Read KIMERU BIBLE PROTESTANT EDITION Zek 13 Bible Online

Zek 13 - KIMERU BIBLE PROTESTANT EDITION bible

Zek 13

¹MWATHANI Mweneinya ariuga atîrî, “Ntukû îîu yakinya, kîthima gîa kûtheria nchiarwa cia Daudi na antû ba Jerusalemu kuuma meeyiene na mîgiroone yaao gîkeethîrwa kîrî o.”

²MWATHANI Mweneinya ariuga atîrî, “Ntukû îîu yakinya, nkaarita mariîtwa ja mîrungu ya mîng'uanano kuuma nthîgûrûûne nayo îtîririkanwa kaîrî. Nkaathiria barîa bonthe baciîtaga iroria, na nthirie wîru bwaao bwa kwenda kûthaathayia mîng'uanano.

³Kuuma rîu muntû ûrîa ûgaaciîta kîroria kaîrî, nî îthe na ng'ina bongwa bakauga ooragwe nîûntû bwa kwaria ûrongo riîtweene rîa MWATHANI. Rîrîa akaaroria nî îthe na ng'ina bongwa bakaamûmunta akue.

⁴Îgiita rîu iroria bionthe bikagîa nthao nîûntû bwa bioneki biaao birîa booneetue. Ningî batîkoroîkîra nguû cia ûroria baayia antû.

⁵Nakîo kîroria kîauga, ‘Arî ûûni ndî mûrîmi ntî kîroria; ntwîre kûrîma kuuma ndî mwana.’

⁶Ningî muntû akîûria, ‘A iringîrwa biu birî kîbara nî bia mbi?’ Kîroria gîgaacokia, ‘Nîka ndaaringîîrwe nyomba ya mûcoore waakwa.’”

⁷ MWATHANI Mweneinya ariuga atîrî, “Mûrîîthi wa ng'ondu ciaakwa akaithûkîrwa, mûcoore ûu waakwa akooragwa. Rûchiû nî rûthirie mûrîîthi, nacio ng'ondu inyaganie; Ningî nkooraga kinya twaana.

⁸Antû baîrî kîrî o bathatû nthîgûrûûne bakooragwa, nî muntû ûmwe akî kîrî bathatû ûgaatigara arî mwoyo.

⁹Nabo antû bau bagatigara bakaatherua ta ûrîa fetha îtheragua na mwanki bagerue ta ûrîa thaabu îgeragua na mwanki. Nabo bakaandomba naani nkaigua maromba jaao. Nkabeera, ‘Buî bûrî antû baakwa’ nabo bambîîre, ‘Gwe MWATHANI nîgwe Mûrungu weetû.’”