Read KIMERU BIBLE PROTESTANT EDITION Zek 8 Bible Online

Zek 8 - KIMERU BIBLE PROTESTANT EDITION bible

Zek 8

¹MWATHANI Mweneinya nî aambîrîîrie arambîîra atîrî,

²“Nî mpendeete Zaiûni na wendo bwa rûriitho na ningî wendo bûu nîbu bûtûmîte mbigua ngîakanîrwa nî mûthûûro.

³Ûûni MWATHANI ndiuga atîrî, Ngaacoka Jerusalemu ntûûra yaakwa îrîa ntheru na nkarage ku. Nayo Jerusalemu îgatua gwîtagwa ‘ntûûra ya gwîtîkîka’ na îîtagwe ‘kîrîma kîa MWATHANI Mweneinya; kîrîma gîkîtheru.’

⁴Ningî o kaîrî antû babakûrû aka na arûme bagaakaraga nthî kîaragoone, nabo bakethagîrwa bakûri mwanka bageetaga na mîreegi.

⁵O kaîrî njîra cia ntûûra ikoojûra twaana twa tûîjî na twarî tûtue gûtindanagîria ku.”

⁶MWATHANI Mweneinya ariuga ûjû, “Antû barîa batigi barîona ûntû bûu bûtîûmbîkîka, îndî kîrî ni ûntû bûu bwombîka.

⁷Atîrî, nkoonokia antû baakwa barîa barî nthîgûrû ya bwa gaiti na ya bwa rûgûrû.

⁸Nabo nkaabareeta batûûrage Jerusalemu; baee antû baakwa naani mpee Mûrungu waao mwîtîkua na ûmwagîru.”

⁹MWATHANI Mweneinya ariuga “Buî bwigagua nteto cia iroria kuuma rîrîa mûsingi jwa kîûrû jweekîîrwe nîkenda kîûrû gîaakwa kaîrî, gîeeni inya.

¹⁰Nîkwîthîrwa mbere ya îgiita rîu gûtî muntû ûrîngî kûûmba gûkombora nthûûmba, kana nyomoo. Antû batîngî îtaîta nîûntû bwa ûgwati bwa maitha; nîkwîthîrwa nî ndaarwîthanîtie muntû na mûtûûri waawe.

¹¹Îndî nandî ntîthithîria matigari ja antû baba ûrîa ndaabathithagîria mbere.

¹²Nîkwîthîrwa bakaanda into biaao na thîîrî; mîzabibû na nthîgûrû yuume maketha jamaingî na ngai iingîe. Naani ngatûma antû barîa bakeethîrwa batigere beethîrwe barî na into biu bionthe.

¹³Ningî kinya këethîra bûtûûraga bûrumagwa nî antû ba mîgongo îngî buî antû ba Israeli na Juda, ûûni nkaabwonokia na bûtharime. Bûgaakîreeni, gîeeni na inya.”

¹⁴Nîkwîthîrwa MWATHANI Mweneinya arîbwîra atîrî, “O ta ûrîa ndaagiitîte gûkanûkia biûjûjû bieenu rîrîa bianthûûrîrie, na ntaagarûkîre,

¹⁵nou îgiita rîrî ngiitîte kûthithîria antû ba ntûûra ya Jerusalemu na ba nthîgûrû ya Juda bûbwega. Tontû bûû, bûgákîra.

¹⁶ Mantû jaja nîjo bûbuîri kûthithagia: kwaranagîria nteto cia mma, na kûgiitanagîra magamba na îota kotini, na gûcwaga thîîrî.

¹⁷Menyeni bûbanganagîra mîbango îmîthûûku muntû na ûngî, na bûkeendaga gûciîtagia mîciîtio ya ûrongo, nîkwîthîrwa jau jonthe nî njathwîre.” Ûu nîu MWATHANI akuuga.

¹⁸Ningî MWATHANI Mweneinya nî aambarîîrie arambîîra atîrî,

¹⁹“Ûjû nîu nkuuga ûûni MWATHANI Mweneinya: Îgiiteene rîrîa bûciataga kûrîa mweriine jwa îna, na jwa îtaano, na jwa mûgwanja, na jwa îkûmi, nîrîo antû ba Juda bakagwîragua na bagakûngwîra biathoone. Tontû bûû, endageni ûûma na bûcwage thîîrî.”

²⁰MWATHANI Mweneinya ariuga atîrî, “Îgiita nî rîîjîte rîrîa antû babaingî bakaumaga ntûûreene inyingî bageeta Jerusalemu.

²¹Antû ba ntûûra îmwe bagaatua gwîtaga kîrî ba ntûûra îngî bakabeera atîrî, ‘Twîteeni na mpwîî tûkathaathayie MWATHANI Mweneinya, na tûrombe atwigîîrue kîaao.’

²²Antû babaingî ba mîgongo îmenene îrî na inya bakeejaga Jerusalemu kûthaathayia MWATHANI Mweneinya na kûmûromba abaigîîrua kîaao.

²³MWATHANI Mweneinya ariuga atîrî, îgiita rîu rîakinya, antû îkûmi ba mîgongo ingî bagatua kûgwataga Mûyahudi ûmwe bakamwîra, ‘Gatwîtanie naagwe nîûntû tûkwigua Mûrungu arî amwe naabuî.’”