Read KIMERU BIBLE PROTESTANT EDITION Zek 14 Bible Online

Zek 14 - KIMERU BIBLE PROTESTANT EDITION bible

Zek 14

¹Atîrî, ntukû nî yeengeerie gûkinya îrîa MWATHANI agaatuîra antû îgamba. Rîu into birîa bikeethîrwa bitai Jerusalemu bikagawa bakîonaga.

²Nîkwîthîrwa ûûni MWATHANI nkoothûrania mîgongo iithûkîre ntûûra ya Jerusalemu, batae ntûûra, aka bathengeerwe kwa inya, na nusu ya antû ba ntûûra bagaaikua kîthamîrioone, îndî antû bau bangî batîthaamua kuuma ntûûreene.

³Rîu MWATHANI akaumagara akarwee na mîgongo îîu, ta ûrîa aarûjaga nabo mbereene.

⁴Îgiita rîu rîakinya MWATHANI akaarûngama kîrîmeene kîa Mîzeituni bwa ûmotho ya Jerusalemu. Nakîo Kîrîma kîu kîa Mîzeituni gîkagaûkanua jaîrî nî mûguuru jûmwariî kuuma gaiti gwîta rûgûrû. Tontû bûû, rûteere rûmwe rûkare bwa ûrîo na rûngî bwa ûmotho.

⁵Naabuî bûkamatûkîîra mûguuruune jûu jûgaanîtie kîrîma jaîrî. Bûkamatûka o ta ûrîa biûjûjû bieenu biathithîrie rîrîa nthîgûrû yainainîre îgiiteene rîa Uzia mûnene wa Juda. Nawe MWATHANI Mûrungu weenu akeeja na barîa atheru bonthe.

⁶Ntukû îîu yakinya gûtîîthîrwa kûrî na mpio kana nduume.

⁷Nayo ntukû îîu gûtîtuka, na kinya ûtukû gûkeethîrwa kûrî na weerû. Ntukû îîu nayo nî MWATHANI akî wiijî rîrîa îgaakinya.

⁸ Ntukû îîu rûûjî rûrwega rûkauma Jerusalemu. Nusu ya rûûjî rûu rûgeeta îrieene rîa Chumbî, na nusu ya rûûjî rûngî rwîte îrieene rîa Mediterania. Naru rûkethagîrwa rûrî o magiita jonthe.

⁹Rîu MWATHANI akaa mûnene wa nthîgûrû yonthe. Antû bonthe bakaamenya riîtwa rîmwe rîaawe na bathaathagie MWATHANI ûmwe.

¹⁰Nthîgûrû yonthe îkaang'ananîrua kuuma Geba bwa rûgûrû mwanka Rimoni bwa ûmotho. Nayo Jerusalemu îkeethîrwa yûkîîrîte nkûrûki ya gûntû kûu, ntûûra îîu îîthîrwe yumîte Mpingîroone ya Benjamini mwanka gûkinya Mpingîroone ya Mûthia, arîa kwaarî na kîrîngo kîa Hananeli mwanka gûkinya kîmiriine kîa mûnene kîa nzabibû.

¹¹ Antû bagaatûûra kiindajî Jerusalemu gûtî na ûgwati bwa kûthirua.

¹²Narîo îkanûkia rîrîa MWATHANI agakanûkia narîo barîa barûjaga na Jerusalemu nî rîrî; bakoora nyama cia mwîrî o barî mwoyo; ningî meetho jaao jakoora jarî ncûgûniine cia meetho, na ndûûme ciaao ciore o irî tûnyueene twaao.

¹³Îgiita rîu MWATHANI akaabangaratania abeekîre ûguaa mwanka antû bagarûkanîre booragane bongwa muntû na ûngî.

¹⁴Ningî kinya antû ba Juda bakaarwîrîra Jerusalemu. Ûtonga bwa mîgongo yonthe îrîa îbathiûrûkîte bûkoothûranua, ta thaabu, na fetha, na nguû kwa wingî.

¹⁵Ningî mûrimo jûmûthûûku jûkagwata mbarathi, na nyûmbû, na nkamîîra, na ntigiri, na nyomoo ingî cionthe irîa ikeethîrwa irî kambîîne ya anthû.

¹⁶ Nabo bonthe barîa bagaatigara kuuma kîrî antû ba mîgongo îrîa iithûkagîra Jerusalemu, bageeta o mwaka o mwaka kûthaathayia mûnene, MWATHANI Mweneinya, na gûkûngûagîra mambura ja tûgaanda.

¹⁷Ningî kinya mûgongo jûmwe nthîgûrûûne jûkarega gwîta kûthaathayia mûnene, MWATHANI Mweneinya, ngai îtiura nthîgûrûûne.

¹⁸Nabo antû ba Misri barega gwîta gûkûngûîra mambura ja tûgaanda, bagaakanûkua na mîrimo îrîa MWATHANI augîîte agaakanûkia nayo mîgongo îrîa îregaga gûkûngûîra.

¹⁹Îkanûkia rîu nîrîo Misri na mîgongo îngî îrîa îtîkûngûagîra mambura jau ja tûgaanda bagaakanûkua narîo.

²⁰Îgiita rîu rîakinya ntuara cia mbarathi ikaandîkwa atîrî, “Întheru nîûntû bwa MWATHANI.” Nacio nyongû cia kîûrû kîa MWATHANI ikaa intheru o ta mpakûri irîa irî mbere ya kîritîro kîa igongwana.

²¹Nacio nyongû irîa irî Jerusalemu cionthe na irîa irî Juda ikaa intheru nîûntû bwa MWATHANI Mweneinya, nîkenda itumagîrwa nî bonthe barîa beetaga kûrita igongwana, bachamukia nacio nyama iu cia igongwana. Ntukû îîu yakinya gûtî mûbiashara ûgaatigwa kîûrûûne kîa MWATHANI Mweneinya.