Read KIMERU BIBLE PROTESTANT EDITION Zek 9 Bible Online

Zek 9 - KIMERU BIBLE PROTESTANT EDITION bible

Zek 9

¹ Nteto iji nîcio MWATHANI arîîtie: Atî agakanûkia nthîgûrû ya Hadiraki, na akanûkie ntûûra ya Damaski. Nîkwîthîrwa rî, kinya ntûûra cia Sîria nî cia MWATHANI, o ta ûrîa mîîrîga yonthe ya Israeli îrî ya MWATHANI.

²Ningî nteto îîjî nî ciegiî ntûûra ya Hamathi îrîa îriganîrîtie na Tiro na Sidoni, Kinya këethîra Tiro na Sidoni irî ûûme bûbwingî.

³Antû ba Tiro baciakîrîte nthingo cia gwikaria nacio na baicwîra fetha înyingî ta mûthanga na thaabu înyingî ta tîîri.

⁴Îndî rî, MWATHANI agatuunya Tiro into biu ajûkie ûtonga bwaayo abûgere îrieene, nayo îkaîîthua na mwanki.

⁵ Ntûûra ya Ashikeloni yoona ûu îgaakîra; na kinya ya Gaza îgaateetema nî ûguaa; Kinya ntûûra ya Ekironi îkaathirua wîrîgîîro buru, mûnene wa Gaza akooragwa nayo Ashikeloni îtigwe îtîtûûri nî antû.

⁶Antû ba mîthemba îmingî bagatûûra Ashidodi na nthirie rwikumio rwa Afilisti.

⁷Naani ngatûma batiga kûrîa nyama irî na tharike, na batîrîjaga biakûrîa birî mûgiro; antû baao barîa bagatigara bagakara ûmwe na antû ba mwîrîga jwa Juda. Antû ba Ekironi bakaa antû baakwa o ta ûrîa ba Jebusi baakarîre.

⁸Rîu ngaakaria nyomba yaakwa kuuma kîrî njûûrî irîa îgakûrûkagîîra nthîgûrûûne, nîkenda gûtîonora njûûrî ya gûkûrûkîîra ku na gûtî anthû bakamiinyîîria kaîrî, nîûntû nî mboneete na meetho jaakwa ûrîa bainyîîrîîtue.

⁹ Gwîrueni mono buî antû ba Zaiûni! Bûgwîrue bûkîthekaga buî antû ba Jerusalemu. Tontû mûnene eejîte kîrî buî; arî na ûûmbani bûbûnene, îndî ainyiîtie akamati nî ntigiri, akamati nî kajaû ga ntigiri.

¹⁰ MWATHANI ariuga atîrî, “Nkaathiria ngaarî cia ndwaa kuuma Efuraimu na nthirie mbarathi cia ndwaa kuuma Jerusalemu; na nthirie moota ja ndwaa. Nawe mûnene weenu akaarîria mûgongo mantû ja thîîrî. Ningî akaathanaga kuuma îrieene gwîta rîngî na kuuma mûuro jwa Eufurate gwîta nthî yonthe.”

¹¹ MWATHANI ariuga atîrî, “Kinya buî, nkaabuthaûrîra atae beenu barîa batwîre îrinyeene rîtî rûûjî rîa kîthaamîrio, nîûntû bwa kîrîkanîro gîaakwa naabuî kîa tharike.

¹²Cokeeni kuuma kîthamîrioone buî bûrî na wîrîgîîro bûcoke kûrîa bûtwîre gûtî ûgwati. Naani naarua ndîbwîra nkabûrîaa maita jaîrî nîûntû bwa mîthangîko yonthe îrîa bwoneete.

¹³Ngaatumîra Juda ta ûta bwa asikarî na ntumîre Israeli ta mîgwî. Ngaatumîra antû ba Zaiûni ta rûchiû rwa kûrwaa na Agriiki.”

¹⁴MWATHANI agacionania îgûrû rîa antû baawe; akaaratha mîgwî yaawe ta rweni; MWATHANI Mûrungu nîwe ûkaringa tarumbeta, na eete ndweene ta kîbuubani kîa bwa ûmotho.

¹⁵MWATHANI Mweneinya agakaria antû baawe, nabo bakaathiria anthû baao bakûngûîre ndweene ta antû boogiti beetûûre tharike ya antû baao; nayo tharike yunîkare ta tharike ya kîgongwana îtûûrîri kîritîroone na mpakûri.

¹⁶Ntukû îîu nîyo MWATHANI Mûrungu waao akaboonokia nîûntû nîbo ng'ondu cia ûrîîthi bwaawe; nabo bagaakengakenga ta twiga twa thirû twa goro barî njareene ciaawe.

¹⁷Îî, nîatîa mantû îndî jakathongoma na jabue! Antû baao babeethi bageekîrwa inya nî irio na ndibei.