Read KIMERU BIBLE PROTESTANT EDITION Zek 3 Bible Online

Zek 3 - KIMERU BIBLE PROTESTANT EDITION bible

Zek 3

¹ MWATHANI nî aambonerie Joshua mûthînjîri-Mûrungu ûrîa mûnene arûngami mbere ya mûraîka wa MWATHANI. Nawe Nkoma nî aarûngami rûteere rwa ûrîo rwa Joshua nîkenda amûthitanga kîrî MWATHANI.

² Mûraîka nî eerîre Nkoma atîrî, “Gwe Nkoma ûrî ûmûrume nî MWATHANI! MWATHANI ûrîa ûthuurîte Jerusalemu arokûgondokera! Muntû ûûjû akari ta kînyinga kîriti mwankiine.”

³Joshua aarûngami mbere ya mûraîka eekîrîte nguû irî na rûko.

⁴Mûraîka areera antû bau baarûngami au mbere yaawe atîrî, “Mûriteeni nguû iu irî na rûko.” Ningî areera Joshua atîrî, “Ûûni ngûkûthirîria meeyia jaaku na nkuuga wîkîrwe nguû cia goro inthongi.”

⁵Mûraîka aracoka areera antû bau bamwoge kîremba mûtwe. Nabo baramwoga kîremba mûtwe na baramwîkîra nguû. Mûraîka wa MWATHANI no aarûngami au.

⁶Mûraîka ûu wa MWATHANI nî eerîre Joshua atîrî,

⁷“MWATHANI Mweneinya arîkwîra ûjû, ‘Wathingata Waatho bwaakwa na wathithia ûrîa buugîîte, rîu ûgaatongagîîria mantû ja kîûrû gîaakwa na jarîa jathithagua biaragoone bia kîûrû kîu. Ningî nkaigagua maromba jaaku o ta ûrîa mbigagua maromba ja araîka baba barûngami aja.

⁸ Gwe Joshua mûthînjîri-Mûrungu ûrîa mûnene na acoore baaku barîa bakari nthî mbere yaaku thikîîreeni, nîûntû nî buî bûkaareeta wega nyumeene. Atîrî, nkaareeta nthûûmba yaakwa îrîa îtagwa Rwang'i.

⁹Ûûni MWATHANI Mweneinya ndiuga nî ngwîka iiga rîa nteere mûgwanja mbere ya Joshua. Naani nkaandîka nteto ku na njîra ya kwaja. Ntukû îmwe akî nkaathiria meeyia ja nthîgûrû îîjî.

¹⁰ Ntukû îîu yakinya o muntû ageetaga mûtûûri waawe akamwîra akare nthî rungu rwa mîzabibû yaawe na mîkûû yaawe bathinyaarîte.’”