Read KIMERU BIBLE PROTESTANT EDITION Zek 5 Bible Online

Zek 5 - KIMERU BIBLE PROTESTANT EDITION bible

Zek 5

¹Ningî rî, o kaîrî nî ndaaciûkîrie meetho ndîroona yuku rîbuurûkîte.

²Mûraîka arambûûria, “Nîmbi ûkwona?” Naani ndîramûcokeria ndîramwîra, “Nî yuku nkwona rîbuurûkîte; narîo nî rîa ûraaja bwa mita îkûmi (10m) na waariî bwa mita ithaano (5m).”

³Nawe mûraîka arambîîra atîrî, “Yuku rîu rîandîki kîrumi kîrîa gîkagwata nthîgûrû yonthe. Rûteere rûmwe rwa yuku kwaandîki atî o mwamba wonthe akaathamua nthîgûrûûne; ningî rûteere rûngî rwaandîki atî o mûrongo wonthe ûrîa ûkûûjagîîra mantû ja ûrongo kinya we akaathaamua nthîgûrûûne.

⁴MWATHANI Mweneinya ariuga atî agaatûma kîrumi kîu kîgwata nyomba ya o mwamba wonthe na ya o mûrongo wonthe ûrîa ûciîtagia na riîtwa ria MWATHANI. Kîrumi kîu nakîo gîgakara nyomba ta iu kîthirie mbaaû na maiga.”

⁵Mûraîka ûu waambaragîria areeja arambîîra atîrî, “Ciûkia meetho woone nîmbi îîjî îîjîte.”

⁶Naani ndîramûûria “Nîmbi yo?” Nawe mûraîka arambîîra atîrî, “Nî kîtheti kîrîa kîthimaga into kîîjîte, nakîo nî ngerekano ya meeyia ja nthî yonthe.”

⁷Kîtheti kîu rîrîa gîakunûrîrwe nkûnîki yaakîo ya chuuma îrîa îthithagia mbûrûbûrû, mûka nî aakari nthî ku.

⁸Mûraîka arambîîra atîrî, “Mûka ûûjû nî ngerekano ya ûthûûku.” Mûraîka aratiindîkîîria mûka ûu kîthetiine na aragîkunîka kaîrî na nkunîki îîu ya chuuma îrîa îthithagia mbûrûbûrû.

⁹Naani rî ndîraciûkia meetho ndîroona aka baîrî beejîte babuurûkîte ruuoone na mathagu ta jarîa ja namîtoori. Nabo barajûkia kîtheti kîu gîa kûthima barabuurûka nakîo îgûrû buru.

¹⁰Naani ndîrooria mûraîka atîrî, “Nîkû baikîîtie kîtheti?”

¹¹Nawe arambîîra, “Bagiikîîtie Babiloni kûrîa bagagîakîra kîûrû. Nakîo kîojûra bagagîîka ku nîkenda kîthaathagua.”