Read KIMERU BIBLE PROTESTANT EDITION Zek 4 Bible Online

Zek 4 - KIMERU BIBLE PROTESTANT EDITION bible

Zek 4

¹Mûraîka ûrîa waambaragîria nî aambarîîrie o kaîrî arambûkia ta muntû ûmami toro.

²Arambûûria atîrî, “Nîmbi ûkwona?” Naani ndîramwîra, “Ndîona gîtugî kîa thaabu kîrîa kûrîkagîîrwa taawa. Kîrî na gampakûri kathûmbîîne gaakîo, na taawa mûgwanja irîkîîri kîrî kîo, na o taawa îrî na rûtambi rwaayo.

³ Ningî mîtî îîrî ya mîzeituni nî yaarî rûteere rwa gîtugî kîu: mûtî jûmwe rûteere rwa ûrîo na jûngî rwa ûmotho.”

⁴Naani ndîrooria mûraîka ûu atîrî, “Mwathi waakwa, into bibi nîmbi bikwonania?”

⁵Mûraîka ûu arancokeria arambûûria atîrî, “Ga-ûtîkûmenya into bibi nîmbi?” Naani ndîramwîra, “Arî mwathi waakwa, ntîkûmenya.”

⁶ Mûraîka arambîîra, “MWATHANI Mweneinya arîîra Zerubabeli ûjû: Tî inya yaaku, kana ya njûûrî yaaku îgaakûretera ûûmbani, îndî ûkoona ûûmbani na inya ya Roho wa MWATHANI.

⁷Kinya irîma bibinene bitîrûngama mbere yaaku. Zerubabeli naagwe ûgaaka kîûrû kaîrî, na ûkîrîîkia gwaka antû bakauga, ‘Nî gîkîthongi, kîthongi mono.’”

⁸Ningî MWATHANI nî aambarîîrie arambîîra atîrî,

⁹“Zerubabeli nîwe wakîte mûsingi jwa kîûrû na nîwe ûgaagîaka mwanka akîûjûrie. Rîu nîrîo bûkaamenya MWATHANI Mweneinya nîwe ûntûmîte.

¹⁰ Nîkwîthîrwa barîa baamenaga kagûgî gagakai karîa Zerubabeli aaritîte, bakaagwîrua boona agîîta na mbere na waaki.” Mûraîka arambîîra atîrî, “Tawa iji mûgwanja nî meetho mûgwanja ja MWATHANI jarîa jakaraga jategeete nthîgûrû yonthe.”

¹¹ Rîu ndîramûûria atîrî, “A-mîtî îîjî îîrî ya mîzeituni îrî rûteere rwa ûrîo na rwa ûmotho rwa gîtugî kîa kûrîkîîra taawa nîmbi?”

¹²Ningî ndîramûûria kaîrî atîrî, “Mpang'i iji ijîîrî cia mîzeituni irî rûteere rwa mûberethi jwa thaabu jûrîa maguta jaaritagwa nî ciambi?”

¹³Mûraîka arambûûria, “Ga ûtîkûmenya nî ciambi?” Naani ndîramwîra, “Arî mwathi waakwa ntîkûmenya.”

¹⁴Mûraîka arambîîra atîrî, “Mpang'i iu nî antû baîrî barîa MWATHANI wa nthîgûrû yonthe athuurîte na njîra ya gwîtûûrîrua maguta nîkenda bamûtumîkagîra.”