroonere kîoneki kîa muntû eetithîtie mbarathi întuune! Muntû ûu ararûngi kîguuruune gatîgatî ka matî jarîa jaariibaga îgiita rîonthe na jarî maûa jaeeraga bwega. Nyuma yaawe nî kûraarî na mbarathi intuune, na cia rangi ya nondo, na injerû.

⁹Rîu ndooria atîrî, ‘MWATHANI waakwa, mbarathi iji nî atîa ikwonania?’ Nawe mûraîka ûrîa ûraragia naani ambîîra atîrî, ‘Ngakwîra ûrîa ikwonania!’

¹⁰Tontû bûû, muntû ûu ûrarûûngami gatigatî ka matî jarîa jariibaga îgiita rîonthe jarî na maûa jakweera bwega arancokeria atîrî, ‘Iji nîcio MWATHANI atûmîte icûnkûûna nthîgûrû.’

¹¹Nabo eetithia ba mbarathi nî beerîre mûraika ûu ûrarûngami gatîgatî ka mîtî îîu îriibaga îgiita rîonthe îrî na maûa jakweera bwega atîrî, ‘Tuî nî tûriûnganîtie na nthîgûrû na nî twoneete atî nthîgûrû yonthe îrî na thîîrî.’

¹²Mûraîka wa MWATHANI arooria atîrî, ‘Itû MWATHANI Mweneinya, ka ûgaakanûkia Jerusalemu na ntûûra ingî cia Juda mwanka rî, nîûntû nandî nî ûkarîte mîaka mîrongo mûgwanja ûthûûri nîcio?’”

¹³MWATHANI aracokeria mûraîka ûu waaragia naani nteto cia kîaao na cia kûmûboreria.

¹⁴Mûraîka ûu waaragîa naani arambîîra ntûmîîrie mbuge MWATHANI Mweneinya ariuga atîrî, “Nî mpendeete Zaiûni: Nî mpendeete Jerusalemu na wendo bûbûnene.”

¹⁵Naani nî nthûûri mono nîûntû bwa mîgongo îngî îrîa îthinyaarîte na îrî na thîîrî, nîkwîthîrwa rîrîa ndathûûri bûbûkai nîûntû bwa Israeli, mîgongo îîu ka yeetîre na mbere kûinyeria Israeli.

¹⁶Tontû bûû, MWATHANI ariuga atîrî, “Ngûcoka Jerusalemu nîûntû nî migîrîîtue kîaao. Nayo ntûûra ya Jerusalemu îgaakwa kaîrî ûrîa yaakari, na kîûrû gîaakwa gîaakwe ku.”

¹⁷MWATHANI Mweneinya arambîîra ntûmîîrie kaîrî mbuge atîrî, “Ntûûra ciaakwa ikaathinyaara kaîrî nawe MWATHANI akaaboreria Zaiûni amîteethie na aithuurîre Jerusalemu o kaîrî.”

¹⁸Naani nî ndaaciûkîrie meetho ndîroona ngoji inya.

¹⁹Naani ndîrooria mûraîka ûrîa waaragia naani atîrî, “Ngoji iji irîonania mbi?” Nawe mûraîka arambîîra, “Ngoji iji irûngamîrîte moonene ja nthî jarîa jaaraganîtie Juda na Israeli na Jerusalemu.”

²⁰Rîu MWATHANI arambonia aturi bana.

²¹Naani ndîrooria atîrî, “Baba nîatîa beejîte kûthithia?” MWATHANI arambîîra, “Baba nîbo beejîte kwaragania mîgongo îrîa yaaraganîrie Juda na antû baayo mwanka bararemwa kinya nî gûûkîîria kîongo.”