Read KIMERU BIBLE PROTESTANT EDITION Zek 10 Bible Online

Zek 10 - KIMERU BIBLE PROTESTANT EDITION bible

Zek 10

¹Rombeeni MWATHANI ngai ya mûratho nîûntû nîwe ûreetaga matu na ngai, îkaurîra miuunda ya antû bonthe.

² Mîrungu ya mîng'uanano nî ûrongo yaaragia nabo ooni boonaga mantû jatî ja mma bagataûra irooto bia ûrongo. Kûboreria kûrîa baboranagîria naku nî kwa ûtheri na tontû bûu antû banyaganîtie, ta ng'ondu îtî mûrîîthi, ciithûkîri.

³MWATHANI ariuga atîrî, “Nî nthûûrîîtue nî arîîthi na ngaakanûkia atongeeria. Nîkwîthîrwa ûûni MWATHANI Mweneinya nî menyagîîra ng'ondu cia ûrîîthi bwaakwa nî menyagîîra antû ba Juda. Nabo bakaa mbarathi ciaakwa cia ndwaa.

⁴Kuuma kîrî bo gûkoonora iiga rîa koona, na kwonore biango bia kûrikia maema na kwonore moota ja ndwaa na kwonore atongeeria mwanya mwanya.

⁵Nabo amwe bonthe bakaa njûûrî înene ya ndwaa, na bagaakinyangîra anthû ntakeene; bakarwaa nîûntû MWATHANI arî amwe nabo na bakoomba arûûi beetithîtie mbarathi.

⁶Ngeekîra antû ba Juda inya na ntuunyûkie antû ba Israeli. Nkaabaigîîrua kîaao mbareete nja, bakare ta antû gûtî rîo ndaabamena. Ni nî ni MWATHANI Mûrungu waao na nkaaigagua maromba jaao.

⁷Rîu antû ba Israeli bakagîta inya ta asikarî na bagwîrue ta antû banyuîte ndibei. Nchiarwa ciaao ciaririkana ûûmbani bûu îgaatua kûgwîragua nîûntû MWATHANI nîwe ûbathithîrîtie ûntû bûu.

⁸Ûûni MWATHANI nkaabeeta boothûrane nîûntû nkeethîrwa ndî kûbatunyûkia, nabo bakaingîa bakare ûrîa baakari mbereene.

⁹Kinya këethîra nî ni ndaabanyaganîrie mîgongoone îmingî ningî no bakandirikana barî nthîgûrûûne iu, nabo amwe na nchiarwa ciaao bakeethîrwa barî mwoyo bacoke nja.

¹⁰Nkabareeta nja kuuma nthîgûrû ya Misri na mboothûranie kuuma Asîria; mbareete batûûre nthîgûrûûne ya Gileadi na Libanoni, mwanka kûûjûre antû buru.

¹¹Bakaagiitanîîria îrieene rîa thîîna na mîgombe yaarîo îtîboomba, naju mûuro jwa Naili jûkoomagara buru. Asîria îrîa iikumîtie îkaathirua rwikumio nayo Misri îgaatûnywa inya yaayo.

¹²Ûûni MWATHANI ngeekîra antû baakwa inya nabo bagaakumagia riîtwa rîaakwa.”