Read KIMERU BIBLE PROTESTANT EDITION Zek 12 Bible Online

Zek 12 - KIMERU BIBLE PROTESTANT EDITION bible

Zek 12

¹MWATHANI nî aarîrie nteto ciegiî Israeli. MWATHANI ûu nîwe woombîre îgûrû na nthî, na areekîra muntû mwoyo.

²MWATHANI ûu ariuga atîrî, “Ngatûma Jerusalemu îkara ûmwe na gîkombe kîa ndibei; nayo mîgongo îrîa îmîthiûrûkîrîte îkaanyua yoogite îtang'atang'e ta muntû wogiti. Rîrîa bakaithûkîra ntûûra ya Jerusalemu bamîcîgîîrie, kinya ntûûra ingî cia Juda igacîgîîrua.

³Îgiita rîgaakinya rîrîa ngatûma Jerusalemu îkara ta iiga rîrîrito. Naju mûgongo jûrîa jûkageria kûmîûkîîria no kûringangwa jûkaringangwa. Nayo mîgongo ya nthîgûrû yonthe îkoothûrana îmiithûkîre.”

⁴MWATHANI ariuga atîrî, “Ntukû îîu ngeekîra mbarathi ûguaa bûbwingî na ûrîa ûmîîtithîtie ntûme aume nthû. Ngaakaria antû ba Juda na mbîkîre mbarathi cia anthû baao ûtumuumu.

⁵Nayo mîîrîga ya Juda îkeeranaga atîrî, ‘MWATHANI Mweneinya, Mûrungu wa antû ba Jerusalemu, nîwe ûbaeejaga inya.’”

⁶Îgiita rîu ûûni ngatûma antû ba mîîrîga ya Juda bakara ta mwanki jûkûîîthia mwitû, kana ta kînyinga gîcinîte nkano mwanki. Nabo bakaathiria mîgongo îrîa yonthe îbathiûrûkîte. Nabo antû ba Jerusalemu bagaakara ntûûreene yaao kiindajî.

⁷Naani ûûni MWATHANI ngatûma mîciî ya Juda yûmbana îrî mbere nîkenda ûkumio bwaao bûtîkaingîîrwe nî ûkûmio bwa nchiarwa cia Daudi na bwa antû ba Jerusalemu.

⁸Îgiita rîu MWATHANI agaakaria barîa batwîre Jerusalemu, na kinya barîa boonju buru gatîgatîîne kaao bakagîa inya o ta Daudi. Nchiarwa cia Daudi ikaabatongeeria ta mûraîka wa MWATHANI, bakare ta Mûrungu abatongeeretie.

⁹Ntukû îîu ûûni MWATHANI nkaathiria mîgongo yonthe îrîa yeendaga kwithûkîra Jerusalemu.

¹⁰ “Ningî nkoojûria nchiarwa cia Daudi na antû bangî ba Jerusalemu Roho wa kîaao na Roho wa maromba. Bagaatua kwonaga barîa booragîte bakabarîrîra ta ûrîa muntû arîragîra mwana waawe wa mûûmwe. Ningî bakabarîrîra ta muntû ûkuîri nî mûtaana wa kîranga.

¹¹Ntukû îîu kîrîro kîrîa gîkeethîrwa kîrî Jerusalemu nî ûmwe na kîrîa gîkeethîrwa kîrî o nîûntû bwa Hadadi-rimoni îrîa îrî bûûrîîne ya Megido.

¹²O mûciî jûkairîrîra junka rîu nthîgûrû îkeethîrwa îrî na kîrîro. Mîciî ya nchiarwa cia Daudi îkaarîra yonka, na mîciî ya nchiarwa cia Nathani îkarîra yonthe. Aka ba mîciî îîu bakaarîra barî bonka na arûme barîre barî bonka.

¹³Mîciî ya nchiarwa cia Lawi îkaarîra yonka, na mîciî ya antû ba Shime îrîre yonka. Aka ba mîciî îîu nabo bakaarîra barî bonka na arûme barîre barî bonka.

¹⁴Nayo mîciî îîu îngî îtigeere yonthe îkaarîra îrî yonka, o mûciî na bwaaju. Nabo aka ba mîciî îîu bakaarîra barî bonka na arûme barîre barî bonka.”