Read KIMERU BIBLE PROTESTANT EDITION Zek 7 Bible Online

Zek 7 - KIMERU BIBLE PROTESTANT EDITION bible

Zek 7

¹Kûrî ntukû ya inya ya mweri jwa kenda taju jûrîa jwîtagwa Kisilevu, mwakeene jwa îna jwa waathani bwa mûnene Dario, MWATHANI nî aarîîrie Zekaria.

²Nabo antû ba Betheli nî baarî bagûtûma Sharezeri na Regemumeleki na antû baao beeta kîûrûûne kûromba MWATHANI nîkenda abatharima.

³Ningî beetîte kûûria athînjîri-Mûrungu ba kîûrû kîa MWATHANI Mweneinya na kûûria iroria atîrî, “Twîte na mbere kwithikîîra na gûciata biakûrîa mweri jwa îtaano ta ûrîa tûtwîre kûthithia mîaka îmingî?”[1]

⁴MWATHANI Mweneinya nî aambîrîre atîrî,

⁵“Ûria antû bonthe nthîgûrûûne na athînjîri-Mûrungu atîrî, rîrîa baithikagîîra na gûciata kûrîa mweriine jwa îtaano na jwa mûgwanja, mîaka îîjî mîrongo mûgwanja îthirîte, nî ûûni ndaatûmaga baciata kûrîa?

⁶A rîrîa barîjaga na kûnyua rî, tîka barîjaga na kûnyua nîkenda banyiria biu biaao?

⁷“Rîrîa Jerusalemu yaatûûri na yaarî na ûtonga bûbwingî, o amwe na tûtûûra tûrîa twamîcîgîîrîîtie, na rîrîa nthîgûrû ya bwa ûmotho na ya bwa irîma bia bwa rûgûrû ciatûûri, nîka MWATHANI ataarîrie nteto na njîra ya iroria birîa biaarî o îgiita rîu?”

⁸MWATHANI nî aarîîrie Zekaria aramwîra atîrî,

⁹“Ûûni MWATHANI Mweneinya ndiuga ûjû: Giitanagîreeni magamba na îota na bwiganagîîrue kîaao.

¹⁰Menya bwinyagîîria ntigwa, kana aana barîa batî na aciari, kana ageni, kana nkîa. Gûtî muntû weenu ûbuîrîte kûbangîra ûngî mîbango ya kûmûthûûkia.”

¹¹Nabo antû nî baaregere kwathîka baroomia mîtwe na barakunîka matû batîkaigue.

¹²Ningî baroomia nkoro irakara ta iiga na bataathikîîra ûritani bwa MWATHANI Mweneinya, na bataigua nteto irîa Roho waawe aarîîtie na njîra ya iroria bia mbere. Tontû bûû, MWATHANI Mweneinya arathûûra mono.

¹³O ta ûrîa bataambigîrue ndabeeta nîo u naani ndaaregere kûbaigua baankaîra.

¹⁴Ndîrabanyagania nthîgûrûûne kunthe o ta kîbuubani. Nayo nthîgûrû îîjî njega îrathûûka na îraaga muntû wa gûtûûra ku.