Read KIMERU BIBLE PROTESTANT EDITION Zek 2 Bible Online

Zek 2 - KIMERU BIBLE PROTESTANT EDITION bible

Zek 2

¹Naani rî, nî ndaaciûkîrie meetho ndîroona muntû ûgwete mûrigi jwa kûthima,

²Naani ndîramûûria atîrî, “Nîkû weeta?” Nawe muntû ûu arambîîra atîrî, “Mbîtîte kûthima ûraaja na waariî bwa ntûûra ya Jerusalemu.”

³Rîu ndîroona mûraîka ûrîa waaragia naani eetaîta mbere. Mûraîka ûngî nawe araumîra kûmûtirima.

⁴Mûraîka ûu areera ûngî atîrî, “Matûka wîre mûthaka ûrîa ûgwete mûrigi jwa kûthima atî Jerusalemu gûkeethîrwa kûrî na antû babaingî mono na nyomoo inyingî mono. Tontû bûu, îgaatûûrwa îtî na nthingo.

⁵Nîkwîthîrwa MWATHANI augîîte nîwe wengwa ûkaa rûthingo rwaayo rwa mwanki kûmîthiûrûkîra. Ningî agaakaraga ku na mwago jwaawe.”

⁶MWATHANI ariuga atîrî, “Buî matûkeeni buume nthîgûrû ya Babiloni. Nîkwîthîrwa ûûni nî ndaabûnyagîrie nteere cionthe mwanka mûthia jwa nthîgûrû.

⁷Atîrî, matûkeeni bûcooke Zaiûni buî bûtwîre Babiloni.

⁸Tontû MWATHANI Mweneinya, nîûntû bwa ûkûmio bwaawe, nîwe ûntûmîte kîrî buî mîgongoone îrîa bwanyagîrue nîkenda mbwîra atî ûrîa wonthe ûbûringithagia nî MWATHANI aringithagia.”

⁹Nîkenda bûmenya MWATHANI Mweneinya nîwe ûntûmîte ariuga atîrî, “Nkarwaa nabo na batawe nî barîa barabatumîkagîra.

¹⁰Buî antû ba ntûûra ya Zaiûni ineeni na bûgwîrue nîûntû rî, nî mbîjîte gûtûûrania naabuî,” nîu MWATHANI akuuga.

¹¹Îgiita rîu, antû ba mîgongo îmiingî bageeta kîrî MWATHANI batuîke antû baawe. Nawe agaakaraga gatîgatîîne kaao. Rîu bûkaamenya nîwe ûntûmîte kîrî buî.

¹²O kaîrî MWATHANI akaithuurîra Juda yee nthîgûrû yaawe îrîa ntheru na aithuurîre Jerusalemu yee ntûûra yaawe.

¹³Antû bonthe nî bakire ki mbere ya MWATHANI nîûntû eejîte aumîte gîkaroone kîaawe kîrîa kîtheru.